Read Ibibio Contemporary Bible 2020 Matiu 10 Bible Online

Matiu 10 - Ibibio Contemporary Bible 2020 bible

Matiu 10

¹Yisọs akood mbed duob ye iba, anyʌñ anọ ammọ adudu adibịn mme ndiọi sịbidịd nsiooño mme awo ke idem ñnyʌñ ñkọk nsio-nsio udọñọ ye mbiaak.

²Anyịñ mme mbed duob ye iba ado edoñño ami: Akpa ke atu ammọ ado Saimọn (e-ediọọñọke nte Bita), ye ayịneka amọ Andru; Yemsi ayịn Sebidi, ye ayịneka amọ Yọọn;

³Fidib ye Batodomiu; Tọmọs ye Matiu abọ taksi; Yemsi ayịn Afiọs, ye Tadiọs;

⁴Saimọn a-adooho Sidọd ye Yudas Iskariọd, a-aketappa anye anọ ñkpa.

⁵Yisọs amaasio awo duob ye iba ami adọñ utom, anyʌñ anọ ammọ item ate: “Ikiikaa idʌñ mme Yentaid, ikiinyʌñ idʌk abio mme Samaritan.

⁶Ado ikaa ibịne mme edọñ ufọk Isred e-emaekesop.

⁷Ndin imaika, ikwọrọ ibo ke abio ubọọñ hefịn akpere.

⁸Ikọk mbon udọñọ, inam mme awo eset ke ñkpa, ikọk akpamfia, ibịn ndiọi sịbidịd. Ndufo ekebọ ke mfọn, ndufo inyʌñ inọ ñko ke mfọn.

⁹“Ndufo ikiikama kood me srifa, me kọpa ke nkịne isịn akʌk ndufo

¹⁰ikiikama ekpad isañ, me ukpʌghọ afọñ me ikpaukod, me esañ isañ, sia anam utom adod ñkpọ ayịnutom.

¹¹Ke abio me idʌñ ake adodo ake ndufo edʌkkọ, iyem eti awo inyʌñ iba ye anye tutu ndufo ekpọñ do.

¹²Imaidʌk esịd ufọk awo, ikọọm mme andinie ufọk.

¹³Ndin adieke ufọk ado adotto, yak emem ndufo asʌghọ do; adieke ufọk ado mmiidotto yak emem ndufo atịmme ikeene ndufo.

¹⁴Ndin adieke awo mmiidaarake ndufo, mmiinyʌñọ ikpañ utọñ ikop se enie aditañ, emaebo iwuọ ke ufọk me utọ idʌñ ado, ikeñ ntan ikpad ndufo ibono do.

¹⁵Ke akpanikọ ke ami ibo ndufo, ke usen ikpe amaakem, ayaakap ifọn inọ Sọdọm ye Komora akan utọ abio ado.

¹⁶“Ami isio ndufo ndọñ nte edọñ ke ufọọd mme ekpe. Ana ekara ñkara nte udʌkikọd enyʌñ enana ndudue nte ibiom.

¹⁷Ikap ikpeme idem ye mme awo, sia ammọ eyaimuum ndufo eyaak enọ mme esob ikpaisọñ enyʌñ imia ndufo ufen ke itie ubọñ akam ammọ.

¹⁸Eyaeben ndufo eka iso mme akọnsịn ye mme ndidem ke ntak mmi, nọ edoñño ntiense enọ ammọ ye mme Yentaid.

¹⁹Ado emaimuum ndufo ika, ikiifịna ibaña naña ediitañ ikọ me se ediitañ, sia eyainọ ndufo se ediitañ ini amaakem,

²⁰sia ikappa ido ndufo ediitañ ikọ, ado Sịbidịd Ete ndufo adikama ndufo itañ ikọ.

²¹“Ayịneka ayaatap ayịneka anọ ñkpa, ete ayaanyʌñ atap ayịn amọ anọ ñkpa; ndin nditọ eyaetọọñọ ekọñ ye mme eka ye mme ete ammọ, enyʌñ enam ewot ammọ.

²²Afịd-afịd awo eyaisua ndufo ke ntak mmi; ado awo a-adiisọọñọ ida ikisịm utịd ayaabọkkọ.

²³Emaifịna ndufo ke idʌñ keed, ifeeñe ika idʌñ mfen; ndin emaenyʌñ ekifịna ke idʌñ anye ado, isʌk ifeeñe ika mfen. Ke akpanikọ ke ibo ndufo, idiisañake ikanna afịd abio Isred ima mbemiso Ayịn Awo adi.

²⁴“Mbed isikponno ikan andikpeeb, ifʌn isinyʌññọ ikpon ikan eteufọk.

²⁵Nditọ ufọkñwed ekeme adikpon ediba nte andikpeeb, nditọ enyʌñ ediba nte eteufọk. Adieke ekoodo eteufọk Bedsibọb, eyaekood mbon esịd ufọk amọ anyịñ se idiọọk ikan ado.

²⁶“Anam ikiifeghe ammọ. Afịd ñkpọ se idịbe idahami eyaeyaara, se mmiinyʌññọ inwaña awo, eyaenam anwaña.

²⁷Se idọkọ ndufo ke ndedịbe, itañ añwa-añwa; se ekop ke sʌñsʌñ uyo, ibọọñ ke añwa.

²⁸Ikiifeghe mbon e-ekemeke adiwot ikpọkidem ado ikanna iwot ukpọñ; ikap ifeghe awo a-akanna awot ikpọkidem ye ukpọñ ke nsi-nsi ikañ.

²⁹Nte ndufo ikpidatta kọbọ keed idep nsiak iba? Ado baaba ammọ keed ikemeke iduọ ke isọñ ke ini Ete ndufo mmiidiọọñọke ibaña.

³⁰Ebat kpak afịd ided iwuod ndufo.

³¹Anam ufọn ndufo adikop ndịk ibaaha; ndufo emesọñ ekọmudua ekan uwak nsiak.

³²“Ke ntodo, awo a-anyịmmeke miin añwa-añwa ke iso mme awo, ami ñyaanyʌñ nnyịmme anye añwa-añwa ke iso Ete mmi ke abio ubọọñ.

³³Ado awo a-añkañña miin ke iso mme awo, ami ñyaanyʌñ ñkañ anye ke iso Ete mmi ke abio ubọọñ.

³⁴“Ikiikere ke ami ñkedi adiben emem ndi ke ederimbod; idooho emem ke ami ñkedat ndi, ado akañkañ ke ami ñkedat ndi.

³⁵Sia ami ndi adinam nọ “ ‘ayịn awodeen atọhọ ye ete, ayịn awonwaan anyʌñ atọhọ ye eka, anwaan ayịn atọhọ ye eka ebe.

³⁶Mme asua awo ediito esịd ufọk amọ.’

³⁷“Awo akeadodo a-amaaha ete me eka amọ añkan miin idotto adikood idem amọ indian miin; awo a-amaaha ayịn awonwaan amọ añkan miin idotto adikood idem amọ indian miin.

³⁸Ndin awo ake adodo a-ammiibenne krọs amọ iñkeene miin idotto adikood idem amọ indian miin.

³⁹Awo akeadodo a-ayemme uwem amọ ayaaduọk, awo anyʌññọ aduọk uwem amọ ke ntak mmi ayaanie uwem.

⁴⁰“Awo a-adaarake ndufo, andaara miin, anye a-anyʌññọ andaara miin adaara awo andikindọñ miin.

⁴¹Awo akeadodo a-adaarake brọfed ke ntak anye adooho brọfed ayaabọ utịb brọfed; awo a-anyʌññọ adaara adisana awo ke ntak anye adooho adisana ayaanyʌñ abọ utịb adisana awo.

⁴²Ndin awo akpenọ keed ke atu mbon ami kọọb ndedeñ mmọọñ keed nọ anwọñ ke ntak adooho mbed mmi, ntañ akpanikọ anye ayaabọ eti utịb.”