Read Ibibio Contemporary Bible 2020 Matiu 15 Bible Online

Matiu 15 - Ibibio Contemporary Bible 2020 bible

Matiu 15

¹Ndin mme Farisi ye mme akpeeb ibed eto Yerusedem edi ebịne Yisọs enyʌñ edibịp anye ete,

²“Nso-o ido ntak mbed mfo ebiadda edu unam ñkpọ ake esed? Ammọ isiyieghe ubọk ndin edia ñkpọ!”

³Yisọs abọọrọ ammọ ate, “Ntaha ndufo ebiadda ibed Abasi ke ntak edu unam ñkpọ ndufo-o?

⁴Sia Abasi abo ate, ‘Kpono usọ ye uka’; nko awo akeedodo asuuñọke ete ye eka amọ ana ewot anye.

⁵Ado ndufo ebo ke adieke awo abooho ete me eka amọ ate, ‘Se unwam afo akpekebọọhọ anto miin ado enọ a-mbenne nnọ Abasi,’

⁶anye inamma se akpena nte anam anọ ete me eka amọ. Ke ntom, ndufo enam ikọ Abasi akappa ado ikpu-ikpu ñkpọ ke ntak edu unam ñkpọ ndufo.

⁷Ndufo mbon mbubịk! Aisaya amaanen ke ini anye aketañña ami ibaña ndufo ate:

⁸“ ‘Mbon ami eñkpono miin ke ñkpọkinua ado esịd ammọ amaañkpọñ miin anyọọñ usʌñ.

⁹Ammọ eñkpono miin ke ikpu-ikpu usʌñ, ekeene ibed awo ke ukpeebñkpọ ammọ.’ ”

¹⁰Yisọs akood mme atu awo anyʌñ abo amọ ate, “Ikpañ utọñ nọ inwaña.

¹¹Se idʌk awo inua inamma awo adeghe, ado se iwuọ awo ke inua anam awo adeghe.”

¹²Ndin mme mbed edi ebịne anye enyʌñ edibịp anye ete, “Amediọọñọ ke mme Farisi emaekop idiọọkesịd ke ikọ afo aketañña do?”

¹³Anye abọọrọ ate, “Eto ake adodo ake Ete mmi ke anyọñ mmiikitọọhọ eyaewịppe ke adʌñ esio.

¹⁴Ikpọñ ammọ, ammọ edo mme nnan e-edatta nnan usʌñ. Adieke nnan adatta nnan usʌñ ammọ awo iba eyaeduọññọ edọñọ ube.”

¹⁵Ndin Bita ate, “Nam ñke ami inwaña ñnyịn.”

¹⁶Yisọs abọọrọ ate, “Inyʌññọ inwaña ndufo ñko?

¹⁷Nte ndufo ikanna ikịt ke se idʌk awo inua aboiyo adʌk idịb, ndin eka anye esio?

¹⁸Ado mme ñkpọ ewuọọhọ awo ke inua ato esịd, ndin ado ammọ ami enam awo ‘adeghe.’

¹⁹Sia afịd ndiọi uduak ato esịd awo: uwod awo, efịbe, use, inọ, utie ntiense nsu, usappa, adidọk.

²⁰Mme ñkpọ ami enam awo adeghe. Ado adidia ñkpọ ke mbad ubọk inamma awo ‘adeghe.’ ”

²¹Yisọs amaakpọñ ndo aka ke ñkanñkʌk Taya ye Sidọn.

²²Ndin ke ebe ado awonwaan Kenan keed ke efaak ado atọọñọ adibọñ ñkpọ abo ate, “Abọọñ Ayịn Defid, ntua miin mbọm. Dimọn atʌkkọ ayịn awonwaan mmi.”

²³Ado anye ibọọrọke anye ikọ ndomokeed. Ndin mme mbed amọ ekekpe anye ubọk ete, “Nam nọ anye adakka, sia anye ibọọñ ñnyịn abọhọ.”

²⁴Anye abọọrọ ate, “Ekendọñ utom enọ edọñ ufọk Isred e-emaekesop kpọd.”

²⁵Ado awonwaan ado amaasaña adisịm anye anyʌñ atọọñọ edọñ ke iso amọ, ate, “Abọọñ, ñnyaaña miin.”

²⁶Anye abọọrọ ate, “Ifọnnọ adiben ndidia ntəkayịn ntop nnọ mme ewa.”

²⁷Ado anye asọsọp abọọrọ ate, “Ih, Abọọñ, ado idem mme ewa esitañ mbeñe e-eduọññọke eto akpokoro eteufọk ammọ.”

²⁸Ndin Yisọs abọọrọ anye ate, “Mma, amenie ekamba mbuọdidem. Eyaak se afo abeeñe unọ.” Ndin kpa ke ebe ado idem amaamaana asọñ ayịn amọ.

²⁹Yisọs ato do aka akesịm mben akpa mmọọñ Kadidi, ndin anye adọọk anyọñ abod akesuuk atie.

³⁰Ndin mme uwak atu awo edibịne anye, eben mme mbʌñọ, mme nnan, mme imuum ye uwak mbon udọñọ mfen ebịne anye, ediyaak ebon anye ke iso, ndin anye anyʌñ akọk ammọ udọñọ.

³¹Idem amaakpa atu awo adikịt naña mme imuum etañ ikọ, mme mbʌñọ esaña isañ, mme nnan enyʌñ ekịt usʌñ, ndin ammọ emaetooro Abasi Isred.

³²Ndin Yisọs akood mme mbed amọ anyʌñ abo ammọ ate, “Mme mbon ami ennie udʌk; ammọ eba ye ami usen ita idahami idiaaha ñkpọ. Nnyemme adibo ammọ enyọñ abiọñ, mbaak edisʌkkọ ke usʌñ.”

³³Mme mbed amọ ebọọrọ ete, “Mmọ-ọ ke ñnyịn idiikịt uyo ke utọ ntotəño itie ntom nọ akem utọ atu awo ami?”

³⁴Yisọs abịp ammọ ate, “Ndufo enie uyo ifañ?” Ammọ ebọọrọ, “Itiaba, ye ibad-ibad ñkeñe iyak.”

³⁵Anye amaabo atu awo ate esuuk etie ke isọñ.

³⁶Ndin anye aben uyo itiaba ye iyak ado, ke anye amaakenọ Abasi ekọm, amʌm abuuñ, anyʌñ akappa anọ mme mbed amọ, ndin ammọ edeeme enọ atu awo.

³⁷Afịd ammọ edia enyʌñ eyʌkkọ. Ke emaekedia ima, mme mbed emaekoono mbeñe se ikisʌhọ eyọhọ akpasa itiaba.

³⁸Ibad mbon e-ekediaaha ñkpọ ado akedo tọsịn inaañ, ke esioho ibaan ye ntəkayịn efep.

³⁹Ke ini Yisọs amaakesio mme atu awo unyọñ, anye amaadakka adʌk ubom aka ñkanñkʌk Makadan.