Read Ibibio Contemporary Bible 2020 Matiu 19 Bible Online

Matiu 19 - Ibibio Contemporary Bible 2020 bible

Matiu 19

¹Ke ini Yisọs amaaketañ mme ikọ ami ima, anye amaakpọñ Kadidi aka ke efaak Yudia ke edem Yọdan edem uko.

²Mme uwak atu awo emaekeene anye, ndin anye amaakọk ammọ udọñọ do.

³Mme Farisi ifañ emaebịne anye adidomo anye. Ammọ ebịp ete, “Nte ado nnen-nnen ñkpọ awodeen adisio anwaan amọ ndọ ke ntak ake adodo?”

⁴Anye amaabọọrọ ate, “Ndufo ikikoodo ite ke aditọọñọ Andibod ‘akebot ammọ awodeen ye awonwaan,’

⁵anyʌñ abo ate, ‘ke ntak ami, awodeen ayaakpọñ ete ye eka amọ anyʌñ akediana ye anwaan amọ, ndin ammọ awo iba eyaekappa abʌk keed?

⁶Anam ammọ idooho iba aba, ado edo abʌk keed.’ Anam se Abasi amaakedian, yak awo akuudiaaña.”

⁷Ammọ emaana ebịp ete, “Ntaha a-Moses akebooho yak awo anọ anwaan amọ ñwed uwuọọñọ ndọ anyʌñ abịne anye?”

⁸Yisọs abọọrọ ammọ ate, “Moses akeyaak ndufo esioño ibaan ndufo ndọ ato ntak isọñesịd ndufo. Ado ikidooho ntodo ke aditọọñọ.

⁹Ami ibo ndufo ke awo ake adodo a-asiooho anwaan amọ ndọ, ibọhọke ke ntak efịbe, anyʌñ adọ awonwaan mfen, asịn efịbe.”

¹⁰Mme mbed ebo anye, “Akpedo ñkpọ anwaan ye ebe aba ntom, afọn adiba udọọhọ ndo.”

¹¹Yisọs abọọrọ ate, “Idooho afịd awo ekeme adinyịmme se ñkpeeb ami, ibọhọke mbon a-Abasi amaakenọ ukeme adinyịmme.

¹²Sia ubaak awo edo itọ sia ammọ ekemana ntodo, ubaak ado mme awo enam ammọ ekakpa itọ; ndin ubaak awo etre udọ ndọ ke ntak abio ubọọñ Abasi. Awo ake akan anyịmme ñkpọ ami yak anyịmme.”

¹³Ndin emaeben ntəkayịn esọk Yisọs nọ anye adot ammọ ubọk ke iwuod anyʌñ abọñ akam anọ ammọ. Ado mme mbed emaekpan mbon e-ekebenne ammọ edi.

¹⁴Yisọs amaabo ate, “Yak ntəkayịn eñkeene miin, ke awo akpan ammọ, sia abio ubọọñ Abasi anie utọ mbon ami.”

¹⁵Ke ini anye amaakedot ammọ ubọk ama, anye amaakpọñ do aka itie mfen.

¹⁶Akem awo keed asaña abịne akebịp anye ate, “Andikpeeb, nso-o eti ñkpọ ke ñkpenam nọ nnie uwem nsi-nsi?”

¹⁷Yisọs abọọrọ ate, “Ntaaha afo ambịppe miin abaña se ifọn-ọ? Awo keed kpọd aba a-afọnnọ. Adieke afo ayemme uwem nsi-nsi, nịm ibed Abasi.”

¹⁸Awo ado amaabịp anye ate, “Mme ake ibed?” Yisọs amaabọọrọ ate, “Kuuwot awo, kuusịn efịbe, kuuyịp inọ, kuutie ntiense nsu,

¹⁹kpono usọ ye uka, nyʌñ ma mbọhọidʌñ mfo nte idem mfo.”

²⁰Akparawa ado amaabọọrọ ate, “Mmenịm afịd mme ibed ami. Nso-o mfen isʌghọ?”

²¹Yisọs abọọrọ anye ate, “Akpedo ameyem adifọn mmaa, kaa kenyam inie mfo nyʌñ kpọñ akʌk nọ mme uwueene, ndin afo ayaanie inie uto ke abio ubọọñ Abasi. Ndin di ñkene miin.”

²²Ke ini akparawa ami amaakekop ñkpọ ami anye amaadakka anyọñ ke mfʌghọ, sia anye amaanie ñkpọ eti-eti.

²³Ndin Yisọs abo mme mbed amọ ate, “Ntañ akpanikọ inọ ndufo, ayaasọñ anie ñkpọ awo adidʌk abio ubọọñ Abasi.

²⁴Mme maana ntañ inọ ndufo nte ke ado mmem-mmem ñkpọ enañ mbiomo adiboiyo ke adudu abiawuen ñkan anie ñkpọ awo adidʌk abio ubọọñ Abasi.”

²⁵Ke ini mme mbed emaekekop ami, idem amaakpa ammọ, anam ammọ emaebịp anye ete, “Anie awo ndin idiibọkkọ?”

²⁶Yisọs amaabenne anyen ase ammọ anyʌñ abo ate, “Ñkpọ ami asọñ ye awo, ado ye Abasi afịd ñkpọ ado mmem-mmem.”

²⁷Bita abọọrọ anye ate, “Ñnyịn imikpọñ afịd ñkpọ inyʌñ ukeene fiin! Nso-o idiiba inọ ñnyịn?”

²⁸Yisọs abo ammọ ate, “Ntañ akpanikọ inọ ndufo, ke ini afịd ñkpọ adikappa ufa, ke ini Ayịn Awo aditie ke ebekpo ubọọñ amọ, ndufo e-ñkeeneke miin eyaetie ke ebekpo duob ye iba adibiire ikpe nnọ mme idịd Isred duob ye iba.

²⁹Ndin afịd awo e-emaekekpọñ mme ufọk, ye nditọeka ideen ye nditọeka ibaan, ye ete, ye eka ye nditọ ye ikọd inwañ ke ntak mmi eyaebọ utịb akañ ikie enyʌñ enie uwem nsi-nsi.

³⁰Ado uwak awo e-eboiyoke iso, eyaekpe edem, ndin uwak e-ekpeghe edem, eyaeboiyo iso.”