Read Iban 1 Samuel 30 Bible Online

1 Samuel 30 - Iban bible

1 Samuel 30

¹Dua hari udah bekau nya, David enggau bala iya lalu datai baru di Siklak. Orang bansa Amalek udah nyerang selatan menua Judah, enggau nengeri Siklak, nunu nengeri nya

²lalu nangkap semua orang ke indu. Sida nadai munuh orang, tang nabanka semua orang lebuh sida ninggalka nengeri nya.

³Lebuh David enggau bala iya datai dia, sida nemu nengeri nya udah ditunu, lalu bini sida, anak lelaki enggau anak indu sida udah ditabanka munsuh.

⁴David enggau bala iya lalu enda ngetu-ngetu nyabak datai ke sida nyau lepi.

⁵ Indah bini David ke dua iku, Ahinoam seduai Abigail, deh ditabanka munsuh.

⁶David balat tusah, laban bala iya balat amat ringat ketegal sida lenyau anak bini, lalu sida deka nuku iya ngena batu. Tang David bekering ba TUHAN Allah Taala iya.

⁷ Lalu ku David bejaku enggau Imam Abiatar anak Ahimelek, “Bai epod kitu ngagai aku.” Abiatar lalu mai epod ngagai iya.

⁸David lalu betanya ngagai TUHAN, “Kati tau aku ngagai bala perumpak nya? Kati aku ulih tetitihka sida?” Ku TUHAN nyaut, “Titihka sida. Nuan ulih tetitihka sida, lalu ngelepaska bala orang ke ditangkap sida.”

⁹Nya alai David enggau enam ratus iku bala iya lalu mupuk. Lebuh sida datai ba sungai Besor, sekeda sida lalu tinggal dia.

¹⁰David enggau empat ratus iku bala iya lalu majakka pejalai sida. Nyadi sida ke dua ratus iku nya nyau kelalu lelak, enda ulih meraka sungai nya, lalu sida ninggalka diri.

¹¹Bala David lalu tetemuka siku orang Ejip di menua nya, lalu sida mai iya ngagai David. Sida meri iya makai enggau ai irup,

¹²meri iya salai buah ara mimit, enggau dua gupung salai buah anggur. Lebuh iya udah badu makai, iya lalu berasai kering baru. Iya nadai makai, nadai ngirup tiga hari terit.

¹³David lalu nanya iya, “Sapa nama tuan nuan, lalu ari ni penatai nuan?” “Aku tu orang Ejip, ulun orang Amalek,” ku iya nyaut. “Tuan aku ninggalka aku tiga hari tu udah, laban aku sakit.

¹⁴Kami udah ngerumpak menua Kereti di selatan menua Judah, enggau menua raban peturun Kalep, lalu kami nunu Siklak.”

¹⁵“Kati nuan deka nguluka aku ngagai bala perumpak nya?” ku David nanya iya. “Ka, enti nuan besemaya dalam nama Allah Taala, enda munuh aku, tauka nyerahka aku ngagai tuan aku,” ku iya nyaut.

¹⁶Iya lalu nguluka David ngagai sida. Nyadi bala perumpak nya udah ngachir ba sebelah menua nya, makai, ngirup, lalu ngerami diri ti udah ngerampas mayuh amat perapasan ari menua Pilistin enggau menua Judah.

¹⁷Tumu pagi hari siti, David lalu nyerang sida, ngelaban sida nyentuk ngagai lemai hari nya. Kelimpah ari empat ratus iku orang ke nepan unta, ke ngerarika diri, nadai siku sida ulih rari.

¹⁸David lalu ngambi pulai baru semua orang enggau semua utai ti udah ditabanka orang Amalek, nyengkaum bini iya ke dua iku.

¹⁹Utai sida nadai lenyau siti. David lalu mai semua anak lekaki enggau anak indu bala iya pulai, enggau semua utai ti udah dirampas orang Amalek.

²⁰Iya mega ngambi pulai baru semua jelu bedus, enggau semua jelu sapi. Bala iya lalu ngasuh raban jelu tupi bejalai dulu ari sida. Ku sida, “Tu enggi David magang!”

²¹Udah nya David lalu pulai ngagai dua ratus iku bala iya ke kelalu lepi bejalai enggau iya, lalu udah ninggalka diri ba sungai Besor. Sida mansang ngambat David enggau bala iya. David lalu mansang ngagai sida, lalu betabi enggau sida, gaga ati.

²²Tang sekeda orang ke jai, ti udah bejalai enggau David lalu bejaku, “Sida nadai bejalai enggau kitai, nya alai kami enggai meri sida perapasan ti udah ulih kami, tang sida tau ngambi bini enggau anak sida, lalu angkat ari tu.”

²³Tang ku David nyaut, “Menyadi, enggai nyadi kita baka nya enggau utai ti udah diberi TUHAN ngagai kitai! Iya udah nyaga kitai, lalu udah nyerahka bala perumpak ngagai jari kitai.

²⁴Nadai orang deka mendingka kita ba pekara tu! Semua utai enda tau enda dibagi bela. Orang ke tinggal ngemataka bekal, diberi ungkup ngemayuh enggi orang ke enggau beperang.”

²⁵David ngaga tu nyadika adat, lalu berengkah ari nya, adat nya mengkang dititihka orang Israel.

²⁶Lebuh David pulai ngagai Siklak, iya ngirumka sekeda perapasan nya ngagai pangan iya, iya nya bala tuai orang Judah, ngena pesan tu, “Tu pemeri ke nuan, ari perapasan ti udah dirampas aku ari bala munsuh TUHAN.”

²⁷Iya ngirumka utai nya ngagai orang di Betel, orang di Ramah di selatan menua Judah, enggau ngagai orang di nengeri Jatir,

²⁸Aroer, Sipmot, Estemoa,

²⁹enggau di Rakal, ngagai raban peturun Jerahmil, Ken,

³⁰enggau ngagai orang di nengeri Hormah, Borasan, Atak,

³¹enggau Hebron. Iya ngirumka utai nya ngagai semua endur ti udah ditengah iya enggau bala iya.