Read Ibibio Contemporary Bible 2020 Matiu 28 Bible Online

Matiu 28 - Ibibio Contemporary Bible 2020 bible

Matiu 28

¹Ke usen Sabad amaakeboiyo, ndin ke ayo amaakeka isieere ke akpa usen ke udua, Mmeri Makdadin ye Mmeri anye ako emaeka adikise udi.

²Ndin ini keed ini keed, ata akpọsọñ unyekisọñ amaaba, sia enyere Abọọñ, a-aketooho ikpaanyọñ adi, amaadiwere itiad asio anyʌñ adọọk atie ke anyọñ ado.

³Iso amọ akeba nte akepkep, afọñ amọ anyʌñ afia nte sino.

⁴Ndịk amaanam mme akpeme udi tutu ammọ editie nte mbon ñkpa.

⁵Ado enyere amaabo ibaan ado ate, “Ufọn ndufo adikop ndịk ibaaha, mmediọọñọ ke eyem Yisọs e-ekekọññọ ke krọs.”

⁶Anye ibaaha mi, sia anye aset ke ñkpa naña anye akebo. Idi idise itie a-anye akenaaha.

⁷“Ndin isọsọp ikaa ikidọkkọ mme mbed amọ ete, ‘Anye aset ke ñkpa, ndin idahami anye ibem ndufo iso aka ke Kadidi; do ke ediikịt anye.’ ”

⁸Ke uteñe ye akwa idaara mme ibaan ado emaesọsọp ekpọñ itie udi enyʌñ efeghe eka adidọkkọ mme mbed amọ.

⁹Ke ndo-ndo ado, Yisọs asaña adibịne ammọ. Anye abo ammọ, “Mmi kọọm-o!” Ndin mme ibaan ado edibịne anye, eduọññọ anye ke ukod enyʌñ ekpono anye.

¹⁰Ndin Yisọs abo ammọ ate, “Ikiifeghe ndịk, ikaa ikidọkkọ nditọeka mmi ibo yak ammọ eka ke Kadidi; ndin ammọ eyaeñkịt miin do.”

¹¹Ke ammọ emaekedaaña, ubaak mme ekpeme udi edaaña edʌk abio edidọkkọ mme ikpọ aku afịd se ikitịppe.

¹²Mme ikpọ aku emaesoobo ye mme mbọọñ, ndin ke emaekenam edioomo ema, ekpọñ uwak akʌk enọ mme mbon ekọñ,

¹³enyʌñ enọ ammọ ewuuk ami, “Ikop se ediitañ mi, ‘Mme mbed amọ ekedi ke akonayo, idaha ñnyịn idaiyake, ediyịp anye.’

¹⁴Ñko adaiwuod ukara akpekop ñkpọ ami, ñnyịn imiñwọñọ adinam afịd ñkpọ adikịt mbo ke ndufo idʌkkọ mfịna.”

¹⁵Ammọ emaebọ akʌk ami enyʌñ enam naña mme ikpọ aku eketemme ammọ, ndin mbʌk ami asʌk ababa ke atu mme Yuu tutu asịm usen mfịn.

¹⁶Ke ukem ini ado, mme mbed duob ye keed emaetọọñọ isañ eka Kadidi, ke anyọñ abod a-Yisọs akebiireke adisoobo ye ammọ.

¹⁷Ke ini ammọ emaekekịt anye, ammọ emaeduọññọ anye ke ukod, akpesʌk ado ubaak ammọ ekenieeghe eyịghe.

¹⁸Yisọs adi aditañ ikọ ye ammọ. Anye ate, “Eyaak afịd adudu ke anyọñ ye ke isọñ ennọ miin.

¹⁹Ika ndin ke afịd mme idịd, ikọ mme mbed, iduọk ammọ mmọọñ ke anyịñ Ete, ye Ayịn ye Adisana Sịbidịd,

²⁰inyʌñ ikpeeb ammọ adinịm afịd mme ibed a-ami ñkinọọhọ. Ndin sese, ami mbaba ye ndufo afịd ini, tutu utịd ederimbod.”