Read Ibibio Contemporary Bible 2020 Matiu 13 Bible Online

Matiu 13 - Ibibio Contemporary Bible 2020 bible

Matiu 13

¹Kpa ke usen ado Yisọs amaakpọñ ufọk aka aketie akpere ibiok.

²Mme atu awo emaedibono ekanna anye ekʌk. Atu awo ami emaewak tutu adido se anye adakka aketie ke ubom ke ini ammọ edaaha ke mben mmọọñ.

³Do ndin anye ataañ uwak ikọ anọ ammọ ke ñke abo, “Atọ inwañ akeka iwaad ñkpasi.

⁴Naña anye awaada ñkpasi ami, usʌk eduọññọ ke mben akpọusʌñ, ndin mme inuen edikoono ammọ etaha.

⁵Usʌk eduọññọ ke mme isọñ itiad, isọñ a-mmiifọnnọ ñkpọ. Ammọ etịppe usọp-usọp, sia isọñ ikitʌñọke.

⁶Ke ini utịn amaakesakka, adimia ammọ, ammọ ema eyeeme sia ammọ ikiinieeghe adʌñ.

⁷Mme ñkpasi mfen ekeduọññọke ikọd ñkukịm ndin ikọd afʌk ammọ.

⁸Ado ñkpasi mfen emaeduọññọ ke eti isọñ enyʌñ eñwuum mfịd ikie-ikie, ata, me edịb ye duob.

⁹Awo ake adodo anieeghe utọñ, yak anye akop.”

¹⁰Ndin mme mbed amọ ebịne anye ekebịp anye ebo, “Ntak a-afo atañña ikọ anọ mme awo ke ñke-e?”

¹¹Anye abọọrọ ammọ, “Inọ ndufo ikpọọñ unen adidiọọñọ ifiọk ndedịbe ñkpọ abio ubọọñ Abasi, idooho mbon mfen.

¹²Awo keed ake adodo anieeghe ñkpọ eyaenọ anye awak akan, ndin anye ayaanie akan naña anye ayem. Ado awo a-mmiinieeghe-nie, kpa etək ado anye anieeghe, eyaebọ anye.

¹³Ntak a-ntañña ikọ nnọ mme awo ke ñke ado nọ ato do: “Ammọ ese, ado ikịtte, ekpañ utọñ, ado ikoppo, inyʌññọ inwaña ammọ.

¹⁴Ke ntom ke brọfesi Aisaya asu: “ ‘Ndufo eyaekop, ado ñkpọ idiiñwañake; ndufo eyaese ado idiikịtte.

¹⁵Sia esịd ibon ami asọñ; ammọ ikoppo ñkpọ ke utọñ ammọ, ñkọ enyʌñ ebọp anyen ammọ. Mmiidooho ntodo anyen ammọ ekpaekịt ñkpọ, utọñ ammọ enyʌñ ekop ñkpọ, ñkpọ anyʌñ añwaña ammọ, ndin ammọ ekappa esịd, etịmme edi, ndin ami ñkpaakọk ammọ udọñọ.’

¹⁶Ado afọfọn anọ anyen ndufo sia ammọ ekịt, mme utọñ ndufo, sia ammọ ekop.

¹⁷Sia akpanikọ ke ntañ inọ ndufo, uwak brọfed ye mme nnen-nnen awo emaeyem ikịt se ndufo ekịt ami, ado ikikịtte, emaenyʌñ eyem ikop, ado ikikoppo.

¹⁸“Ikpañ utọñ ndin ikop se ñke asuan ñkpasi ami awuọọñọ.

¹⁹Awo amaakop ikọ abio ubọọñ, ado ikọ ami inwañake anye, anam ndubịk adi adiwịppe se eketọ ami ke esịd amọ. Anye ami aba nte ñkpasi a-akeduọọhọ ke akpọusʌñ.

²⁰Ñkpasi ekeduọññọke ke isọñ itiad eda enọ mbon ebọọhọ ikọ Abasi ke inemesịd naña ammọ ekoppo do.

²¹Ado ikọ ami idʌkkọ ata esịd idem ammọ, anam ikoppo anye ikpeene. Ukuud ye ndutʌkkọ emaedi ke ntak ikọ Abasi ami, ammọ ikanna iyọ.

²²Ñkpasi ekeduọññọke ke ikọd ñkukịm eda enọ mbio e-koppo ikọ Abasi, ado mfịna uwem ami ye abiaaña inie ederimbod ami efʌk ikọ ami, iyakka nọ ammọ enwịm mfịd.

²³Ndin ñkpasi e-eketọọhọ ke eti isọñ eda enọ mbon e-ekoppo ikọ Abasi; ikọ ami anyʌñ anwaña ammọ. Ammọ enwịm mfịd, usʌk akañ ikie, usʌk akañ ata, usʌk akañ edịp ye duob.”

²⁴Yisọs amaana atañ ñke mfen ntom: “Abio ubọọñ Abasi atie nte awo a-atọọhọ eti ñkpasi ke inwañ ammọ.

²⁵Ado akonayo keed, ke ini afịd awo esʌkkọ edaiya idab, asua amọ aditọ mbiod asịn ke ufọọd abakpa anyʌñ adakka anyọñ.

²⁶Abakpa amaaketịppe anyʌñ awuọọñọ mfañ, mbiod ñko anyʌñ atịppe.

²⁷“Ndin nditọufọk anie inwañ edibịne anye ebo, ‘Ete, nte afo ukutọọhọ nti ñkpasi ke inwañ mfo? Mbiod aketo mmọọ ndin atịppe adikọt?’

²⁸“Anye abọọrọ ate, ‘Asua mmi akenam ami.’ “Nditọufọk ebịp anye, ‘Nte afo ameyem nọ ñnyịn ikiwịp ammọ isiooño?’

²⁹“Ndin anye abọọrọ ate, ‘Iyoo, sia idaha a-ndufo ewịppe mbiod ami, emekeme adiwịppe akpakpa ñko ye mbiod.

³⁰Yak ammọ iba ekọọd keed tutu ini idọk. Ke ini ado nyaadọkkọ mme adọkidọk nte: Ibem iso iwịp mme mbiod inyʌñ ibọp ammọ ke ebek ke ebek inịm nọ edifọp, ndin ikpịkke mme akpakpa ikibon ke ise mmi.’ ”

³¹Yisọs amaana atañ ñke mfen, a-akekaaha ntom: “Abio ubọọñ Abasi atie nte ñkpasi mọstad awo akebenne atọ ke inwañ amọ.

³²Akpesʌk ado anye asịppe akan afịd ñkpasi, amaakpon anye akappa ado eto andikpon ñkan, ado se mme inuen anyọñ edi sọrọ ke ñkọk amọ.”

³³Anye amaana atañ ñke mfen: “Abio ubọọñ Abasi atie nte yis a-awonwaan akebenne awaak ye udomo frawa ata tutu akappa atọt akem afịd efiak bred.”

³⁴Yisọs atañ afịd ñkpọ ami anọ atu awo ke ñke; anye ikitañña baaba ñkpọ ndomokeed inọ ammọ ke mmiikamake ñke.

³⁵Ntodo ke se brọfed aketañ akewuọ awọt idem: “Ami ndiitañ ikọ inọ ndufo ke ñke, ñnyʌñ nnam anwaña ndedịbe ñkpọ tọọñọ ke aditọọñọ ederimbod.”

³⁶Ndin anye akpọñ mme atu awo anyọñ ufọk. Do mbed amọ edibo anye, “Nam nọ ñke mbiod ke inwañ inwaña ñnyịn.”

³⁷Anye abọọrọ ammọ ate, “Anditọ eti ñkpasi ado Ayịn Awo.

³⁸Inwañ ado ederimbod, ndin eti ñkpasi ada anọ nditọ abio ubọọñ. Mbiod ada anọ nditọ andidiọọk,

³⁹ndin awo usua a-aketọọhọ mbiod ado Setan ke idem amọ. Ini idọk ado utịd ederimbod ami, ndin mme adọkidọk edoñño mme enyere.

⁴⁰“Naña ewịp mbiod esioño efọp ke ikañ, ntodo ke adido ke utịd ederimbod.

⁴¹Ayịn Awo ayaadọñ mme enyere amọ, ndin ammọ eyaewaak afịd ñkpọ se ido ntak idiọọkñkpọ ye mbio se inam ndiọi esio ke abio ubọọñ amọ.

⁴²Eyaetoomo ammọ edọñ ke itie afai-afai ikañ a-ntuaaña ye nta eded ediikpon.

⁴³Ndin mme nnen-nnen awo eyaeyamma nte utịn ke abio ubọọñ Ete ammọ. Awo a-anieeghe utọñ adikop, yak akop.

⁴⁴“Abio ubọọñ Abasi atie nte ñkpọuto e-edịppe-dịp ke isọñ. Ke ini awo akịtte ñkpọuto ami, anye amaana adịp anye, ndin ke inemesịd anye akenyam afịd ñkpọ a-anye akenieeghe akedep isọñ ado.

⁴⁵“Ke adimaana ntañ, abio ubọọñ Abasi atie nte akwa anyam udua a-ayemme ata uyaiya mme.

⁴⁶Ke ini anye akịtte ñkpọ ntom atʌmmọ asọñ ekọmudua, anye atịmme anyọñ akenyam afịd ñkpọ adep ñkpọ ado.

⁴⁷“Ke adimaana ntañ, abio ubọọñ Abasi atie nte iyịre e-eketoppo esịn ke ibiok ndin anye amʌm afịd utọ iyak.

⁴⁸Ke ini iyịre amaakeyọhọ ye iyak, mme akọiyak edʌt anye edisịm abod. Ndin ammọ esuuk etie esat nti iyak esiooño edọñ ke akpasa, ado etoomo mbon se mmiifọnnọ eduọọñọ.

⁴⁹Adiiba ntom ke utịd ini. Mme enyere eyaedibakka mme ndubịk awo ediañña ekpọñ mme nnen-nnen awo,

⁵⁰ndin etoomo ammọ edọñ ke itie afai-afai ikañ, nte ndutuaaña ye nta eded ediiba.”

⁵¹Yisọs abịp ammọ ate, “Nte afịd ñkpọ ami inwaña ndufo?” Ammọ ebọọrọ, “Ih.”

⁵²Ndin anye abo ammọ, “Do ndin andikpeeb ibed ake adodo e-emaekekpeeb anye ñkpọ abio ubọọñ Abasi atie nte anieufọk a-asiooñoke mme ufa ye mme ñkaan inie uto amọ ke ufọk ubonoñkpọ amọ.”

⁵³Ke ini Yisọs amaaketañ mme ñke ami ima,

⁵⁴anye amaakpọñ itie ado. Anye akewuọ idʌñ ammọ anyʌñ atọọñọ adikpeeb ñkpọ ke itie ubọñ akam ammọ. Idem amaakpa mbio se ikikop se anye akekpeeb. Ammọ emaebịp ete, “Anye akebọ ifiọk ami ye adudu utịbe ñkpọ ami ato uke?

⁵⁵Idooho ayịn kabinta ado ami? Nte Mmeri idooho eka amọ? Yemsi, Yosef, Saimọn ye Yudas inyʌññọ idoñño nditọeka amọ?

⁵⁶Afịd nditọeka amọ ibaan ibaññake ye ñnyịn mi? Awo ami ndin akebọ afịd ñkpọ ami ato mọ-ọ?”

⁵⁷Ndin ammọ emaeyat esịd ebaña anye eti-eti. Ado Yisọs abo ammọ, “Ado ke idʌñ amọ ye ke ufọk amọ ke brọfed miinieeghe ukpono.”

⁵⁸Anye ikinamma uwak utịbe ñkpọ do ato unana mbuọdidem ammọ.