Read Ibibio Contemporary Bible 2020 Matiu 20 Bible Online

Matiu 20 - Ibibio Contemporary Bible 2020 bible

Matiu 20

¹“Abio ubọọñ Abasi aba nte anie inwañ akewuọọhọ ubakusen akedat mbon utom nọ edinam utom ke inwañ fain amọ.

²Anye amaanyịmme ikpe mbon utom ado denarius keed ke usen anyʌñ anọ ammọ eka inwañ fain amọ.

³“Anye amaamaana awuọ ñkpọ nte awa ita amaakeboiyo anyʌñ akekịt mbon utom mfen naña eda ke itie udua, inamma ñkpọ ndomokeed.

⁴Ndin anye abo ammọ ate, ‘Ndufo ñko ikeene ika inwañ fain mmi ikinam utom, ndin nyaikpe ndufo akʌk se inen.’

⁵Ammọ enyʌñ eka. “Ke ñkpọ nte awa itiokeed ye ñkpọ nte awa usʌkkeed amaakeboiyo, anye anyʌñ anam ukem-ukem ñkpọ ado.

⁶Ñko ke ayọhọ awa duob ye keed anye amaawuọ anyʌñ akekịt mbon mfen nte eda, ndin anye abịp ammọ ate, ‘Nsido ndufo eda mi inamma ñkpọ nte keed?’

⁷“Ammọ emaebọọrọ ete, ‘Sia awo ndomokeed ikpeeghe ñnyịn utom.’ “Anye abo ammọ ate, ‘Ndufo ika ke inwañ utom mmi ñko.’

⁸“Ke ndubi, anie inwañ fain amaabo akamautom amọ ate, ‘Kood mme anam utom nyʌñ kpe ammọ akʌk ammọ, tọọñọ ke mbon e-ekedieeghe akpatre nnyʌñ kesịm mbon e-ekedieeghe akpa.

⁹“Ke ntodo, mbon e-ekedieeghe utom ke ayọhọ awa duob ye keed emaewuọ adibọ denarius keed-e-keed.

¹⁰Ke ini mbon e-eketooho edi utom emaekedi ammọ emaekere edibọ ñkan ado, ado ammọ ñko enyʌñ ebọ ukem denarius keed-e-keed.

¹¹Ke ammọ emaekebọ, ammọ emaedukuunọ ye anie inwañ ete,

¹²‘mbon e-ekedieeghe edem enam utom awa keed kpọd ndin afo akpe ammọ ukem-ukem naña ikpe ñnyịn, akpesʌk ado ñnyịn ima inam utom afịd usen keed ke idak ufiob usen ado.’

¹³“Anye amaabọọrọ keed ke atu ammọ, ate, ‘Ufan mmi, ami utʌkkọ fiin; nte ñnyịn ikinyịmmeke denarius keed ke usen?

¹⁴Ben akʌk mfo nyọñ. Ami nnyʌñ mma adikpe akpatre awo naña ukpe fiin.

¹⁵Nte ami nnieeghe unen adinam se mma ye akʌk mmi? Ntaha afo akpediọọkko esịd sia mmefọn ido-o?’

¹⁶“Ke ntodo, akpatre awo ayaakappa ado akpa, ndin akpa ayaanyʌñ akakpa ado akpatre.”

¹⁷Yisọs akeka Yerusedem, ndin ke usʌñ anye akood mme mbed duob ye iba amọ asio anyʌñ abo ammọ ate,

¹⁸“Sese, ñnyịn ika Yerusedem, ndin eyaeyaak Ayịn Awo esịn ke ubọk mme ikpọ aku ye mme awedñwed. Ammọ eyaebiire ikpe ñkpa enọ anye.

¹⁹Eyaenyʌñ eyaak anye esịn ke ubọk mme Yentaid nọ eduọi anye, emia anye enyʌñ ekọñ anye ke eto ndin ke ayọhọ usen ita anye ayaaset ke ñkpa.”

²⁰Akem eka nditọ Sebidi amaadi ye nditọ amọ adinịm anye ebeeñe ke iso, ke ntọọñọ edọñ.

²¹Ndin anye abo anye ate, “Nso-o ke ayem?” Anye abo anye ate, “Ñwọñọ bo ke nditọ mmi iba ami eyautie fiin ke nnasia ye ke ufiin ke abio ubọọñ mfo.”

²²Yisọs abọọrọ ate, “Ndufo idiọọñọke se ebeeñe. Ndufo emekeme adinwọñ kọọb se ami mbo nwọñ?” Ammọ ebọọrọ ete, “Imikeme.”

²³Anye abo ammọ ate, “Afọn, eyaenwọñ kọọb mmi, ado amaado itie ke ubọk nnasia me ubọk ufiin mmi, idooho ami nnie adinọ, ado mbon e-Ete mmi akebeeñeke anịm anọ enie.”

²⁴Ke ini mme mbed duob ako emaekekop ñkpọ ami, ammọ emaeyat esịd eti-eti ye nditọeka iba ami.

²⁵Ado Yisọs amaakood ammọ abo ate, “Ndufo emediọọñọ ebo ke atu mme Yentaid mme adaiwuod ekakara ammọ, ndin mme ñkpọsọñ ye mme enie adudu enam nọ ekịt adudu ammọ.

²⁶Inaaha utọ ñkpọ ami atịppe ke atu ndufo. Iyo-o; ado awo a-ayemme adikpon ke atu ndufo ana ado ayịnufọk ndufo,

²⁷ndin awo a-anyʌññọ ayem adido akpa ke atu ndufo ana ado ifʌn ndufo,

²⁸kpa naña nte Ayịn Awo akedieeghe adinam ñkpọ nnọ awo, idooho nọ enam ñkpọ enọ anye, adinyʌñ mben uwem amọ mfak uwak awo.”

²⁹Nte Yisọs ye mbed amọ ekpọññọ Yeriko, ekamba atu awo emaekeene anye.

³⁰Ndin nnan iba emaetie ke mben usʌñ. Ammọ ekekop ke Yisọs aboiyo, ammọ ebọọñ, “Abọọñ! Ayịn Defid, tua ñnyịn mbọm.”

³¹Ndin mme atu awo emaesua enọ ammọ, ebo yak ammọ ekʌp inua, ado ammọ enenekke ebọọñ, “Abọọñ! Ayịn Defid, tua ñnyịn mbọm.”

³²Yisọs atuak ada, akood ammọ anyʌñ abo ate, “Nso-o ke eyem nnam inọ ndufo?”

³³Ammọ ebo anye ete, “Abọọñ, nam ñnyịn imaana ikịt ñkpọ.”

³⁴Yisọs atua ammọ mbọm anyʌñ atuuk ammọ anyen, ndin ammọ emaana ekịt ñkpọ kpa idahado, enyʌñ edaka ekeene anye.