Read Ibibio Contemporary Bible 2020 Maak 1 Bible Online

Maak 1 - Ibibio Contemporary Bible 2020 bible

Maak 1

¹Ntọọñọ eti etob a-abañake Yisọs a-dooho Mesaya, Ayịn Abasi,

²nte ewette ke ñwed brọfed Aisaya: “Ami ñyaanọ isʌñutom mmi ubem fiin iso, a-adikidiọñ usʌñ unọ fiin,”

³“uyo awo andikood ke akpautatan abo, ‘Idiọñ usʌñ inọ Abọọñ, tʌm usʌñ inọ anye.’ ”

⁴Ke ntom ke Yọọn Aduọkmmọọñ akedi ke akpautatan, akwọrọ uduọkmmọọñ, adikappa esịd, nọ adifeen aba ke mme idiọọkñkpọ.

⁵Afịd-afịd abio esịd idʌñ Yudia ye afịd mbioawo ke Yerusedem emaewuọọñọ eka ebịne anye. Ke ammọ emaekeyaara mme idiọọkñkpọ ammọ, anye amaaduọk ammọ mmọọñ ke Akpa Yọdan.

⁶Yọọn akesịne afọñ e-edatta ided enañ mbiomo enam, ye ñkpaha ikpa ke isịn amọ, anye akenyʌñ ata ñkukuñkpọyọriyọ, ye adan akwọọk ikọd.

⁷Etob a-anye akenọọhọ ado ami: anye a-adiidi ke ini iso anie adudu akan mien, ukod ikpaukod amọ ami ndoto adiitad.

⁸Ami ndat mmọọñ inim ndufo uduọkmmọọñ ado anye aduuduọk mmọọñ ke Adisana Sịbidịd.

⁹Ke ini ado, Yisọs amaato Nasared ke Kadidi adi ndin Yọọn amaanyʌñ aduọk anye mmọọñ ke Yọdan.

¹⁰Ke ini Yisọs asañake awuọ ke mmọọñ, anye amaakịt nte anyọñ abakka iba ye naña Adisana Sịbidịd asọiyọ nte ibiom adoro anye ke iwuod.

¹¹Nkọ uyo ama ato anyọñ ate: “Afo ado ata adima Ayịn mmi, a-ami mmaaha; mmenem esịd ye afo ayọhọ-ayọhọ.”

¹²Idaha-idaha ado, Sịbidịd amaaben anye aka ke akpautatan;

¹³Anye akeba ke akpautatan usen aba, ndin Setan akaiso anyʌñ adomo anye idomo. Mme unam ikọd emaenyʌñ eba do, mme enyere Abasi enyʌñ ese ñkpọ ebaña anye.

¹⁴Ke emaekesịn Yọọn ke ufọk ñkpakọb, Yisọs amaaka Kadidi, akekwọrọ eti etob Abasi ke udo.

¹⁵Ukwọrọ ikọ amọ akedo, “Ini adi. Abio ubọọñ Abasi akpere. Ikappa esịd inyʌñ inịm eti etob ke akpanikọ!”

¹⁶Naña Yisọs akeasañake ke mben Akpa Inyañ Kadidi, anye amaakịt Saimọn ye ayịneka amọ Andru nte eyaak iyịre esịn ke ibiok, sia ammọ ekedooho mme akọiyak.

¹⁷Yisọs amaabo ammọ ate, “Idi, iñkeene miin, ndin ami nyainam ndufo edo mme akọawo.”

¹⁸Ini keed, ammọ emaekpọñ iyịre ammọ, enyʌñ ekeene anye.

¹⁹Anye ikisañake inyọọñ usʌñ ke anye akekịtte Yemsi, ayịn Sebidi, ye ayịneka amọ Yọọn ke ubom nte esʌk ediọñ iyịre ammọ.

²⁰Yisọs ikibiatta ini adikood ammọ, ammọ ñko ikibiatta ini adikpọñ ete ammọ, Sebidi ke ubom, ye mbon utom ammọ ñnyʌñ ñkeene Yisọs.

²¹Ammọ emaeka Kapanọm, ndin ke usen Sabad amaakedi, Yisọs amaadʌk aka sinakọk anyʌñ atọọñọ adikpeeb ñkpọ.

²²Ukpeebñkpọ amọ amaakpa mme awo idem sia anye akekpeeb ammọ nte ataifiọk ñwed, idooho nte mme andikpeeb ibed.

²³Kpa ke idahado awodeen keed ke sinakọk amọ a-akenieeghe ndedeghe sịbidịd amaabọñ ate,

²⁴“Nso-o ke ayem ye ñnyịn, Yisọs Ayịn Nasared? Afo adisobo ñnyịn? Mmediọọñọ se afo ado: Adisana Ayịn Abasi!”

²⁵Yisọs amaaduat anye ke akpọsọñ uyo ate: “Dop uyo. Wuọ anye ke idem!”

²⁶Ndedeghe sịbidịd ami amaatuak awo ami afai-afai, abọọñ akpọsọñ ñkpo anyʌñ awuọ akpọñ anye.

²⁷Idem amaakpa mme awo tutu ammọ edubiime, “Nso-o ido ami? Ufa ukpeeb a-ayọhọke ye adudu! Tutu asinọ mme ndedeghe sịbidịd uyo, ammọ enyʌñ ekop!”

²⁸Etob amọ amaasuana usọp-usọp akanna afịd nkanñkʌk Kadidi.

²⁹Ke ammọ adikisʌk nkpọñ sinakọk, ammọ emaesaña ye Yemsi ye Yọọn eka ufọk Saimọn ye Andru.

³⁰Eka anwaan Saimọn akenaana ke ñkpana sia anye akenie ufiobidem, ndin ammọ emaekedọkkọ Yisọs ebaña anye.

³¹Ndin Yisọs amaaka akemʌm anye ubọk anyʌñ añwam anye adakka ada. Ufiobidem ado amaakpọñ anye, anye anyʌñ atọọñọ adise ñkpọ mbaña ammọ.

³²Ndubi ado, ke utịn amaakesop, mme awo emaekoono mbon udọñọ ye mme anieeñe ndiọi sịbidịd esọk anye.

³³Afịd awo ke abio edibono ke mben udọk,

³⁴ndin Yisọs amaakọk mme nsio-nsio awo udọñọ. Anye amaanyʌñ abịn mme uwak dimọn asiooño mme awo ke idem, ado anye ikiyakka ndiọi sịbidịd ami etañ ikọ, sia ammọ emaediọọñọ se anye akedo.

³⁵Ke ata ubak-ubak usen, ke utịn miisakkake dion, Yisọs amaadakka ada, akpọñ ufọk aka ndobo-ndobo itie, a-anye akebọñ akam.

³⁶Saimọn ye mme nsaña amọ emaekaa ekeyem anye,

³⁷ndin ke emaekekịt anye, ammọ esio ñkpo ke ñkpaidem ete: “Afịd awo esʌk uyem fiin!”

³⁸Yisọs abọọrọ ammọ ate: “Yak ika mme abio mfen mme idʌñ se ikpere mi, ma nyʌñ ñkekwọrọ ikọ ke udo. Ntak añkediighe ado ado.”

³⁹Ndin anye amaasaña ke afịd Kadidi, akwọrọ ikọ ke sinakọk anyʌñ abịn ndiọi sịbidịd asiooño mme awo ke idem.

⁴⁰Awo akpamfia keed amaadikịt Yisọs amaatọọñọ edọñ anyʌñ akpeiye anye ate, “Akpenyịmme, amekeme inam nọ ami nsana.”

⁴¹Mbọm amọ amaanam Yisọs. Anye amaasio ubọk amọ atuuk awo akpamfia ami ate, “Ami mmenyịmme, sana!”

⁴²Ke ndo-ndo ado, akpamfia amaakpọñ anye, idem amọ amaanyʌñ asọñ.

⁴³Yisọs amaasio awo akpamfia ado unyọñ ini keed anyʌñ adʌt anye utọñ ate:

⁴⁴“Kịt bo ke utañña ñkpọ ami unọ awo ndomokeed. Ado kaa ke wọt aku idem mfo nyʌñ nam mme uwa naña Moses akenịm ke akpamfia amaasana, nte ñkpọ ntiese nọ ammọ.”

⁴⁵Ado awo ami amaaketaañ añwa-añwa se Yisọs akenam anọ anye. Ke ntak ami, Yisọs ikikanna idʌk mme abio aba añwa-añwa, ado akappa akeba ke mme ndịbe-ndịbe itie. Kpa ye ado, mme awo ke afịd itie ekesʌk edidi ebịne anye.