Read Ibibio Contemporary Bible 2020 Matiu 8 Bible Online

Matiu 8 - Ibibio Contemporary Bible 2020 bible

Matiu 8

¹Ke Yisọs amaakesọihọ ito abod idi, akwa atu awo emaekeene anye.

²Ndin awo akpamfia adi aditọọñọ edọñ anọ anye ate: “Abọọñ, adieke afo amaaha, nnam miin nsana.”

³Yisọs amaasio ubọk atuuk anye, abo anye ate, “Mmenyịmme, sana.” Kpa ke idahado, udọñọ akpamfia ado amakweeñe anye.

⁴Ndin Yisọs abo anye ate, “Kpeme, kuudọkkọ awo nte keed. Ado ben idem mfo ke wọt aku Abasi, nyʌñ nọ enọ a-asañake akekem nte Moses aketemmeke nte ñkpọ ntiense.”

⁵Ke Yisọs amaakekewuọ Kapanọm, awo ekọñ sentudiọn amaadi adikpeiye anye ayem unwam.

⁶Anye amaabo Yisọs ate, “Abọọñ, ayịnufọk mmi adọñọ akpaubeñ anyʌñ aba ke ata akpọsọñ ubiak.”

⁷Do ndin Yisọs amaabo anye, “Ami ñyaadi ndikọk anye.”

⁸Awo ekọñ sentudiọn amaabọọrọ ate, “Abọọñ, ami ndotto nte afo akpedʌkkọ ke idak akọm ufọk mmi; kap sʌk tañ ikọ, ke ayịnufọk mmi ayaakop nsọñidem.

⁹Ami ke idem mmi ndo awo e-enọọhọ akwa adudu, mbon ekọñ ñko enyʌn eba ke idak mmi. Ndin mmekeme ibo awo anyem, ‘Kaa,’ ndin anye aka; nnyʌñ mbo awo mfen, ‘Di mi,’ anye anyʌñ adi. Mmekeme ibo ayịnufọk mmi, ‘Nam ami,’ ndin anye anyʌñ anam.”

¹⁰Ke Yisọs akoppo ami, idem amaakpa anye, ndin anye abo mbon e-ekekeeneke anye ate, “Ntañ akpanikọ, tọọñọ anam ami ñkịtte awo a-anieeghe utọ ekamba mbuọdidem ami ke afịd isọñ Isred.

¹¹Ñko ami ntañ inọ ndufo, ata umiañ awo eyaeto ke usiak utịn ye usobutịn edidat itie ammọ ke usọrọ ye Ebraham, Aisik ye Yekọb ke abio ubọọñ Abasi.

¹²Ado eyaekappa ebịn nditọ e-ekpekedʌkkọ abio ubọọñ esịn ke akịm, ke itie ntuaaña ye ntaeded ediiba.”

¹³Do ndin Yisọs abo awo ekọñ sentudiọn ate, “Nyọñ! Yak asu unọ fiin nte mbuọdidem mfo adooho.” Ndin idem amaasọñ ayịnufọk amọ kpa ke awa ado.

¹⁴Idaha Yisọs akaaha ufọk Bita, anye amaakịt eka anwaan Bita naña ana ke ikʌk ye ufiobidem.

¹⁵Ke ini Yisọs amaaketuuk anye ke ubọk, ufiobidem ado amaakweeñe anye, ndin anye adakka ada atọọñọ adise ñkpọ mbaña Yisọs.

¹⁶Ke ndubi usen ado, emaekoono umiañ mbon a-adimọn akefịnake esọk anye. Anye adat ikọ inua abịn mme ndiọi sịbidịd asiooño, ndin amaakọọk afịd mbon udọñọ.

¹⁷Ami akedo adinam se brọfed Aisaya aketañ asu: “Anye ke idem amọ amaabiom mme udọñọ ñnyịn anyʌñ aben mme ubiak ñnyịn.”

¹⁸Ke Yisọs akịtte ke mme atu awo ewak ebọhọ, anye anọ mme mbed amọ uyo ate ekappa eka edem ibiok uko.

¹⁹Ndin akpeeb ibed keed adibịne anye akebo ate, “Andikpeeb, ami nyaukeene fiin nsaaña nte afo adiikaka.”

²⁰Yisọs amaabọọrọ anye ate, “Mme ewaikọd enieeñe adu, mme inuen anyọñ enyʌñ enieeñe efọk, ado Ayịn Awo inieeghe itie nte adaak iwuod.”

²¹Awo mfen, keed ke atu mme mbed Yisọs, abo anye ate, “Abọọñ, yak ami ñka diin ñkebuuk ete mmi.”

²²Ado Yisọs abo anye, “Ñkeene miin, yak mme akpañkpa ebuuk mme akpañkpa ammọ.”

²³Akem Yisọs adidʌk ubom, ndin mme mbed amọ enyʌñ ekeene anye.

²⁴Ke unana idodanyen, ata ekandịk ayobio atọọñọ ke ibiok, tutu inua akpa afʌññọ ikọd afʌk ubom. Ado Yisọs ake daadaiya.

²⁵Ndin ammọ eketọi anye ke idab ete, “Abọọñ, inyaaña ñnyịn mbaak ñnyịn idisịp.”

²⁶Ado Yisọs abo ammọ, “Ndufo mbon ntək mbuọdidem, nsinam idem inyeñ ndufo ntom?” Ndin anye adakka ada anyʌñ asua anọ ayobio ye abufịd akpa, do ndin afịd ñkpọ edobo.

²⁷Idem amaanekke akpa ammọ ndin ammọ ebịp ete, “Nso utọ awo ido ami? Afịm ye abufịd inyañ ekop ikọ enọ anye.”

²⁸Yisọs amaakekanna ikiwuọ edem inyañ ukañ idʌñ Kadarin, ideen iba a-dimọn akesọppọ eto mme itiad udi ewuọọñọ ebịne anye. Afai-afai ido ammọ ikiyakka awo nte keed asaña aboiyo itie ado.

²⁹Ke ata idahado ammọ emaesio ñkpo ete, “Nso-o ke afo ayem ito ñnyịn, Ayịn Abasi? Afo adi adinọ ñnyịn ufen mbemiso ini akem?”

³⁰Itie ami akekpere itie uwak udịm edi ekebaññake ediaha ñkpọ.

³¹Ndin ndiọi sịbidịd ami ekpeiye Yisọs ete, “Mbọk afo akpebịn ñnyịn aduọọñọ, isịññe ñnyịn dọñ ke idem mme edi ami.”

³²Do ndin anye abo ammọ ate, “Ikaa!” Ndin ammọ enyʌñ ewuọọñọ edọñọ idem mme edi ado. Akenam ntodo, afịd mme edi ado efeeñe ediad abedeñ, edʌk ibiok ndin ekekpañña ke mmọọñ.

³³Mme akpeme edi ado emaefeeñe enyʌñ ekaiya abio, eketañ afịd mbʌk ami ye se ikitịppe inọ ideen a-dimọn akesọppọ.

³⁴Ke ndondo ado, afịd awo ke abio emaewuọọñọ eka ikịt Yisọs; ndin ammọ ekesʌk ekekịt anye, ekpeiye anye ete akpọñ ñkanñkʌk mmimọ.