Read Ibibio Contemporary Bible 2020 Matiu 14 Bible Online

Matiu 14 - Ibibio Contemporary Bible 2020 bible

Matiu 14

¹Ke ini ado, Herọd andikara amaakop abaña etob Yisọs.

²Anye amaabo nditọufọk amọ, “Yọọn Aduọkmmọọñ ado ami ke idem amọ, anye aset ke ñkpa, ado ado ntak adudu mme utịbe ñkpọ abaaha anye ke idem.”

³Ado Herọd akenam nọ emʌm Yọọn, ebọp anye ñkpaha ukwak, enyʌñ esịn anye ke ñkpakọb ke ntak Erọdias, anwaan ayịneka amọ Fidib.

⁴Sia Yọọn amaabo anye, “Ibed akpan afo adiben anwaan ayịneka mfo ndọ”

⁵Herọd amaayem adiwot Yọọn ado akebaak mbon awo anyen sia ekedat Yọọn nte brọfed.

⁶Ndin ke ini usọrọ usen emana Herọd, ayịn awonwaan Erọdias amaanek unek ke iso mme isenawo, ado anem Herọd esịd.

⁷Anam Herọd ata unwọñọ ate ke imọ iyainọ anye ñkpọ ake adodo anye ayemme.

⁸Ke eka amọ amaakedọọñ anye, anye abo “Nnọ iwuod Yọọn Aduọkmmọọñ mi ke usan.”

⁹Adidem amaafʌghọ, ado ke adikere mbaña mme enwọñọ anye amaakenwọñọ ke iso mme isenawo amọ, anye amaanọ uyo ate enọ ayịn awonwaan Erọdias se anye akebeeñe.

¹⁰Ndin adọñ ekekpịkke Yọọn iwuod ke ufọk ñkpakọb.

¹¹Emaeben iwuod ami ke usan ekenọ ayịn awonwaan ami; anye amaaben akenọ eka amọ.

¹²Mme mbed Yọọn emaediben akpo Yọọn ekebuuk, ndin efrọ ekedọkkọ Yisọs.

¹³Ke Yisọs amaakebọ etob ami, anye amaakpọñ, asaña ke ubom aka ndobo-ndobo itie anye akekemeke adiiba ke idem amọ ikpọọñ. Ado mme atu awo ekekop ami, ammọ ekpọñ mme abio, esaña ke ukod ekeene anye.

¹⁴Ke ntodo anye akesịm isọñ akịt umiañ atu awo, mbọm amaanam anye; anye anyʌñ akọk mme awo udọñọ.

¹⁵Ndubi akedi, mme mbed emaeka ekebo anye, “Ini udia ndubi ayaafrọ, ñkpọ ndidia ibaaha ke akpautatan ami; bo mme atu awo ami enyọñọ nọ ammọ ekeyem se ediidia edeeme ke abio.”

¹⁶Ado Yisọs abọọrọ ammọ ate, “Ufọn ammọ adinyọñọ ibaaha, ndufo ke idem ndufo inọ ammọ ñkpọ edia.”

¹⁷Mme mbed emaebọọrọ anye ete, “Ñnyịn inie uyo ition ye iyak iba kpọd.”

¹⁸Ndin anye amaabo, “Ikoono insọk.”

¹⁹Anye anọ uyo ate yak enam mbon awo ado etie ke mbiod, ndin anye akoono mme uyo ition ye iyak iba ado, abenne anyen ase anyọñ anyʌñ anọ ekọọm, ndin abuuñ mme uyo ami anọ mme mbed ate enọ mme atu awo.

²⁰Afịd ammọ emaeta naña ekeyeyem tutu ayʌkkọ ammọ. Mbeñe uyo ami se ekekoono ke akpatre amaayọhọ akpasa duob ye iba.

²¹Ñkpọ nte ikpọ ideen tọsịn ition ekeba usen ado, ke esioho afịd ibaan ye ntəkayịn efep.

²²Idaha-idaha ado Yisọs amaanam mme mbed edọñọ ubom ebem anye iso esañ ke edem mmọọñ uko, ke ini anye akenamma mme atu awo ado enyọñọ.

²³Ke Yisọs amaakenam mme atu awo enyọñọ, anye adika abod ke idem amọ ikpọọñ adibọñ akam. Anye akesʌk aba do ikpọọñ tutu ayo akịm,

²⁴ado ubom akeba ke ufọọd akpa ndin akpọsọñ afịm ye inua akpa emaedakka eda.

²⁵Ke ñkpọ nte ñkanika inaañ usieere, Yisọs amaawuọ asaña ke ibiok abịne mme mbed amọ.

²⁶Ke ini mme mbed ekịtte anye nte asaña ke ibiok ndịk amaamʌm ammọ. Ammọ ebọọñ eto ke ndịk ete, “Kap se ekpo!”

²⁷Ado idaha-idaha ado Yisọs amaada akood ke akpọsọñ uyo abo, “Isọñ esịd, ami ke ado, ikiifeghe ndịk.”

²⁸Ndin Bita abọọrọ anye ate, “Abọọñ, akpedo afo ke ado, bo ami nsaña ke anyọñ mmọọñ ndi.”

²⁹Yisọs abo anye, “Di.” Ndin Bita awuọ ke ubom anyʌñ atọọñọ isaña ke anyọñ mmọọñ mbịne Yisọs.

³⁰Ado anye akekịt afịm, ndịk anam anye, anye anyʌñ atọọñọ adideñ, ndin anye abọọñ ate, “Abọọñ, ñnyaaña miin.”

³¹Ndondo ado Yisọs asio ubọk amọ anyan anyʌñ amʌm anye, anyʌñ abo anye ate: “Afo awo etək mbuọdidem, Nso-o ikinam nọ afo anie eyịghe?”

³²Ammọ ekedọọk edʌk ubom, afịm amaatre.

³³Mme ideen se ikidọñọ ke ubom emaenyuuk iwuod ke iso amọ ke ukpono enyʌñ ebo, “Ke akpanikọ afo ado Ayịn Abasi.”

³⁴Ke ammọ emaekekaaña inyañ, ammọ emaesaña ediwuọọñọ isọñ ke Yenesaded.

³⁵Ke ini mme anie idʌñ emaekedidiọọñọ ke Yisọs ke ado, ammọ emaesuan etob amọ ke afịd ñkanñkʌk udo, enyʌñ ekoono afịd mbon e-ekedọñọke esọk anye,

³⁶ndin ekpeiye anye ete yak akap asʌk ayak mmimọ ituuk mben afọñ amọ. Ndin afịd awo e-eketuukọ mben afọñ amọ emaekop nsọñidem.