Read Ibibio Contemporary Bible 2020 Maak 11 Bible Online

Maak 11 - Ibibio Contemporary Bible 2020 bible

Maak 11

¹Ke ammọ emaekekpere Yerusedem enyʌñ edisịm Betfas ye Betani a-abaaha ke Abod Ọdif, Yisọs amaadọñ mbed amọ iba ate:

²“Ika ke abio a-abaaha ke iso-iso ako, ke edʌkkọ, eyaekịt ñyịn dọñki nte ayịre do, a-awo ndomokeed kpaanam mmiiwatta, itat anye inyʌñ iben anye idi mi.

³Adieke awo akpibịp, ‘Ntak-a enamma ami-e?’ idọkkọ anye ite ‘Abọọñ ayem, ndin idiikpeeneke, ayaanọ anye atịmme adi.’ ”

⁴Ammọ emaeka ekekịt ñyịn dọñki nte etobo ke mben usʌñ.

⁵Ke ammọ emaeketat dọñki ami, mme awo e-ekedaaha emaebịp ammọ ete, “Nso-o inam nọ etat ñyịn dọñki ado?”

⁶Ammọ emaebọọrọ naña Yisọs aketemme ammọ. Ndin mme awo ami emaeyak ammọ eben dọñki edakka.

⁷Ammọ emaeben ñyịn dọñki ami edinọ Yisọs enyʌñ esioño afọñidem ammọ ebịt ke edem amọ ndin Yisọs amaadọọk atie.

⁸Ata uwak awo emaebịid afọñidem amọ ke usʌñ, ubaak awo ebʌñ ñkọk eto e-ekekpịkkeke ke ikọd ebiid ke usʌñ.

⁹Mbon se ikiboiyo ke iso ye mbon se ikiikeene ke edem emaekwaha ñkpo enyʌñ ebọñọ ete, “Osana!” “Emaediọñ anye a-adieeghe ke anyịñ Abọọñ.”

¹⁰“Adidiọñ anie adidi abio ubọọñ ete ñnyịn Defid!” “Osana ke ata anyọñ.”

¹¹Yisọs amaadʌk Yerusedem adọọk aka ke mme esịd akwere tembịd. Anye amaakanna anyen aseed afịd ñkpọ, ado sia ayo amaakesọñ, anye amaaboiyo aka Betani ye ibed amọ duob ye iba.

¹²Edem usen ado, idaha ammọ ekpọññọ Betani, abiọñ amaadọñ Yisọs.

¹³Anye akedaakịt eto fik nte ayọhọ ye mfañ ke nsan-nsan, anye amaasaña akpere akease me anie idem. Anye amaakekesịm ndo, anye amaakịt ke mfañ-mfañ ayịre, sia ikidooho ini eto ami asiñwịmme.

¹⁴Ndin anye amaasụụñọ eto ami ate, “Awo ndomokeed idiikịppeke mfịd mfo aba idia.” Mme mbed amọ emaekop ini anye aketañña ikọ ami.

¹⁵Ke ammọ emaekesịm Yerusedem, Yisọs amaadʌk ke mme esịd akwere tembịd anyʌñ atọọñọ adibịn mbon e-ekedeppe ñkpọ ye mbon e-ekenyamma ñkpọ do. Anye akaan mme akpokoro mme akpəgho akʌk atọọñ ye mme ñkpọitie mbon e-ekenyamma ibiom,

¹⁶anye ikinyʌññọ iyak ndomo awo keed aben ñkpọ udua asaña aboiyo ke mme akwere tembịd.

¹⁷Ndin anye amaakpeeb ammọ ñkpọ anyʌñ abo ate, “Me awo iwette ite: ‘Eyaekood ufọk mmi ufọk akam anọ afịd idịd?’ Ado ndufo emeben anye enam afe mbon inọ.”

¹⁸Mme ikpọ aku ye mme nta akpeeb ibed ekekop ami, etọọñọ adiyem usʌñ naña ekpeda ewot anye, ado ammọ ekebabaak anye ke ntak ukpeebñkpọ amọ, sia mme atu awo emaekop inem ke ukpeebñkpọ amọ.

¹⁹Amaakediwuọ ndubi, Yisọs ye mme mbed amọ emaekpọñ abio ami.

²⁰Ke ayo amaakesieere, nte ammọ esañake ke usʌñ, ammọ emaekịt ke eto fik ado amaayeppe atọọñọ ke adʌñ.

²¹Bita amaatoiyo anyʌñ abo Yisọs ate, “Andikpeeb, sese! Eto fik a-afo akesuuñọke aduọkkọ mfañ.”

²²Yisọs amaabọọrọ anye. “Nie mbuọdidem ke Abasi.”

²³“Ke akpanikọ ke ami ntañ ami inọ ndufo, adieke awo ake adodo abooho abod ami, ‘Dakka ke top idem mfo sịn ke akpa inyañ,’ anye mmiinieeghe eyịghe ke esịd amọ, ado anịm ke akpanikọ, ke se anye atañ ayaatịppe, eyaenam enọ anye.

²⁴Ke ntodo, idọkkọ ndufo, se adodo a-ndufo ebeeñeke akam, inịm ke akpanikọ ke emebọ, ndin eyaebọ se ndufo ebeeñe ado.

²⁵Nko Umauda adibọñ akam, adieke adooho amenie ntʌk ye awo, feen nọ anye ma Ete mfo a-abaaha ke hefịn anyʌñ afeen mme idiọọkñkpọ mfo unọ fiin.

²⁶Adi adieke afo mmuudakkake unọ awo mfen, Ete mfo a-abaaha ke hefịn idiifeene mme idiọọkñkpọ mfo unọ fiin.”

²⁷Ammọ emaemaana ediwuọ ke Yerusedem, ñko ke ini Yisọs akesañake ke mme akwere tembịd, mme ikpọ aku, mme akpeeb ibed, ye mme adaidaha emaedi ebịne anye.

²⁸Ammọ emaedibịp anye ete, “Adudu ake-e ke afo adat anam afịd ami? Anie akeunọ fiin adudu adinam se afo anam ami?”

²⁹Yisọs amaabọọrọ ate, “Ami nyaibịp ndufo mbịme keed. Imaimbọọrọ miin, ndin ami nnyaidọkkọ ndufo nte ami ndat adudu nnam mme ñkpọ ami.

³⁰Uduọkmmọọñ Yọọn me aketo abio Abasi me aketo awo? Itañ innọ miin.”

³¹Ammọ emaedọñọ adu ke idem ammọ ete, mmimọ ikpibo. “Ato abio Abasi, anye ayaibịp, ‘Ntak a-ndufo mmiikinịmme anye ke akpanikọ-ọ?’

³²Ado ñnyịn ikpibo, ‘Aketo awo.’ ” (Ammọ ekebaak atu awo, sia afịd awo emaenịm ke Yọọn akedo ayọhọ brọfed.)

³³Do ndin ammọ emaebọọrọ Yisọs ete: “Ñnyịn idiọọñọke.” Yisọs amaabọọrọ ammọ ate: “Ami ndinyʌñọ ntañ inọ ndufo nte ndat adudu nnam mme ñkpọ ami.”