Read Ibibio Contemporary Bible 2020 Matiu 16 Bible Online

Matiu 16 - Ibibio Contemporary Bible 2020 bible

Matiu 16

¹Mme Farisi ye mme Sadusi emaedi adidomo Yisọs ke adibo anye yak iwọt mmimọ idiọọñọ atooho anyọñ.

²Yisọs amaabọọrọ, “Ndubi ndufo esibo, ‘ikpaanyọñ ayaiya, usen ayaafọn’

³ndin ke ubakusen ndufo ebo, ‘ikpaanyọñ adat anyʌñ afʌhọ, ayobio ayaaba mfịn.’ Ndufo emediọọñọ ebaña idiọọñọ ikpaanyọñ, ado idiọọñọke adikood idiọọñọ ini ami.

⁴Ado ndiọi mme ntịme emana esibịp idiọọñọ, ado ukweeñe idiọọñọ e-ediinọ ndufo ado idiọọñọ Yọna.” Ndin anye amaakpọñ ammọ aboiyo anyọñ.

⁵Mme mbed Yisọs, ke ammọ adikanna ñka edem ibiok uko, emaefre adiben uyo.

⁶Yisọs abo ammọ, “Itaad anyen, inyʌñ ikpeme idem ndufo mbaak yis ake mme Farisi ye mme Sadusi.”

⁷Ammọ eneme ke ufọọd ammọ ebo, “Ato adooho ñnyịn ikibenne uyo nte keed.”

⁸Yisọs akediọọñọ se ammọ ekere, anye abo ammọ, “Ndufo mbon ntək mbuọdidem, ntaha etañña ke atu ndufo ebo ke ikamake uyo-o?

⁹Isʌkkọ inwaanwaña ndufo? Ndufo itoiyoke uyo ition e-ekenọọhọ tọsịn awo ition ye ibad akpasa se ndufo ekekoono?

¹⁰Me uyo itiaba e-ekenọọhọ tọsịn awo inaañ ye ibad akpasa se ndufo ekekoono?

¹¹Anam die nọ idiiñwañake ndufo ke ñketañña mbaña uyo? Ado ikpeme idem ndufo ke abaña yis mme Farisi ye Sadusi.”

¹²Do ndin amaanwaña ammọ ke anye akebo ammọ ekpeme idem ebaña ukpeebñkpọ mme Farisi, idooho yis asinamma uyo atịt.

¹³Ke ini Yisọs amaakedi utịd Siseria Fidibai, anye amaabịp mme mbed amọ mbịme ami: “Anie ke mme awo ebo ke Ayịn Awo ado?”

¹⁴Ndin ammọ ebọọrọ, “Ubaak ebo Yọọn Aduọkmmọọñ, ubaak ebo Edaiya, ubaak ete Yerimaya, me keed ke atu mme brọfed.”

¹⁵Ndin anye abịp ammọ ate, “Ado ndufo ebo ke ami ndo anie?”

¹⁶Ndin Saimọn Bita asio atañ, “Afo ado Krais, Ayịn ndu-ndu Abasi.”

¹⁷Yisọs amaabọọrọ, “Saimọn ayịn Yọna, afo ado awo e-emaedọdiọñ sia ikidooho abʌk mme iyiib akeyaara ami unọ, ado aketo Ete mmi ke anyọñ.

¹⁸Ke ntodo, idahami ami udọkkọ fiin nte afo ado Bita, ndin ke anyọñ itiad ami, ami nyaabọp ufọkabasi mmi, ndin inuaatob Abioekpo idiikanna anye.

¹⁹Ami ñyaunọ fiin mme ukpọhọde abio ubọọñ Abasi: se adodo afo abọppọ ke isọñ, eyaebọp ke abio ubọọñ, ñko se afo atat ke isọñ eyaetat ke abio ubọọñ.”

²⁰Ndin anye amaakpan mme mbed amọ ate ekuudọkkọ awo ndomokeed ke imọ ido Krais.

²¹Tọọñọ ke ini ado Yisọs amaakaiso atañ añwa-añwa anọ mme mbed amọ ke imọ ana ika Yerusedem ikibọ ata akpọsọñ ufen ke ubọk mme ñkpisọñ, mme ikpọ aku ye mme Skraib, ke ana ewot imọ, ndin enam imọ iset ke ayọhọ usen ita.

²²Ndin Bita akood anye asio anyʌñ atọọñọ adisua nnọ anye ate, “Abasi akan, Abọọñ! Inaaha ami atịppe unọ fiin.”

²³Ado anye amaakanna anyʌñ abo Bita, “Ndakka ke idem, Setan! Afo ado ñkpọiduọ ke usʌñ mmi, sia afo ukereke ñkpọ Abasi, ado akere ñkpọ awo.”

²⁴Ndin Yisọs abo mme mbed amọ, “Adieke awo nte keed ayemme iñkeene miin yak anye akañ idem amọ, aben krọs amọ anyʌñ añkeene miin.

²⁵Awo a-ayemme adinyaaña uwem amọ ayaaduọk anye. Ado awo a-aduọọkkọ uwem amọ ke ntak mmi, ayaakịt anye.

²⁶Nso-o ndin idiido udoro awo adinie afịd ederimbod ado aduọk ukpọñ amọ? Me nso-o ke awo akemme adinọ nte ukpʌghọ ñkpọ ke ukpọñ amọ?

²⁷Sia Ayịn Awo adidi ke ubọọñ Ete amọ ye mme enyere amọ, do ndin anye ayaanọ awo keed-e-keed utịb a-akemme ye se anye anam.

²⁸“Ke akpanikọ ke idọkkọ ndufo, aba ubaak awo e-ebaaha a-mmiidiikitte ñkpa tutu ammọ ekịt Ayịn Awo nte adi ke abio ubọọñ amọ.”