Read Ibibio Contemporary Bible 2020 Matiu 5 Bible Online

Matiu 5 - Ibibio Contemporary Bible 2020 bible

Matiu 5

¹Ke ini Yisọs amaakekịt umiañ atu awo, anye amaadọọk aka aketie ke anyọñ abod. Mme mbed amọ emaenyʌñ eka ebịne anye,

²ndin anye amaatọọñọ adikpeeb ammọ ñkpọ. Anye abo:

³“Afọfọn anọ mbon e-eweeneke ke sịbidịd, sia abio ubọọñ Abasi anieeghe ammọ.

⁴Afọfọn anọ mbon e-etuaaha ayịd, sia eyaaedọñ ammọ esịd.

⁵Afọfọn anọ mme anie ifure-ifure ido, sia ammọ eyaedat ederimbod enie.

⁶Afọfọn anọ mme andikop biọñ ye nsaditọñ etiido, sia ammọ eyaenie uyʌkkọ.

⁷Afọfọn anọ mme anditua awo mbọm sia eyaetua ammọ mbọm.

⁸Afọfọn anọ mbon e-esịd asanake, sia ammọ eyaekịt Abasi.

⁹Afọfọn anọ mme anam emem, sia eyaekood ammọ nditọ Abasi.

¹⁰Afọfọn anọ mme mbon e-ebọọhọ ndutʌkkọ ke ntak etiido, sia abio ubọọñ Abasi anieeghe ammọ.

¹¹“Afọfọn inọ ndufo ke ini ebọọhọ nsue, ndutʌkkọ ye ndiọi ikọ ke nsu, ke ntak mmi.

¹²Inem esịd, inyʌñ idaara, sia utịb ndufo ayaakpon ke abio ubọọñ Abasi, kpasʌk ntom ke ekekọbọ mme brọfed ke esed.

¹³“Ndufo edo inʌñ ederimbod. Ado adieke inʌñ mmiinemme aba, ediinam die nọ anye amaana anie inem? Ifọnnọ ke baaba usʌñ nte keed aba, ana etop anye eduọk, efiik ke ukod.

¹⁴“Ndufo edo unwana ederimbod. Abio e-ebọppọ ke anyọñ abod ikemeke idịbe.

¹⁵Awo isidomoke utuenikañ iben usan ifʌk, ado aben anye adot ke anyọñ nọ anye ayamma anọ afịd awo ke ufọk.

¹⁶Ke ukem usʌñ ami ana unwana ndufo ayamma ke iso mme awo, nọ ammọ ekịt nti utom ndufo enyʌñ etooro Ete ndufo ke anyọñ.

¹⁷“Ikiikere ke ami ñkedi ma ndibiad Ibed me se mme Brọfed ekekpeeb. Ñkediighe adibabiad, ñkedi adinam nọ ammọ esu.

¹⁸Ke akpanikọ ke ami idọkkọ ndufo, tutu anyọñ ye isọñ eboiyo efep, ndomo ntọi keed, ndomo ata etək ntọi ikọ keed idiiwuọhọ ifep ke Ibed ami tutu anye anam uduak a-akenaaha nte anye anam.

¹⁹Ke ntodo, awo ake adodo ake adibiad ñkpọkọm ata andisịb ñkan ke atu mme ibed ami me adinam nọ mme awo mfen ekeene ebiad mme ibed ami, eyaedat awo ado nte ata usuuhọ ñkan ke abio ubọọñ Abasi. Ado awo a-anịmme mme ibed ami anyʌñ akpeeb mme awo mfen abaña ammọ eyaedịppe anye itie ke abio ubọọñ Abasi.

²⁰Ndin mmidọkkọ ndufo mbo ke ibọhọke nti uwem ndufo ekpon ekan ake mme Farisi ye mme akpeeb ibed, ndufo idiikemeke-keme idʌk abio ubọọñ Abasi.

²¹“Ndufo emekop naña eketañ enọ mme eteete ñnyịn ebo, ‘Ikiiwot awo, ñko ke awo a-awotto awo ana abọọrọ mbịme ke esob.’

²²Ado ami idọkkọ ndufo mbo ke awo ba keed a-ayatta esịd ye ayịneka amọ ayaabọọrọ mbịme ke esob ikpaisọñ. Ñko awo a-adiidat ayịneka nte ‘Useme,’ ayaabọọrọ mbịme ke esob ikpaisọñ. Ndin awo a-akoodo anye ‘Ntʌn,’ ayaadʌk ke nsi-nsi ikañ.

²³“Ke ntodo, akpedo idaha afo adatta ñkpọ uwa ekọọm adi ke itie uwa, afo atoiyo abo ke ayịnuka amaanie utọk ye afo,

²⁴kpọñ uwa ekọọm mfo do ke itie uwa, kaa kenam emem ye anye, mbemiso afo atịmme adi adinọ enọ mfo.

²⁵“Nam emem ye awo usua mfo ke usọp mbemiso anye uben fiin awuọ esob. Nam idaha afo asʌkkọ aba ye anye ke usʌñ, mbaak awo usua mfo adukappa fiin anọ abiireikpe, ndin abiireikpe adukappa fiin anọ etubom, ndin eyatop fiin esịn ke ñkpakọb.

²⁶Ntañ akpanikọ inọ ndufo, awo idiiyakka afo awuọ tutu afo akpe afịd akʌk ama.

²⁷“Ndufo emekop ke emaebo, ‘Kuusịn efịbe.’

²⁸Ado ami mbo ke awo a-aseeghe awonwaan ke idiọọk usʌñ akap asesịn efịbe ke esịd amọ.

²⁹Anyen udom mfo akpedo ñkpọiduọ unọ fiin, kịm anye sio duọọk. Afọn afo adinana ndido idem mfo keed, ñkan afịd idem mfo aditak ke nsi-nsi ikañ.

³⁰Ñko ubọk udom mfo akpedo ñkpọiduọ unọ fiin, kpịkke anye top duọọk; sia afọn afo adinana ndido idem mfo keed ñkan afịd idem mfo aditak ke ikañ nsi-nsi.

³¹“Emaedadak ibo ke awo ake adodo a-asịnne anwaan amọ ana anọ anye ñwed usio ndọ.

³²Ado ami ibo ndufo ke awo ake adodo a-asịnne anwaan amọ, ibọhọke ke ntak efịbe, anam anye ado asaña esien; ñko awo a-adọọhọ awonwaan e-emaaekesio ndọ asịn efịbe.

³³“Ndufo emekop ñko ke emaebo mme ete ñnyịn ke esed, ‘Ikiibiad enwọñọ ndufo, ana enịm enwọñọ a-ndufo enamma ye Abọọñ.’

³⁴Ado ami ibo ndufo, ikiinwọnwọñọ unwọñọ ntekeed idian abio Abasi sia ado ebekpo Abasi,

³⁵me ederimbod, sia adooho itie udodukod Abasi, me abio Yerusedem, sia adooho abio akwa adidem.

³⁶Ikiita unwọñọ ke iwuod ndufo ñko, sia afo unieeghe adudu adinam ided mfo akappa ado afia me abubịd.

³⁷Ke ntodo yak ‘Ih’ mfo ado ‘Ih,’ yak ‘Iyo-o’ mfo ado ‘Iyo-o’; akpekan ado, se afo atañ ato setan.

³⁸“Ndufo emekop ke emaebo ‘Anyen aka ke anyen, eded anyʌñ aka ke eded.’

³⁹Ado Ami ibo ndufo ikiisio idiọọk awo usieene idiọọk. Utu ke ado, awo akpumia ke mfʌk udom, kanna edem mfʌk uko nọ anye umia ñko.

⁴⁰Awo akpeyem aduben ñka esob ke ntak afọñ adahaidem, nọ anye afọñidem mfo ñko.

⁴¹Awo akpukpak nọ asaña itiad keed ye anye, kappa saña itiad iba.

⁴²Awo ake adodo u-ubeeñeke ñkpọ, kuutre adinọ; ñko awo a-ayemme ewuọọd, kuutre adiwuọọd.

⁴³“Ndufo emekop naña ekesibo, ‘Ma mbọhọidʌñ’ mfo nyʌñ sua awo usua mfo.

⁴⁴Ado ami ibo ndufo ima mme asua ndufo inyʌñ ibọñ akam inọ mme mbon i-inọọhọ ndufo ndutʌkkọ;

⁴⁵nọ ndufo edo nditọ Ete ndufo abaaha ke anyọñ, sia unwana utịn amọ ayaayamma anọ nti ye ndiọi awo, anyʌñ anọ nti ye ndiọi awo edịm ukem-ukem.

⁴⁶Adieke ndufo emaaha mbon i-imaaha ndufo ikpọọñ, nso-o udod ke ediibọ? Ñkọm mme ọbrọbʌd mbon ubọ taksi enyʌñ esinam ntom.

⁴⁷Ndufo ekpekọọm nditọeka ndufo ikpọọñ, nso-o ke ndufo enam ekan mbio mfen? Nte mbio a-ammiimaaha Abasi inamma ntodo ñko? Ñkọm mbio a-mmiidiọọñọke abasi enyʌñ esinam ntodo.

⁴⁸Ana ndufo efọn ema, kpa nte Ete ndufo ke anyọñ afọnnọ ama.