Read Ibibio Contemporary Bible 2020 Matiu 22 Bible Online

Matiu 22 - Ibibio Contemporary Bible 2020 bible

Matiu 22

¹Yisọs amaamaana atañ ikọ anọ ammọ ke ñke ate,

²“Abio ubọọñ Abasi atie nte adidem a-akenamma usọrọ ndọ anọ ayịn amọ.

³Anye amaadọñ nditọufọk amọ ekebo mbio e-emakekood usọrọ ete ammọ edi, ado ammọ esịn adidi.

⁴“Ndin anye amaana adọñ nditọufọk e-ekewakka ekan akpa ini ate, ‘Idọkkọ mbio e-ekekoodo usọrọ ami ete ke mmenam ndidia mma. Ewot enañ ye ñkpọ ebod mmi ndin afịd ñkpọ abono ke nde. Idi usọrọ ndọ.’

⁵“Ado ammọ ikikpañña utọñ, utu ke ndo etịmme ekaiya ñkpọ mfen: keed aka inwañ amọ, mfen aka ndubeghe idem amọ.

⁶Mbio ñko emuum nditọufọk amọ etʌkkọ enyʌñ ewot ammọ.

⁷Esịd amaakpakka adidem eti-eti. Anye amaanọ ekọñ amọ ekewood mme awodawo ado enyʌñ efọp abio ammọ.

⁸“Ndin anye abo nditọufọk amọ, ‘Ebeeñe idem usọrọ ndọ ema, ado mbio a-ami ñkekoodo ikidotto adidi.

⁹Ikaa ke mme inuuk efaak ikikood mme awo ake adodo a-ndufo ekịtte usọrọ ami.’

¹⁰Ndin mme nditọufọk amọ emaewuọọñọ ekaiya mme efaak ekekoono mme awo ake adodo ammọ ekekanna ekịt, nti ye ndiọi, ndin itie ndọ anyʌñ ayọhọ ye isenawo.

¹¹“Ado ke ini adidem adʌkkọ adi adikịt mme isenawo, anye amaakịt awo keed a-mmiikisịneke afọñ ndọ.

¹²Ndin anye abịp anye ate, ‘Ufan, akesaña die adʌk mmi ke ini mmuusịneke afọñ ndọ?’ Awo ami ikikanna isio uyo.

¹³“Ndin adidem abo mme akpeme itie usọrọ ate, ‘Bọp anye ubọk ye ukod nyʌñ top anye duọọk ke añwa akịm nte ntuaaña ye nta eded ediiba.’

¹⁴“Sia ekood uwak ado ibad-ibad ke emek.”

¹⁵Akem mme Farisi ewuọọñọ ekedioomo naña ammọ ediisaña imʌm anye ke ikọ amọ.

¹⁶Ammọ emaenọ mbed ammọ ye mme mbon ñka Herọd ekebo anye ntom ete, “Andikpeeb, ñnyịn imidiọọñọ ibo ke afo ado adinen awo, ñko afo akpeeb usʌñ Abasi akeene akpanikọ. Afo ubaaka awo anyen, sia afo useeghe se awo ado.

¹⁷Tañ inọ ñnyịn ndin, nso-o ido akikere mfo? Nte anen adikpe taksi nnọ Sisa me inenne?”

¹⁸Ado Yisọs, ke amaakediọọñọ ndubịk esịd ammọ abo, “Ndufo mme ndubịk, ntak a-ndufo eyemme intap miin-e?

¹⁹Iñwọt akʌk a-ndufo edatta ekpe taksi.” Ammọ edat denarius esọk anye,

²⁰ndin anye abịp ammọ, “Ndise anie awo ido ami? Anyịñ anie awo ke ewet?”

²¹Ammọ ebọọrọ, “Ake Sisa.” Ndin anye abo ammọ, “Nọ Sisa se ido ake Sisa, nyʌñ nọ Abasi se ido ake Abasi.”

²²Ammọ emaekekop ami, idem amaakpa ammọ. Do ndin ammọ edaaña ekpọñ anye.

²³Kpa ke usen ado mme Sadusi, e-mmiinịmme adised ke ñkpa ke akpanikọ, edibịne anye ye mbịme keed, ete,

²⁴“Andikpeeb, Moses akibo ñnyịn ate awo akpekpa inieeghe ayịn, ayịneka amọ ana aben anwaan amọ adọ anyʌñ abon nditọ anọ anye.

²⁵Ke aditʌm ntañ, nditọeka itiaba emaebañña. Akpa adọ anwaan anyʌñ akpa inieeghe ayịn. Ndin sia anye mmiikinieeghe ayịn, anye amaakpọñ anwaan anọ ayịneka.

²⁶Ukem ñkpọ ami amaatịppe anọ ayọhọ ayịneka iba ye ita tutu akesịm ayọhọ itiaba.

²⁷Ke akpatre, awonwaan ado amaakpa.

²⁸Amaaba ntom, ke ini used ke ñkpa, awonwaan ami adido anwaan anie awo ke atu nditọeka itiaba ami, sia afịd ammọ emaekedọ anye?”

²⁹Yisọs abọọrọ ate, “Ndufo emenam edue sia ikọ Abasi inwañake ndufo; ndufo inyʌññọ idiọọñọ adudu Abasi.

³⁰Ke ini used ke ñkpa mme awo idiidọọhọ ndọ, awo idinyʌññọ inọ mme awo ke ndọ. Ammọ ediiba nte mme enyere ke abio ubọọñ Abasi.

³¹Ado ke abaña used ke ñkpa ndufo ikoodo se Abasi akibo ndufo,

³²‘Ami ndo Abasi Ebraham, Abasi Aisik, Abasi Yekọb?’ Anye idooho Abasi mme akpañkpa, ado Abasi mme adu uwem.”

³³Ke ini mme atu awo ekoppo ami, idem amaakpa ammọ ke ukpeebñkpọ amọ.

³⁴Ke ini mme Farisi emaekekop ke Yisọs amaakʌp mme Sadusi inua, ammọ ekọọk iwuod atọ keed.

³⁵Awo keed ke atu ammọ, abia ibed, adomo anye ye mbịme ami,

³⁶“Andikpeeb, anye ake-e ido akaakan ke atu mme Ibed?”

³⁷Yisọs abọọrọ, “ ‘Ma Abọọñ Abasi mfo ke afịd esịd mfo, ke afịd ukpọñ mfo, ke afịd akikere mfo.’

³⁸Anye ami ado akpa ye akaakan ibed.

³⁹Ayọhọ iba abit akpa ami: ‘Ma mbọhọidʌñ mfo nte idem mfo.’

⁴⁰Afịd Ibed ye mme Brọfed ekọñọ ke ibed iba ami.”

⁴¹Ke ini mme Farisi emaekebono keed, Yisọs abịp ammọ ate,

⁴²“Nse ndufo ekere ebaña Krais? Anye ado ayịn anie awo?” Ammọ ebọọrọ, “Ayịn Defid.”

⁴³Ndin anye abo ammọ, “Asaña die ado Defid, ke atañña ikọ ke Sịbidịd akood anye ‘Abọọñ’? Sia anye abo ntom,

⁴⁴“ ‘Abọọñ abo Abọọñ mmi “Tie ke ubọk udom mmi tutu ami nsịn mme asua mfo ke idak ukod mfo.” ’

⁴⁵Adieke Defid akoodo anye, ‘Abọọñ,’ anye akeme die ido ayịn amọ?”

⁴⁶Awo ndomokeed ikikanna ibọọrọ. Ndin tọọñọ ke usen ado awo ndomokeed ikinieeghe uko adimaana mbịp anye mbịme mfen aba.