Read Ibibio Contemporary Bible 2020 Matiu 27 Bible Online

Matiu 27 - Ibibio Contemporary Bible 2020 bible

Matiu 27

¹Ke ubahausen, afịd mme ikpọ aku ye mme mbọọñ abio emaedioomo ebaña usʌñ naña ediiwot Yisọs.

²Ammọ emaebọp anye enyʌñ eka adiyaak nnọ Baided, adaiwuod ukara.

³Ke ini Yudas, awo a-akenyamma Yisọs anọ mme Yuu, amaakekịt ke ebiooro ikpe ñkpa enọ Yisọs, anye amaatua ñkpọfiọk abaña ndudue amọ anyʌñ aben akpoho edịb ye duob a-anye akebọọhọ atịmme asọk mme ikpọ aku ye mme mbọọñ.

⁴Anye amaabo ammọ ate, “Ami mmenam idiọọkñkpọ ke aditap iyiib a-mmiidueeghe.” Ammọ ebọọrọ ete, “Anye ado awuọọñọ so inọ ñnyịn? Ndubeghe mfo ado ado.”

⁵Ndin anye atoomo akpoho ado abono ke tembịd anyʌñ adakka akeyịt idem awot.

⁶Mme ikpọ aku ekoono akʌk ado enyʌñ ebo ete, “Ibed akpan adisịn akʌk ami ke ufọk unịm akʌk; ado akʌk iyiib awo.”

⁷Ammọ emaeneme ebaña ñkpọ ami enyʌñ eben akʌk ado ekedep isọñ edat enịm itie ubuuk awo enọ mme isenawo.

⁸Ntak adodo isọñ ado akereke Isọñ Iyiib tutu asịm mfịn ami.

⁹Ndin ikọ a-brọfed Yerimaya aketañña amaasu: “Ammọ emaeben akpoho sịrifa edịb ye duob ado, ekọmudua a-nditọ Isred ekenyịmmeke adikpe ke iwuod amọ,

¹⁰edep inwañ bọta kpa naña nte Abọọñ akentemme.”

¹¹Ndin emaeben Yisọs edi ke iso adaiwuod ukara, ndin adaiwuod ukara amaabịp anye mbịme ami, “Afo ado adidem mme Yuu?” Yisọs abọọrọ ate, “Akap ado afo atañ.”

¹²Ado ke ini mme ikpọ aku ye mme mbọọñ emaekedot anye uyo, anye amaasịn adibọọrọ ammọ ikọ.

¹³Ndin Baided abo anye ate, “Nte afo ukoppo afịd ikọ se udot fiin ami?”

¹⁴Ado ke ata ñkpaidem adaiwuod ukara, anye ikibọọrọke ikọ ndomokeed ke abaña mme ndoduyo ami.

¹⁵Ke ini usọrọ, adaiwuod ukara amaasiyaak awo ñkpakọb keed ake adodo a-mbon idʌñ eyemme anọ ammọ.

¹⁶Ata abʌd-abʌd awo ñkpakọb keed amaaba a-kekereke Barabas.

¹⁷Anam ke ini atu awo emaekeboho, Baided amaabo ammọ ate, “Anie awo ke eyem ñyaak inọ ndufo: Barabas me Yisọs e-ekoodo Mesaya?”

¹⁸Baided amaadiọọñọ abo ke ato ke ntak ufịb ke ammọ ekeyaak Yisọs inọ imọ.

¹⁹Idaha Baided aketieeghe ke itie ubiire ikpe, anwaan amọ amaanọ etob asọk anye ate, “Kuunie ñkpọ ndomokeed adinam ye eti awo ado; esịd antịmede miin mfịn ami ato ke ndab añkedappake mbaña anye.”

²⁰Ado mme ikpọ aku ye mme mbọọñ emaedọọñ atu awo ete yak ammọ ebo yak Baided ayaak Barabas ado atịmme awot Yisọs.

²¹Anam ke ini adaiwuod ukara atañña ikọ anyʌñ abịp ammọ ate, “Anie ke atu ammọ awo iba ke ndufo eyem ñyaak inọ?” Ammọ emaebo, “Barabas.”

²²Baided abo ammọ ate, “Ke ntodo, nso-o ke ndufo eyem nnam ye Yisọs e-ekoodo Mesaya?” Afịd ammọ, ete, “Kọñ anye ke krọs!”

²³Anye abịp ate, “Ntaha? Nso-o ke anye anam?” Ado ammọ enenekke ebọọñ ete, “Kọñ anye ke eto!”

²⁴Ndin Baided akekịt ke inieeghe se imọ ikeme adinam, ñko ke atu awo eyaetọọñọ ntịme, anye aben mmọọñ ayie ubọk ke iso atu awo anyʌñ abo ate, “Ami nsañake ñkpọ do ye iyiib awo ami. Ado ndubeeghe ndufo!”

²⁵Ndin afịd atu awo ebọọrọ ete, “Yak iyiib amọ idoro ñnyịn ye nditọ ñnyịn ke iwuod!”

²⁶Do ke anye ayaak Barabas anọ ammọ. Ke ini anye amaakenam nọ emia Yisọs ema, anye amaayaak anye anọ ammọ nọ ekọñ anye ke eto.

²⁷Ndin mbon ekọñ adaiwuod ukara emaeben Yisọs edʌk akwa ekwere adaiwuod ukara enyʌñ eben afịd udịm mbon ekọñ ekanna anye ekʌk.

²⁸Ndin ammọ emaesio anye afọñidem amọ enyʌñ eben iduod-iduod afọñ ewañ anye.

²⁹Ke emaekedok ñkukịm nte anyanya emaeben edot anye ke iwuod enyʌñ eben esañ esịn anye ke ubọk udom, etọọñọ edọñ enọ anye, edọọñ anye ndọk enyʌñ ebọ ete, “Imukọọm fiin, adidem mme Yuu!”

³⁰Ndin ammọ emaefiad anye etap enyʌñ ebọ anye esañ ado emia anye ke iwuod.

³¹Ke ini ammọ emaekesuenne anye ema, ammọ emaesio anye iduod-iduod afọñ ado enyʌñ eben afọñidem amọ esịn anye, ndin eben anye eka adikọñ ke krọs.

³²Ke ammọ emaekewuọ, ammọ emaekịt awo keed a-aketooho Sirin, a-akekereke Saimọn. Ndin ammọ emʌm anye enam anye abiom krọs ado.

³³Ke ini ammọ emaekesịm itie keed e-ekoodo Kọọdkọta (awuọọñọke “itie ñkpọkpọrọ”).

³⁴Ammọ emaenọ anye idod-idod mmịn, a-anye aketʌmmọ ado asịn adinwọñ.

³⁵Ke ini ammọ emaekekọñ anye ke krọs ema, ammọ emaesịn ukañ ebaaña afọñidem amọ.

³⁶Ndin esuuk etie do ekpeme anye.

³⁷Ke anyọñ eto ado emaewet ikọ e-ekedotto anye; ete: Ami ado Yisọs, Adidem mme Yuu.

³⁸Ndin emaekọñ mme inọ iba edian anye, keed ke ubọk udom, keed ke ubọk ufiin.

³⁹Mme mbon se ikiboiyo ke usʌñ esue anye, efʌñ iwuod,

⁴⁰enyʌñ ebo ete, “Afo a-abooho iwuud tembịd amaana adat usen ita abọp, nyaaña idem mfo! Akpedo ado Ayịn Abasi sọiyọ ke krọs di!”

⁴¹Mme ikpọ aku ye mme skraib ye mme mbọọñ emaesak anye ke ukem-ukem usʌñ ami.

⁴²Ammọ emaebo ete, “Anye akenyaaña mbon mfen ado ikanna inyaaña idem amọ. Anye ado adidem Isred; yak anye asọiyọ ke krọs adi idahami, ndin ñnyịn iyainịm anye ke akpanikọ.

⁴³Anye anịm Abasi ke akpanikọ; idahami yak Abasi anyaaña anye adieke ayemme anye, sia anye akebo, ‘Ami ndo Ayịn Abasi.’ ”

⁴⁴Idem mme inọ e-ekekọññọ ke krọs edian anye ekeene esuenne anye.

⁴⁵Tọọñọ ke ayọhọ awa itiokeed akịm amaafʌk isọñ tutu ayọhọ awa usʌkkeed.

⁴⁶Ndin ke ñkpọ nte ayọhọ awa usʌkkeed, Yisọs amaabọọñ ke akpọsọñ uyo ate, “Eli, Eli, lema sabaktani?” (Ikọ ami awuọ, “Abasi mmi, Abasi mmi, nso-o inam afo añkpọñọ miin?”).

⁴⁷Ke ini ubaak mbon e-ekedaaha do ekekoppo ñkpọ ami, ammọ emaebo ete, “Awo ami akood Edaiya.”

⁴⁸Ndin keed ke atu ammọ asọsọp afeghe akedat kusa anyiin ke fineka, aben atot ke eto anyʌñ anọ anye anwọñ.

⁴⁹Ado mbon ako ete, “Bet se me Edaiya ayaadinyaaña anye.”

⁵⁰Ado Yisọs atua ke ekamba uyo ini keed mfen, anyʌñ ayaak sịbidịd amọ.

⁵¹Ndin kpa idahado, afọñ ikpeghe tembịd amaasakka iba tọọñọ ke anyọñ asịm isọñ, isọñ anyek, mme itiad esaiya,

⁵²mme udi ekuumọ, ndin uwak mme ndisana awo eset ke ñkpa,

⁵³ndin ammọ ado, ke ini Yisọs amaakeset ke ñkpa, emaewuọọñọ ke udi edi, edidʌk edisaaña ke adisana abio, enyʌñ ewọt uwak awo idem ammọ.

⁵⁴Sentudiọn ye mbon mfen e-ekekpemeke Yisọs emaekịt unyekisọñ ye afịd se ikitịppe, ndin ammọ emaekop ndịk enyʌñ ebo ete, “Ke akpanikọ, awo ami akedo Ayịn Abasi!”

⁵⁵Ñko, uwak ibaan emaeba do, eda nsan-nsan ese, kpa mme ibaan ado e-ekekeeneke Yisọs tọọñọ ke Kadidi enyʌñ ese ñkpọ ebaña anye.

⁵⁶Ubaak ke atu ammọ ekedo Mmeri Makdadin, Mmeri eka Yemsi ye Yosef, ye eka nditọ Sebidi.

⁵⁷Ke ndubi, anie ñkpọ awo keed a-aketooho Arimatia, a-akekereke Yosef, anye ke idem amọ amaakekappa mbed Yisọs, amaadi.

⁵⁸Anye amaabịne Baided akebịp anye akpo Yisọs. Ndin Baided anọ uyo ate eyaak enọ anye.

⁵⁹Ndin Yosef amaaben akpo Yisọs awañ ke nsasana afọñ,

⁶⁰anyʌñ asịn ke ufa udi amọ a-anye akedọkkọ ke aba itiad. Anye ndin awere ekamba itiad asiid inua udi ado anyʌñ adakka anyọñ.

⁶¹Mmeri Makdadin ye Mmeri anye ako emaeba do; etie esak iso ese udi.

⁶²Edem usen, ado ado ke usen Mbeeñe Idem amaakekweeñe, mme ikpọ aku ye mme Farisi emaesaña keed ebịne Baided.

⁶³Ammọ ebo anye, “Abọọñ awo, ñnyịn imitoiyo ibo ke awo abiaaña ami, ke ini anye akebaaha ke uwem, amaabo ate, ‘Nyaaset ke ayọhọ usen ita.’

⁶⁴Anam ke ntodo, nọ uyo bo etʌm ekpeme udi ado tutu ayọhọ usen ita, mbaak mme mbed amọ edidiyịp anye etịmme ekedọkkọ mme awo ebo ke anye aset ke ñkpa. Abiaaña anye ami ayaadiọọk akan ake akpa.”

⁶⁵Baided abo ammọ ate, “Idat akpeme udi keed, ika ikinekke ikpeme itie ado naña ndufo ekpekakan.”

⁶⁶Ammọ emaedakka ekenekke ekọp udi, edian mme idiọọñọ ke itiad udi enyʌñ enịm mme mbon ekọñ do.