Read Ibibio Contemporary Bible 2020 Matiu 11 Bible Online

Matiu 11 - Ibibio Contemporary Bible 2020 bible

Matiu 11

¹Ke ini Yisọs amaakekpeeb mme mbed amọ ima, anye amaadakka do aka adikpeeb ñkpọ ñnyʌñ ñkwọrọ ikọ ke mme abio Kadidi.

²Ndin Yọọn amaatie ke ufọk ñkpakọb akop se Krais akenañña anyʌñ asio mme mbed amọ adọñ ate ekebịp

³anye ebo, “Afo ado anye a-akenaaha nte adi, me isʌk itie ibet awo mfen?”

⁴Yisọs abọọrọ ate, “Itịmme ika ikidọkkọ Yọọn se ekop enyʌñ ekịt:

⁵Mme nnan ekịt usʌñ, mme mbʌñọ esaña isañ, mbon akpamfia esaana, mme inan enyʌñ ekop ñkpọ, mme akpañkpa eset ndin enyʌñ ekwọrọ eti mbʌk enọ mme uweene;

⁶Ndin afọfọn anọ awo a-ammiinieeghe eyịghe imbaña miin.”

⁷Ke ini mme isʌñutom ado edaañake enyọñ, Yisọs atọọñọ adidọkkọ mme awo mbaña Yọọn, ate “Nso-o ke ndufo ekeka ise ke akpautatan? Nnyanyaha nte afịm anyeeñe?

⁸Mmiidooho ntodo, ndufo ekeka ise so-o? Awo nte asịne mfọọn afọñ? Iyoo, mbon se isịne mfọọn afọñ ebañña ke ufọk mme mbọọñ.

⁹Do ndin ndufo ekekaka so-o? Adikikịt brọfed? Ih, anye a-akanna brọfed.

¹⁰Anye ke ñwed Abasi aketañ abaña, abo: “ ‘Sese, Ami ñyaadọñ isʌñutom mmi uboiyo fiin iso nọ ato do adiọñ usʌñ unọ fiin.’

¹¹Ke akpanikọ ke mbo nte, ke atu afịd nditọ se ibaan eman, ba keed a-akanna Yọọn Aduọkmmọọñ ibaaha; kpa ye ado andisịp ñkan ke abio ubọọñ Abasi akpon akan anye.

¹²Tọọñọ ke ini Yọọn Aduọkmmọọñ, tutu asịm idahami, abio ubọọñ Abasi akịt afai, ndin mbon afai edat afai enie anye.

¹³Sia ado Yọọn ke afịd mme Brọfed ye Ibed eketañ ebaña.

¹⁴Ekpenyịmme adinịm se ntañ, anye ado Edaiya a-akenaaha atịmme adi.

¹⁵Awo akenie utọñ yak akop!

¹⁶“Nso-o ke ñkpedat ndomo ye emana anye ami? Eba nte ntəkayịn etie ke itie udua ebọọñ enọ keed aken ete:

¹⁷“ ‘Ñnyịn imaifịt abukpoñ inọ ndufo, ndin ndufo imaaha inek; ikwọ ikwọ ikpo inọ, ndin ndufo ituaaha ayịd.’

¹⁸Sia Yọọn amaadi, idiaaha ñkpọ, inyʌññọ inwọñ mmịn, ndin ammọ ete, ‘anye ado dimọn.’

¹⁹Ayịn Awo amaadi, adia ñkpọ anyʌñ anwọñ mmịn, ndin ammọ ete, ‘Kap se adiọọkitọñ ye akpammịn, ufan mme abọ taksi ye ndiọi awo.’ Ado edat utom ifiọk ediọọñọ ifiọk eto ke utom amọ.”

²⁰Ndin Yisọs atọọñọ adisua nnọ mme abio anye akenamma mme uwak utịbe ñkpọ, sia ammọ ikikamma adikappa esịd.

²¹“Adọdiọọk inọ ndufo Korasin! Adọdiọọk inọ ndufo Bedsaida! Sia akpedo ekenam afịd utịbe ñkpọ ami ke Taya ye Sidọn, mbon ado ekpaekekappa esịd enyʌñ enekke etua ñkpafiọk tọọñọ isua.

²²Nsʌk ibo ndufo ke ayaafọn ye Taya ye Sidọn ke usen ikpe ikan ndufo.

²³Ado amaado afo Kapanọm, akeyem ubenne fiin eke ewuọ ikpaanyọñ? Iyo, afo ayaakewuọ Abioekpo. Sia akpedo ekenam afịd utịbe ñkpọ ami ke Sọdọm, ammọ ekpa esọñ eda.

²⁴Nsʌk ibo ndufo ke ayaafọn ye Sọdọm ikan ndufo ke usen ikpe.”

²⁵Ndin akedikem ini ado, Yisọs ke akpọsọñ uyo ate, “Mmutooro fiin, Ete, Abọọñ anyọñ ye isọñ, sia afo amedịp mme afiọkñkpọ awo mme ñkpọ ami, anyʌñ ayaara ammọ anọ ntəkayịn.

²⁶Ih, Ete se ikunem fiin esịd adinam adodo.

²⁷“Ete mmi ayaak afịd ñkpọ ansịn ke ubọk ndin baaba awo ndomokeed idiọọñọke Ayịn ke mmiibọhọke Ete, kpa naña nte awo ndomokeed mmiidiọọñọke Ete ke mmiibọhọke Ayịn, mme mbon Ayịn amekke adiyaara anye nnọ.

²⁸“Idi imbịne miin, afịd ndufo e-ekpaaha mba enyʌñ ebiom ndodoppo mbiomo, ndin ñyainọ ndufo nduọkadudu.

²⁹Iben akpọnọ mmi inyʌñ ikpeeb ñkpọ into miin sia ami ndo sʌñ-sʌñ nnyʌñ nnie nsuukidem ke esịd, ndin eyaenie nduọkadudu enọ ukpọñ ndufo.

³⁰Sia akpọnọ mmi amem, ndin mbiomo mmi anyʌñ ayakka.”