Read Ibibio Contemporary Bible 2020 Matiu 25 Bible Online

Matiu 25 - Ibibio Contemporary Bible 2020 bible

Matiu 25

¹“Ke ini ado abio ubọọñ Abasi adiiba nte ibaan ndọ duob e-ekebenne utuenikañ ammọ ewuọọñọ eka adikikịt ebendọ.

²Ition ke atu ammọ ekedo ndisịme, ition edoñño mme adiọọñọ idem.

³Akpesʌk ado mme ndisịme ami ekekamake mme utuenikañ, ammọ ikikamake adan ikañ.

⁴Ado mme adiọọñọ ñkpọ emaekama adan ikañ ke iko ye ke utuenikañ ammọ.

⁵Ebendọ amaabiad ini adidi, ndin idap amaabọkkọ ammọ.

⁶“Ado ke ufọọd akoneyo, emaebọñ ñkpọ, ‘Sese ebendọ! Iwuọọñọ ika ikikịt anye!’

⁷“Ndin afịd ibaan ndọ emaedemme ke idap enyʌñ esioño inua utuenikañ ammọ.

⁸Ndin mme ndisịme ami emaebo mme adiọọñọ ñkpọ, ‘Inọ ñnyịn etək adan ikañ, utuenikañ ñnyịn eyaeniime.’

⁹“Ado ammọ ebọọrọ, ‘Iyoo, adan ikañ idiikemme ñnyịn ye ndufo. Akpaafọn ndufo eka ebịne mme andinyam ekedep.’

¹⁰“Ado idaha ammọ ekaiyake adidep adan ikañ, ebendọ amaadiwuọ. Mbio e-ekebeeñeke idem emaedʌk ufọk ndọ ye anye, ndin ekʌk usʌñ.

¹¹“Akema mme ibaan ndọ mbon aken ediwuọọñọ enyʌñ ebo, ‘Abọọñ, Abọọñ, kʌkkọ usʌñ inọ ñnyịn!’

¹²“Ado ebendọ amaabọọrọ, ‘Ke akpanikọ ke idọkkọ ndufo, ami idiọọñọke ndufo.’

¹³“Ke ntodo, itaba idab ikpeme, sia ndufo idiọọñọke usen me awa.

¹⁴“Ñko abio ubọọñ Abasi aba nte awo a-ayemme ika idʌñ mfen, a-akoodo mme nditọufọk amọ anyʌñ ayaak inie amọ anọ ammọ.

¹⁵Awo keed anye anọ taden ition, mfen taden iba, ayọhọ ita taden keed, kwa awo nte ukeme ammọ adooho. Akem anye adakka isañ.

¹⁶Awo a-akebọọhọ taden ition asọp aketọọñọ ubịn udua, anyʌñ anie taden ition ññwen nte udoro.

¹⁷Awo a-akebọọhọ taden iba, anyʌñ anam udoro taden iba ke ukem usʌñ ami.

¹⁸Ado awo a-akebọọhọ taden keed, amaaka aketịppe isọñ adịp akʌk eteufọk amọ.

¹⁹“Ke anyan ini amakeboiyo, eteufọk ammọ amaato adi, adiduuñọ ñwed ibad akʌk ye ammọ.

²⁰Awo a-akebọọhọ taden ition aben taden ition mfen adi anyʌñ adibo ate, ‘Ete, afo akennọ taden ition, se ition mfen a-ami ñnwanake mi.’

²¹“Eteufọk amọ abọọrọ, ‘Amenam afọn, eti anamakpanikọ ayịnufọk! Afo amenam akpanikọ ke ntək ñkpọ; ami nyaunọ se ikpon ikan ami. Keene di wana ke inemesịd usọufọk!’

²²“Awo a-akebọọhọ taden iba anyʌñ adi adibo, ‘Eteufọk, afo akennọ taden iba, se iba mfen ami ññwanake mi.’

²³“Eteufọk amọ amaabo anye, ‘Amenam afọn, eti ayịnufọk anamakpanikọ! Afo amaawọt akpanikọ ke ntək ñkpọ; ñyaunọ fiin ikpọ ñkpọ. Di, di wana ke inemesịd usọufọk!’

²⁴“Ke akpatre, awo a-akenieeghe taden keed amaawuọ adi adibo eteufọk ate, ‘Ete, ami mmaadiọọñọ ke afo ado akpọsọñ awo a-adọkkọ ke itie uduutọọhọ, anyʌññọ akoono ke itie a-ammuukubonoke.

²⁵Ke ntodo, idem amaañnyeñ ndin ami mmaaka ñkedịp taden mfo ke isọñ. Se anye mi, ake mfo kedo, mbọ do.’

²⁶“Ado eteufọk amọ amaabọọrọ anye ate, ‘Afo idiọọk ifu ayịnufọk! Awuọ afo amaadiọọñọ ke ami nsidọk ke itie a-mmeñketọọhọ ñnyʌñ ñkoono ke itie a-mmekebonoke?

²⁷Do ndin akpekena afo aben akʌk mmi anọ mme akamakʌk; antooho ndi mi ñkpaabọ akʌk mmi ye udod.

²⁸“ ‘Ndin idahami, bọ anye akʌk ami kappa nọ awo a-anieeghe taden ition.

²⁹Sia awo a-anieeghe ñkpọ eyaenọ anye ekan ado, ñko anye ayaanie akan se ikem anye; ado awo idiinieeghe ñkpọ, eyaebọ etək se anye anenie.

³⁰Amaado ayịnufọk a-ammiifọnnọ ke usʌñ nte keed, top anye duọọk ke añwa, ke akịm, ke itie ntuaña mme nta eded ediiba.’

³¹“Ayịn Awo amaadi ke ubọọñ amọ, ye mme afịd enyere amọ, anye ayaadat itie amọ ke ebekpo ubọọñ amọ.

³²Eyaebək afịd idịd ke iso amọ, ñko anye ayaabakka mme awo nte akpemeedọñ abakkake ebod ye edọñ.

³³Anye ayaabon mme edọñ ke ubọk udom anyʌñ abon mme ebod ke ufien.

³⁴“Ndin Adidem ayaabo mbon e-ebaaha ke ubọk udom ate, ‘Edi ndufo e-Ete mmi adiọññọ, idat ñkpọ adia akpa abio ubọọñ e-ekenịmme inọ ndufo tọọñọ ke ntọọñọ ederimbod.

³⁵Sia ndufo emaennọ ndidia ke ini abiọñ akendọññọ, ke itọñ akensatta emaennọ ñkpọ se ñnwọñ, emaenyʌñ endaara ke ñkedooho asenawo.

³⁶Ke ñkenanake afọñ ndufo emaennọ afọñ, ndọñọ udọñọ, ndufo edinse, ke ñkpakọb, ndufo enyʌñ edinse.’

³⁷“Ndin mme ndinen awo eyaebọọrọ anye ebo: ‘Abọọñ, idahake-e ke ikukịt nte abiọñ udọñ ndin ñnyịn unọ ndidia, me itọñ usat ñnyịn unọ ñkpọ anwọñ?

³⁸Idahake-e ke afo akedo asenawo ndin ñnyịn udaara fiin, me nte anana afọñ ndin ñnyịn unọ afọñ?

³⁹Idahake-e ke afo akedọñọ me asịne ke ñkpakọb ndin ñnyịn iduse fiin?’

⁴⁰“Ñko Adidem ayaabọọrọ, ‘Ke akpanikọ ke idọkkọ ndufo, kpa nte ekenamma ami enọ keed ke atu nditọeka mmi, ekenam ennọ miin?’

⁴¹“Ndin anye ayaabo mbon e-ebaaha ke ubọk ufien amọ ate, ‘Indaaña ke iso, mme isuuñọ ndufo ke idem, ika ke ikañ nsi-nsi e-ekebarake enịm enọ setan ye mme enyere amọ.

⁴²Sia abiọñ amandọñ, ado ndufo ikinnọọhọ ndidia, itọñ amansat, ado ndufo ikinnọọhọ ñkpọ ndomokeed ñnwọñ.

⁴³Ami ñkedo asenawo, ndin ndufo ikindarake miin, nnana afọñ ado ndufo ikinsịnne afọñ, ndọñọ ñnyʌñ mba ke ñkpakọb ado akenanam ndufo idinseeghe miin.’

⁴⁴“Ndin adido ini ammọ adibịp, ‘Abọọñ idahake-e ke ikukịt nte abiọñ udọñ me itọñ usat, nte ado asenawo me anana afọñ, adọñọ me aba ke ñkpakọb ndin ñnyịn idiighe idunọ unwam?’

⁴⁵“Ndin anye ayaabọọrọ, ‘Ke akpanikọ ke idọkkọ ndufo, kpa nte ndufo eketreke adinam ami nnọ keed ke atu ntək-ntək ami, ndufo eketre adinam ami innọ miin.’

⁴⁶“Ñko ammọ eyaedʌk ke nsi-nsi ufen, ndin mme ndinen awo eyaedʌk ke nsi-nsi uwem.”