Read Ibibio Contemporary Bible 2020 Matiu 3 Bible Online

Matiu 3 - Ibibio Contemporary Bible 2020 bible

Matiu 3

¹Akem Yọọn Aduọkmmọọñ adi adikwọrọ ikọ ke akpautatan Yudia,

²ate, “Ikappa esịd sia abio ubọọñ Abasi akpere.”

³Yọọn Aduọkmmọọñ ami ado awo a-brọfed Aisaya aketañña abaña ke ini anye akebooho ate: “Uyo awo keed ke akpautatan abo ‘Idiọñ usʌñ inọ Abọọñ, inekke usʌñ inọ anye.’ ”

⁴Ekedat ided enañ mbiomo enam afọñ Yọọn ndin anye abọbọ ñkpaha ikpa ke isịn. Ndidia amọ akedo ñkukuñkpọyọriyọ ye adan akwọọk ikọd.

⁵Ndin afịd mbon Yerusedem ye Yudia, ye afịd ñkanñkʌk Yọdan emaewuọ ebịne anye.

⁶Ke ammọ emaekeyaara mme idiọọkñkpọ ammọ, anye amaaduọk ammọ mmọọñ ke Akpa Yọdan.

⁷Ke ini Yọọn Aduọkmmọọñ akịtte uwak mme Farisi ye mme Sadusi nte edibọ uduọkmmọọñ anye abo ammọ ate, “Ndufo ubon asabọ, anie awo itemme ndufo ibo efeghe ifiobesịd Abasi a-aboohoidi mi?

⁸Ikappa esịd inyʌñ inam se ifọn.

⁹Ikiikere ibo ke emenie Ebraham nte ete. Sia Abasi akeme adidat mme itiad ami abot nditọ anọ Ebraham.

¹⁰Ndin idahami ekọñ ekịd ke itak eto: anam eto a-ammiinwịmme eti mfịd eyaekpịkke anye etop esịn ke ikañ.

¹¹“Ami ñkama mmọọñ nnịm ndufo uduọkmmọọñ nte yak ekappa esịd. Ado anye a-adiidi ke ini iso akpon ankan, ndotto adisiooño anye ikpaukod ke ukod. Anye adikama Adisana Sịbidịd ye ikañ iduọk ndufo mmọọñ.

¹²Anye ayaakama abufịm afịm idem abakpa, akoono idem abakpa akebono ke ise ado anye ayaafọp ñkpata ke ikañ.”

¹³Akema Yisọs amaato Kadidi adika Yọdan, nọ Yọọn akeduọk anye mmọọñ.

¹⁴Ado Yọọn akpaaña nsa, ate, “Afo akpekap anduọk miin mmọọñ.”

¹⁵Yisọs abọọrọ anye ate, “Yak aba ntodo nọ ikọ Abasi asu.” Ndin Yọọn anyịmme.

¹⁶Ke emaekeduọk Yisọs mmọọñ ema, anye awuọ ke mmọọñ ndin sese ikpaanyọñ abeere, ndin anye akịt naña Sịbidịd Abasi asọiyọ nte ibiom adidoro anye ke idem.

¹⁷Ndin uyo ato ikpaanyọñ abo ate, “Anye ami ado adima Ayịn mmi, a-ami mmaaha eti-eti.”