Read Iban 1 Samuel 29 Bible Online

1 Samuel 29 - Iban bible

1 Samuel 29

¹Orang Pilistin lalu ngempuruka semua bala soldadu sida di Apek, lalu orang Israel nirika kem sida ba mata ai ba Lebak Jesril.

²Raja orang Pilistin ke lima iku nya lalu mansang mai bala sida, beratus iku enggau beribu iku dalam siti-siti raban. David enggau bala iya bejalai di belakang, sama enggau Raja Akis.

³Bala kepala soldadu orang Pilistin tepedaka seduai iya, lalu nanya, “Nama pengawa orang Hebrew nya ditu?” Akis lalu nyaut, “Iya tu David, siku pemesai Raja Saul orang Israel. Iya endang lama udah enggau aku. Aku nadai kala nemu iya bisi udah ngereja penyalah kenyau ari iya datai ngagai aku.”

⁴Tang bala tuai soldadu orang Pilistin pedis ati ngagai Akis, lalu ku sida bejaku enggau iya, “Asuh orang nya pulai ngagai nengeri ti udah diberi nuan ngagai iya. Anang ngasuh iya enggau kitai beperang. Kada enda iya deka nguing ngelaban kitai lebuh kitai bamuk lagi. Tu peluang ti manah kena iya munuh bala kitai lalu minta diri dikerinduka tuan iya.

⁵ Iya tu David, orang ke dipuji sida ke indu ngena lagu lebuh sida betanda, “Saul udah munuh beribu iku, tang David udah munuh bepuluh ribu iku.’ ”

⁶Akis lalu mesanka David, lalu ku iya bejaku enggau David, “Aku besumpah dalam nama Allah Taala ti idup, ke disembah orang Israel. Nuan udah taluk ngagai aku. Aku endang gaga ati deka mai nuan mansang beperang. Aku nadai kala nemu nuan bisi udah ngereja penyalah kenyau ari nuan datai kitu ngagai aku. Tang sida raja ti bukai enda ngasuh nuan.

⁷Nya alai, pulai meh nuan enggau selamat ke rumah, lalu anang ngereja utai ti tau ngasuh sida enda lantang ati.”

⁸David lalu nyaut, “Nama penyalah aku, tuan? Enti munyi ku nuan, aku endang nadai udah kala ngereja penyalah kenyau ari terubah hari aku bekereja ke nuan, nama kebuah aku enda tau enggau nuan ngelaban munsuh nuan? Nuan endang tuan enggau raja aku. “

⁹“Aku besetuju,” ku Akis nyaut. “Aku ngira nuan taluk baka melikat Allah Taala. Tang sida raja ti bukai udah bejaku madahka nuan enda tau enggau kami beperang.

¹⁰Nya alai, David, semua kita ke udah ninggalka Saul lalu udah datai ngagai aku, angkat tumu pagila, lalu mupuk ari tu rerak tawas pagila.”

¹¹Nya alai David enggau bala iya lalu mupuk tumu pagi hari siti, deka mulaika diri ngagai menua Pilistin. Orang Pilistin lalu mupuk ngagai Jesril.