Read Iban 1 Samuel 5 Bible Online

1 Samuel 5 - Iban bible

1 Samuel 5

¹Lebuh orang Pilistin udah nabanka Peti Lampang Batu Adat nya, sida lalu mai peti nya ari Ebeneser ngagai Asdot.

²Sida lalu mai Peti Lampang Batu Adat nya ngagai rumah sembiang petara sida ke benama Dagon, lalu ngengkahka Peti nya ngimbai engkeramba Dagon.

³Tumu pagi hari siti, orang di Asdot meda engkeramba Dagon rebah tingkap ba tanah di mua Peti Lampang Batu Adat TUHAN. Sida lalu ngangkatka engkeramba nya, lalu nirika iya baru.

⁴Tang lebuh sida dani tumu pagi hari siti, sida meda engkeramba nya udah rebah baru di mua Peti Lampang Batu Adat nya. Sekali tu pala enggau lengan dua piak engkeramba nya udah putus, lalu garing-garing ba pintu penama. Ka semina bukang tubuh engkeramba nya aja agi tinggal. (

⁵Nya kebuah nyentuk ngagai sehari tu, bala imam Dagon enggau semua orang ke nyembah iya, enda tau ngindik semetung mua pintu rumah sembiang Dagon.)

⁶TUHAN balat amat ngukum orang Asdot, sereta ngenakutka sida. Iya ngukum sida, enggau orang ke diau di menua ti ngelingi nengeri nya, ngena penyakit bengkak.[5]

⁷Lebuh sida meda utai nya balat amat nyadi, sida lalu bejaku, “Kitai enda tau nyimpan Peti Lampang Batu Adat tu agi; laban Allah Taala ke disembah orang Israel balat amat ngukum kitai.”

⁸Nya alai sida mesanka semua raja orang Pilistin, lalu nanya ngagai sida, “Kati ku kitai enggau Peti Lampang Batu Adat Allah Taala ke disembah orang Israel tu?” Sida raja nya lalu nyaut, “Bai Peti nya ngagai Gat.” Nya alai sida lalu mai Peti nya ngagai nengeri Gat.

⁹Tang lebuh Peti Lampang Batu Adat nya datai dia, TUHAN mega ngukum orang di nengeri nya, ti ngujungka orang dia balat amat begau abis ati.[6] TUHAN ngukum sida ngena penyakit bengkak ti tumbuh ba semua orang ke biak enggau ke tuai di nengeri nya.

¹⁰Nya alai sida lalu nganjung Peti Lampang Batu Adat nya ngagai Ekron. Tang lebuh Peti nya datai di Ekron, orang dia lalu bejaku, “Sida udah mai Peti Lampang Batu Adat Allah Taala ke disembah orang Israel kitu, ngambika Peti nya munuh kitai semua!”

¹¹Sida lalu mesanka semua raja orang Pilistin baru, ku sida, “Anjung Peti Lampang Batu Adat orang Israel nya pulai ngagai endur iya empu, ngambika iya enda munuh kitai enggau ruang bilik kitai.” Laban semua orang di nengeri nya begau abis ati[7] laban Allah Taala balat amat ngukum sida.

¹²Indah orang ke enda mati deh diempa bengkak, datai ke sida nyau nyabak minta tulung petara sida.