Read Ibibio Contemporary Bible 2020 Matiu 17 Bible Online

Matiu 17 - Ibibio Contemporary Bible 2020 bible

Matiu 17

¹Usen itiokeed amaakeboiyo, Yisọs amaadat Bita, Yemsi, ye Yọọn, ayịneka Yemsi akedọọk anyan abod keed enyʌñ eba do ke idem ammọ ikpọọñ.

²Do ke uduod amọ akekpəho. Iso amọ akediyayamma nte utịn, afọñ amọ adifia nte unwana.

³Ndin ete ise, Moses mme Edaiya ewuọọñọ eda, ammọ eneme nneme mme Yisọs.

⁴Ndin Bita abo Yisọs ate, “Abọọñ, afọn ñnyịn adiba mi. Adieke afo amaaha nyaabọp atayad ita, keed ake mfo, keed ake Moses, keed ake Edaiya.”

⁵Ke ini anye asʌkkọ atañ ntom, nyamma-nyamma ntọñanyọñ adifʌk ammọ akanna; ndin uyo ato ntọñanyọñ ami ate, “Anye ami ado Ayịn mmi a-mmaaha, nnyʌñ nnem esịd ye anye. Ikpañ utọñ inọ anye.”

⁶Ke ini mbed amọ ekoppo ami, ammọ emaeduọọñọ ke isọñ efʌk iso ammọ ke ndịk.

⁷Ado Yisọs adituuk ammọ ate, “Idakka ida, ikiinyek idem.”

⁸Ke ini ammọ ebenneke iso ammọ, ikikịtte awo ndomokeed aba, ibọhọke Yisọs.

⁹Naña ammọ esʌkkọ esọiyọ abod ado, Yisọs adʌt ammọ utọñ ate, “Ikiitañ se ekịt inọ awo ndomokeed tutu enam nọ Ayịn Awo aset ke ñkpa.”

¹⁰Ndin mbed ebịp anye, “Ntak a-mme andikpeeb mbed ebooho ke ana Edaiya abem iso adi-e?”

¹¹Anye abọọrọ, “Ke akpanikọ, Edaiya asʌk adi adituum afịd ñkpọ mboon naña akesido.

¹²Ado ami idọkkọ ndufo, Edaiya adidi, ado ammọ ikidiọọñọke anye, ndin etịmme enam anye se ammọ ema. Kpa ukem usʌñ ami ke Ayịn Awo adibọ ufen ke ubọk ammọ.”

¹³Ke ini ado mbed amọ ekekere ke anye aketañ ikọ ami anọ ammọ abaña Yọọn Aduọkmmọọñ.

¹⁴Ke ini ammọ edisịmme atu awo, awo keed amaasaña akpere Yisọs anyʌñ atọọñọ edọñ ke iso amọ ate.

¹⁵Anye abo, “Abọọñ, tua ayịn mmi mbọm, anye ado ndukpi anyʌñ abọ ufen eti-eti. Anye asiduọ adʌk ikañ ye mmọọñ.

¹⁶Mmaaben anye nsọk mbed mfo ado ammọ ikikanna ikọk anye.”

¹⁷Yisọs abọọrọ ate, “Ndufo mbon unana mbuọdidem ye ñkwaña uwem emana anye ami, ndiiba ye ndufo ñkpeene die? Ben ayịn ado nsọk.”

¹⁸Yisọs amaawuuk dimọn ado ndin dimọn amaawuọ ayịn ke idem, idem anyʌñ asọñ anye tọọñọ ke ebe ado.

¹⁹Akem mbed edibịne Yisọs ndịbe-ndịbe enyʌñ ebịp anye ete, “Ntak a-ñnyịn mmiikikemeke adibịn ado nsio-o?”

²⁰Anye abọọrọ, “Sia mbuọdidem ndufo ado ata etək-etək. Ntañ akpanikọ inọ ndufo, ekpenie mbuọdidem akpesʌkkọ asịp nte ñkpasi mọstad, emekeme ibo abod ami, ‘Dakka ke itie ami kaa ko, ndin anye ayaadakka.’ Ñkpọ ndomokeed idiikanna ndufo.

²¹Ado ekeme adibịn dimọn anye ami ke akam ye utreudia.”

²²Ammọ emaekedisịm Kadidi, Yisọs abo, “Eyaetap Ayịn Awo esịn ke ubọk mme awo.

²³Ammọ eyaewot anye, ndin ke ayọhọ usen ita eyaenam anye aset ke ñkpa.” Ndin mbed amọ emaefʌhọ eti-eti.

²⁴Yisọs ye mbed amọ emaekedisịm Kapanọm, mme abọ taksi tembịd a-akedooho drasma iba, edibịp Bita, “Eteufọk ndufo isikpeeghe taksi tembịd?”

²⁵Anye abọọrọ, “Asikpe.” Ke ini Bita adʌkkọ ufọk, Yisọs akedo akpa awo aditañ ikọ. Anye abo, “Saimọn nsido akikere mfo? Mme ndidem ederimbod ebọ isob ye taksi eto mmọ-ọ: me ebọ eto mme amanaisọñ me ebọ eto mbon mfen?”

²⁶Bita abọọrọ, “Mbon mfen.” Yisọs abo anye, “Ndin esio mme amanaisọñ efep.

²⁷Ado mbaak ñnyịn ididue ammọ, ka ibiok ako, ke top uwaam sịn. Ben akpa iyak a-afo uduumʌm, tat anye inua, ndin ayaakịt drasma inaañ. Ben anye sọk ammọ ke taksi mmi ye ake mfo.”