Read Ibibio Contemporary Bible 2020 Matiu 21 Bible Online

Matiu 21 - Ibibio Contemporary Bible 2020 bible

Matiu 21

¹Naña ammọ esʌkkọ ekpere Yerusedem, enyʌñọ ekedisịm Betfas ke Abod Ọdif, Yisọs amaadọñ mbed amọ iba,

²ate, “Ikaa idʌñ a-adaaha ndufo ke iso ko. Emaedʌk, eyaekịt dọñki e-eyịtte ke idʌk do ye ñnyịn amọ. Itat ammọ idat insọk.

³Adieke awo ndomokeed asiooho uyo, bo anye ke Abọọñ ayem ammọ ndin anye ayaanọ ammọ edi ini keed.”

⁴Aketịppe ntom nọ brọfesi ami asu:

⁵“Dọkkọ ayịn awonwaan Sayọn ate, ‘Sese, adidem mfo asʌk adi ubịne, awo nsuukidem, awat ke dọñki ye ñnyịn dọñki.’ ”

⁶Mbed emaekenam naña Yisọs aketemme Ammọ.

⁷Ammọ emaedat dọñki ado ye ñnyịn edi enyʌñ ebiid afọñ ufʌhọ ammọ, ndin Yisọs adọọk atie do.

⁸Ekandịk atu awo emaebiid afọñ atueb ammọ ke akpọusʌñ ke ini usʌk awo ekekpikkeke ñkọk eto ebiid ke usʌñ.

⁹Mme atu awo se ikiboiyo ke iso enyʌñ ekeene anye ke edem emaebọọñ ñkpọ ete: “Osana anie Ayịn Defid!” “Emaediọñ anye a-adieeghe ke anyịñ Abọọñ!” “Osana ke ata ikpa añyọñ.”

¹⁰Ke ini Yisọs amaadʌk Yerusedem, afịd abio ado amaakpəkko. Mme awo emaebịp ete, “Anie awo ido ami?”

¹¹Mme atu awo ami emaebọọrọ ete, “Ami do Yisọs, brọfed a-atooho Nasared ke Kadidi.”

¹²Yisọs amaadʌk afe tembịd akebịn mme awo e-ekedeppe-dep enyʌñ enyaa-nyaam ñkpọ do asiooño. Anye amaanyʌñ akanna mme akpokoro mme akpəgho akʌk ye mme ñkpọitie mme anyam tọm-tọm aduọọñọ.

¹³Anye amaabo ammọ, “Ewet ebo, ‘Ediikood ufọk mmi ufọk akam,’ ado ndufo edidat anye enam ‘itie ñwo.’ ”

¹⁴Akem mme nnan ye mme mbʌñọ edibịne anye ke tembịd, anye anyʌñ akọk ammọ udọñọ.

¹⁵Ado ke ini mme ikpọ aku ye mme andikpeeb ibed ekịtte mme utịbe ñkpọ a-anye akenamma ye naña ntəkayịn esʌk ebọọñ ke afe tembịd, “Osana anie Ayịn Defid,” esịd amaadiọọk ammọ ñkpa-ñkpa.

¹⁶Ammọ emaebịp anye ete, “Amekop se ntəkayịn ami etaañ?” Yisọs amaabọọrọ, “Ih, akenam ndufo ikoodo nte ebo, “ ‘Ato ke inua ntəkayịn ye mme nsekayịn afo, Abọọñ amekood ekọọm anọ idem mfo?’ ”

¹⁷Ndin anye akpọñ ammọ do aka Betani akena do ke akoneyo ado.

¹⁸Ke ubakusen, naña anye atịmmeke aka Yerusedem, abiọñ amaadọñ Yisọs.

¹⁹Ke anye akịtte eto fik keed ke mben usʌñ, anye asaña akpere eto ami, ado anye ikikịtte idem ndomokeed, ibọhọke mfañ ikpọọñ. Ndin anye abo eto ami, “Uduuñwịmme mfịd aba.” Idahado-idahado, eto amaayeeme.

²⁰Ke ini mbed ekịtte ami, idem amaakpa ammọ, ammọ enyʌñ ebịp, “Eto fik ado akenam die akpa usọp-usọp ntodo?”

²¹Yisọs abọọrọ, “Ami ntañ akpanikọ, adieke ndufo enieeghe mbuọdidem ndin inieeghe eyịghe, idooho se ekenam eto fik ado ikpọọñ ke ndufo ekeme inam, ado ndufo emekeme ibo abod ami ‘Kaa keduọ dʌk akpa mmọọñ,’ ndin ayaanyʌñ atịppe ntodo.

²²Adieke enieeghe mbuọdidem eyaebọ se ndufo ebọñ akam eyem.”

²³Yisọs amaadʌk afe tembịd ndin ke ini anye asʌkkọ akpeeb ñkpọ, mme ikpọ aku ye mme ñkpisọñ edibịne anye enyʌñ ebịp ete, “Nso-o adudu ke afo adat anañña mme ñkpọ ami? Anie akunọọ fiin utọ adudu ami?”

²⁴Yisọs abọọrọ ammọ ate, “Ami ñyaanyʌñ ibịp ndufo mbịme keed. Adieke ndufo embọọrọke miin, ami nyaatañ inọ ndufo adudu a-ami ndatta nnam afịd ñkpọ ami.

²⁵Uduọkmmọọñ Yọọn aketo uke? Aketo edem anyọñ, me aketo awo?” Ammọ emaeneme ke otu idem ammọ ndin ete, “Ikpibo, ‘Aketo edem anyọñ,’ anye ayaabo, ‘ndin ntak a-ndufo mmiikinịmme anye ke akpanikọ-ọ?’

²⁶Ado ñnyịn ikpibo, ‘Aketo awo,’ ñnyịn ibabaak se mme awo ekeme inam sia afịd awo ekere ebo ke Yọọn akedo brọfed.”

²⁷Ke ibọọrọ ndin ammọ ebo Yisọs, “Ñnyịn idiọọñọke.” Ndin Yisọs abọ, “Ami ñko nditañña inọ ndufo se adudu ke ndat nnañña mme afịd ñkpọ ami.

²⁸“Ndufo ekere die ebaña ñke ami? Awo keed akenie nditọ ideen iba. Ndin anye abịne akpa akebo anye, ‘Yịn, ka utom mfịn ke inwañ.’

²⁹“Anye ado abọọrọ, ‘Ndiikaaha,’ ado akema akpəgho akikere amọ adika.

³⁰“Ndin ete ado adibịne ayịn añko anyʌñ adọñ anye ukem utom ado. Anye abọọrọ, ‘Ete, nyaaka’ ado ikaaha.

³¹“Anie awo ke atu nditọ iba ami ikinam uduak ete amọ?” Ammọ emaebọọrọ ete, “Akpa awo.” Yisọs abo ammọ, “Ami ntañ akpanikọ inọ ndufo, mme abọ taksi ye mme akpara eyaibem ndufo iso edʌk abio ubọọñ Abasi.

³²Sia Yọọn amaadi adiwọt ndufo nnen-nnen usʌñ ado ndufo ikinịmme anye ke akpanikọ, ado mme abọ taksi ye mme akpara emaenịm anye ke akpanikọ. Kpa ye ado, ndufo ikikappake esịd, ikinyʌññọ inịm anye ke akpanikọ.

³³“Kpañ utọñ nọ ñke mfen. Anie isọñ keed amaatọ isọñ amọ, abọp akọ akanna anye, atịppe itie unam mmịn, anyʌñ abọp tọwa nda-nse do. Ndin akappa inwañ ami anọ mme atọ inwañ ke mbịn, ndin aka isañ.

³⁴Ke ini idọk akpereke, anye adọñ mme nditọufọk amọ anọ mme atọ inwañ ami nọ ekebọi mfịd inwañ amọ.

³⁵“Mme atọ inwañ ami emuum mme nditọufọk ami emia, keed idiọọk-idiọọk, ewot keed, enyʌñ etọọñ ayọọhọ ita ke itiad.

³⁶Ndin anye amaana adọñ mme nditọufọk mfen e-ekewakka ekan ake akpa ini. Mme atọ inwañ ami enam ukem-ukem naña ekenam mme akpa nditọufọk.

³⁷Ke akpatre, anye anọ ayịn amọ abịne ammọ ndin ke akikere amọ, anye abo ‘Ammọ eyaekpono ayịn mmi.’

³⁸“Ado mme atọ inwañ ami emaekekịt ayịn amọ, ammọ emaebo keed aken, ‘Anye ami ado adiaakpa. Idi yak iwot anye iben udiaakpa amọ.’

³⁹Ado anam ammọ emʌm anye etop anye esio ke inwañ ado enyʌñ ewot anye.

⁴⁰“Idahami, anie inwañ amaadi, nso-o ke anye adinam mme atọiñwañ ami?”

⁴¹Ammọ ebọọrọ, “Anye ayaawot ndubịk ibon ado anyʌñ akappa inwañ anọ mme atọ inwañ mfen e-ediinọ anye udeme mfịd amọ ke ini idọk.”

⁴²Yisọs abo ammọ, “Akenam ndufo ikoodo ke Ñwed Abasi nte ebo: “ ‘Itiad a-mme abọp ufọk ekesịnne akappa ado abom itiad; Abọọñ anam ami, ndin afọn ama ke anyen ñnyịn’?

⁴³“Do ndin ami idọkkọ ndufo nte ke eyaibọ ndufo abio ubọọñ Abasi enọ mbio mfen e-ediiñwịm mfịd amọ.

⁴⁴Awo a-aduọọhọ ke itiad ami ayaakpəho ñkeñe-ñkeñe, ado awo i-itiad ami aduọọhọ ke idem amọ ayaakpəho ukeed-ukeed.”

⁴⁵Ke ini mme ikpọ aku ye mme Farisi emaekekop mme ñke ami, ammọ emaediọọñọ ke anye aketañ ikọ ami ibaña mmimọ.

⁴⁶Do ndin ammọ eyem usʌñ naña ekpesaña emʌm anye, ado ammọ ekebaak mme atu awo, sia mme awo ekedat anye nte brọfed.