Read Iban 1 Samuel 3 Bible Online

1 Samuel 3 - Iban bible

1 Samuel 3

¹Lebuh maya nya menya, lebuh Samuel agi biak, lalu bekereja ke TUHAN di baruh Eli, nadai mayuh pesan datai ari TUHAN, lalu genera pen jarang mega dipeda.

²Nyadi sekali, lebuh Eli, ke nyau deka buta, tinduk dalam bilik iya,

³lampu Allah Taala apin dipadamka, Samuel tinduk ba Endur ti Kudus, alai Peti Lampang Batu Adat Allah Taala disimpan.

⁴TUHAN ngangauka Samuel. Samuel lalu nyaut, “Au, tuan!”

⁵Iya lalu belanda ngagai Eli, ku iya, “Nuan bisi ngangauka aku: tu aku.” Tang ku Eli nyaut, “Nadai aku ngangauka nuan. Tinduk meh nuan.” Samuel lalu pulai lalu gali baru.

⁶TUHAN lalu ngangauka Samuel baru. Samuel angkat lalu mansang ngagai Eli, lalu bejaku, “Nuan bisi ngangauka aku. Tu aku.” Tang ku Eli bejaku, “Nadai aku ngangauka nuan, anak. Tinduk meh nuan.”

⁷Nyadi Samuel apin nemu TUHAN, lalu jaku TUHAN pen apin mega dipandangka ngagai iya.

⁸TUHAN lalu ngangauka Samuel ketiga kali. Samuel angkat, mansang ngagai Eli, lalu bejaku, “Nuan bisi ngangauka aku; tu aku.” Nya baru Eli nemu, TUHAN Empu ke ngangauka nembiak nya.

⁹Nya alai iya lalu bejaku enggau Samuel, “Pulai nuan ngagai peninduk nuan. Enti Iya ngangauka nuan baru, sebut, ‘Bejaku meh TUHAN. Nembiak Nuan mending.’ ” Samuel lalu pulai baru ngagai peninduk iya.

¹⁰TUHAN datai lalu bediri dia, lalu Iya ngangau baka ke dulu, “Samuel! Samuel!” Samuel lalu nyaut, “Bejaku meh, TUHAN. Nembiak Nuan mending.”

¹¹TUHAN lalu bejaku ngagai Samuel, “Dinga nuan, Aku baru deka ngereja utai ngagai orang Israel, datai ke semua orang ke ninga pasal utai nya deka temati-kutu.

¹²Ba hari nya ila Aku deka ngukum ruang bilik Eli, munyi ti udah disemaya Aku.

¹³Aku madahka ngagai iya, Aku deka ngukum ruang bilik iya belama iya, ketegal penyai ti ditemu iya, laban anak lelaki iya bejaku busung ngelaban Allah Taala, lalu iya enda nagang seduai iya.

¹⁴Nya alai Aku besumpah ngelaban ruang bilik Eli, madahka penyai ti dikereja ruang bilik iya enda ulih dibuai ngena genselan tauka piring datai ke belama iya.”

¹⁵Samuel mengkang gali nyentuk ngagai pagi. Udah nya iya muka pintu rumah TUHAN. Iya takut madahka genera nya ngagai Eli.

¹⁶Tang Eli ngangauka iya, “Samuel, anak!” “Tu aku,” ku Samuel nyaut.

¹⁷Eli lalu bejaku, “Nama utai ti dipadahka TUHAN ngagai nuan? Anang ngelalaika utai nya ari aku. Awakka Allah Taala ngukum nuan, enti nuan ngelalaika utai ti dipadahka Iya ngagai nuan.”

¹⁸Samuel lalu madahka semua utai ngagai iya. Iya enda ngelalaika utai ari Eli. Ku Eli, “Iya endang TUHAN. Awakka Iya ngereja utai ti manah ba ati Iya.”

¹⁹Samuel mansang besai tuai, lalu TUHAN meruan enggau iya, lalu ngamatka semua utai ti disebut Samuel.

²⁰Lalu semua orang Israel kenyau ari Dan nyentuk ngagai Berseba bela nemu Samuel endang amat nabi TUHAN.

²¹Lalu TUHAN mandangka Diri baru di Siloh, alai Iya ke pegari di mua Samuel ngena jaku TUHAN.