Read Ibibio Contemporary Bible 2020 Matiu 18 Bible Online

Matiu 18 - Ibibio Contemporary Bible 2020 bible

Matiu 18

¹Ke ini ado mme mbed Yisọs emaedibịne anye enyʌñ edibịp, “Anie ido andikpon ñkan ke abio ubọọñ Abasi?”

²Yisọs amaakood etəkayịn anyʌñ anam anye adida ke ufọọd ammọ.

³Ndin anye abo ammọ, “Ñtañ akpanikọ inọ ndufo, ibọhọke ndufo ekpəhọ enyʌñ ekappa eba nte ntək nditọ, ndufo idiidʌkkọ abio ubọọñ Abasi.

⁴Ke ntodo, awo ake adodo a-asuuhọke idem amọ nte etəkayịn ami, anye ado andikpon ñkan ke abio ubọọñ Abasi.

⁵Awo a-adaarake etəkayịn keed ntom ke ntak anyịñ mmi, andaara miin.

⁶“Ado awo a-adooho ñkpọiduọ anọ keed ke atu mme etəkayịn ami e-ebuọttọ idem ye ami anam idiọọkñkpọ, akpaafọn ekọọñ anye ekamba itiad ke itọñ enyʌñ enam anye adeñ ke ntotəño akpa mmọọñ.

⁷Adọdiọọk anọ ederimbod ke ntak mme ñkpọ a-anamma mme awo enam idiọọk ñkpọ. Ñkpọ ntodo ana atịppe, ado adọdiọọk anọ awo a-anamma ñkpọ ntodo atịppe.

⁸Ubọk mfo me ukod mfo akpenam nọ afo anam idiọọk ñkpọ, kpịkke anye sio nnyʌñ top duọọk; sia afọn afo adinie uwem nsi-nsi nte mbʌñọ, ñkan adisaña ye ubọk iba me ukod iba ñkedʌk ikañ nsi-nsi.

⁹Ñko anyen mfo akpebo ido ñkpọiduọ mfo, kappa anye sio nnyʌñ top duọọk, sia afọn afo adinie uwem nsi-nsi ye anyen keed ñkan adinie anyen iba ñkedʌk ke ikañ nsi-nsi.

¹⁰“Ikpeme mbaak ndufo idisappa keed ke atu ntəkayịn ami. Ami idọkkọ ndufo ke mme enyere ammọ esʌk ekaka iso eba ke iso Ete mmi ke anyọñ.

¹¹Sia Ayịn Awo akedi adinyaaña se ikisop.

¹²“Ekere die, adieke awo anieeghe edọñ ikie, ndin keed ke atu ammọ asop usʌñ, nte anye idiikpọññọ anaañ ye usʌkkeed ado ke abod ika ikiyem keed andikisop?

¹³Ke akpanikọ idọkkọ ndufo, adieke anye akịtte edọñ keed ado, anye ayaanem esịd abaña anye ado akan anaañ ye duob ye usʌkkeed ako e-emmiikisoppo.

¹⁴Ukem-ukem ado, idooho uduak Ete ndufo ke anyọñ nte keed ke atu ntəkayịn ami ekpesop usʌñ.

¹⁵“Adieke ayịnuka awodeen me awonwaan unamma fiin idiọọkñkpọ, kaa keneme ye anye ikpọọñ, ke ufọọd ndufo awo iba. Anye akpekop se atañ, afo amemaana adat ayịnuka anie.

¹⁶Adieke ammọ mmiikoppo unọ, dat awo keed me iba saña, nọ ato do ‘afịd ikọ anaasọọñọ ada ke inua ntiense awo iba me ita.’

¹⁷Ado anye akpesịn adikop nnọ ammọ, ke tọt nọ ufọkabasi, ñko adieke anye asịnne adikop se abio etañ, dat anye nte yentaid me abọ taski.

¹⁸“Ke akpanikọ ke idọkkọ ndufo, se adodo ake ndufo ebọppọ ke isọñ, eyaebọp ke anyọñ, se adodo ndufo etatta ke isọñ, eyaetat ke anyọñ.

¹⁹“Ke akpanikọ ke mmaana idọkkọ ndufo, adieke awo iba ke atu ndufo ke isọñ enyịmmeke adibeeñe ñkpọ akeedodo, Ete ndufo ke anyọñ ayaainọ ndufo.

²⁰Sia itie awo iba me ita ebohoke ke anyịñ mmi, ami mmọdo mba ke atu ammọ.”

²¹Ndin Bita amaabịne Yisọs akebo, “Abọọñ, akañ ifañ ke ami nnie adifeen nnọ ayịneka mmi awodeen me awonwaan adieke anye andueeghe? Me ñkpọ nte akañ itiaba?”

²²Yisọs amaabọọrọ anye ate, “Ami ubo fiin idooho akañ itiaba, ado akañ ata ye duob ye itiaba.

²³“Ke ntodo, abio ubọọñ Abasi atie nte adidem a-akenamma ibad akʌk amọ ye nditọufọk amọ.

²⁴Ini unam ibad amaakedisịm, ammọ emaeben awo a-akekamake tọsịn taden duob edi.

²⁵Anye ikinieeghe usʌñ adikpe isʌñ ami. Ke ntodo, eteufọk amọ amaanọ uyo ate enyam anye ye anwaan ye nditọ ye afịd inie amọ, nọ eben ekpe isʌñ ami.

²⁶“Ke ayịnufọk ami akoppo ami, anye amaaduọ ke iso eteufọk, akpeiye, abo ‘Nie ime ye ami, ke ñyaukpe afịd akʌk ami.’

²⁷Ndin eteufọk amọ amaatua anye mbọm, akpịkke isʌñ amọ asio, anyʌñ ayak anye anyọñ.

²⁸“Ado ke ini ayịnufọk ami anyọññọ, anye amaadibommo ayịnufọk mfen a-akekamake anye taden ikie anyʌñ amʌm anye itọñ, atọọñọ adifʌt anye itọñ, anyʌñ abo anye ate, ‘Ñkpe se afo añkama.’

²⁹“Ayịnufọk ami amaaduọ anye ke ukod anyʌñ akpeiye anye abo: ‘Nie ime ye ami ke ñyaukpe.’

³⁰“Ado anye ikinyịmmeke. Utu ke ado, anam esịn anye ke ufọk ñkpakọb tutu anye akpe isʌñ ado.

³¹Mme nditọufọk mbon ako emaenekke efʌghọ ke idaha ammọ ekịtte se ikitịppe, ndin ammọ emaeka ekedọkkọ eteufọk ammọ afịd ñkpọ ami.

³²“Ndin eteufọk amaadọñ abo ekood awo ami adi, anyʌñ adibo anye, ‘Afo ibak ayịnufọk, ami mmaadooro afịd isʌñ mfo nsio ke idaha afo akeñkpeiyeke miin.

³³Nte afo ñko ukpunieeghe mbọm ubaña ayịnufọk mfen nte ami ñkenieeghe mbọm ubaña fiin?’

³⁴Ke iyadesịd, eteufọk amaakappa anye anọ mme anọ awo ufen, tutu anye akpe afịd isʌñ amọ.

³⁵“Ntom ke Ete mmi ke anyọñ adinam ye ndufo, ibọhọke ndufo efeen enọ ayịneka ndufo ke afịd esịd ndufo.”