Read Iban 1 Samuel 31 Bible Online

1 Samuel 31 - Iban bible

1 Samuel 31

¹Nyadi orang Pilistin bamuk ngelaban orang Israel ba Bukit Gilboa. Mayuh amat orang Israel mati dia.

²Orang Pilistin lalu ulih tetitihka Saul enggau anak lelaki iya, lalu munuh Jonatan, Abinadap, enggau Malkisua, anak lelaki Saul ke tiga iku.

³Balat amat orang bamuk ngelingi Saul, lalu Saul empu kena laban laja munsuh, lalu balat amat bakal.

⁴Ku iya bejaku enggau nembiak ke mai senyata iya, “Sintak pedang nuan, lalu rejangka pedang nya ngagai aku, enggai ke orang kapir nya beduan aku.” Tang nembiak nya enggai. Nya alai Saul lalu ngambi pedang iya empu, lalu ngerejang diri ngena pedang nya.

⁵Lebuh nembiak nya meda Saul udah mati, iya mega ngerejang diri ngena pedang iya empu, lalu mati sama enggau Saul.

⁶Nya meh gaya Saul, anak lelaki iya ke tiga iku, nembiak ke mai senyata ke iya, enggau semua bala Saul mati sehari nya.

⁷Lebuh orang Israel ke ba sepiak-sepiak Lebak Jesril, enggau di timur Sungai Jordan, ninga bala soldadu orang Israel udah rari, lalu Saul enggau bala anak iya udah mati, sida lalu ninggalka nengeri sida, lalu rari. Udah nya orang Pilistin datai, lalu nguan nengeri nya.

⁸Sehari udah bekau sida ke bamuk, orang Pilistin lalu ngambi utai ari bangkai orang ke mati. Sida lalu nemu bangkai Saul enggau anak lelaki iya ke tiga iku ba Bukit Gilboa.

⁹Sida mumpung pala Saul, muka baju kebal iya, lalu ngasuh bala seruan mai utai nya ngagai semua menua Pilistin, madahka berita manah nya ngagai engkeramba enggau ngagai orang Pilistin.

¹⁰Udah nya sida ngengkahka senyata Saul dalam rumah sembiang petara Astarte, lalu ngelantakka bangkai iya ba dinding nengeri Bet-san ngena paku lawang.

¹¹Tang lebuh orang di Jabes, di menua Giliat ninga utai ti udah dikereja orang Pilistin ngagai Saul,

¹²semua orang ke berani angkat lalu bejalai semalam-malam nya ngagai Bet-san. Sida nurunka bangkai Saul enggau anak lelaki iya ari dinding nya, mai sida pulai baru ngagai Jabes, lalu nunu bangkai sida dia.

¹³Udah nya sida ngambi tulang sida, lalu nguburka tulang nya di baruh kayu tamaris di nengeri nya, lalu bepasa tujuh hari.