Read Ibibio Contemporary Bible 2020 Maak 12 Bible Online

Maak 12 - Ibibio Contemporary Bible 2020 bible

Maak 12

¹Ndin Yisọs amaatọọñọ aditañ ikọ inọ ammọ ke ñke, ate: “Awo keed aketọ inwañ fain. Anye amaabọp ibene akanna inwañ ado, atịppe ube unyịmme ukọd anyʌñ abọp itie uyeb. Anye amaaben inwañ ami anọ mme atọiñwañ anyʌñ aka isañ ke abio mfen.

²Ini idọk amaakekem anye amaadọñ ayịnufọk ate aka akebọ mme atọiñwañ ami mfịd inwañ.

³Ado ammọ emaemʌm ayịnufọk ami etịm, enọ anyọñ ubọk-ubọk.

⁴Akem anye adọñ ayịnufọk mfen aka abịne ammọ; ammọ emaemia awo ami ke iwuod enyʌñ esuenne anye.

⁵Anye amaamaana anọ awo mfen aka, anye ami ammọ emʌm ewot. Anye amaanọ umiañ mbio mfen; ammọ etetịm usʌk, enyʌñ ewowot usʌk.

⁶“Anye amaanie awo keed a-akesʌhọke anye adidọñ, ayịn amọ awodeen, a-anye akemaaha. Anye akeanọ anye aka akpatre, abo ate, ‘Ammọ eyaekpono ayịn mmi.’

⁷“Ado mbon e-ekenọọhọ inwañ ekama etie edioomo ke idem ammọ ete, ‘Adia akpa ammọ ado ami. Idi, yak iwot anye, akpa iñwan fain a-anye akpediaaha ayaakappa ado ake ñnyịn.’

⁸Ado anam ammọ emʌm anye ewot, etop akpo amọ esio ke inwañ fain ado.

⁹“Nso-o ndin ke andinie inwañ fain ami adinam? Anye ayaadi adiwot mbon e-ekekamake inwañ fain ami, anyʌñ aben inwañ ami anọ mbon mfen.

¹⁰Ndufo ikoodo se ewet ke ñwed Abasi ami ete, “ ‘Itiad a-mme abọbufọk ekesịnne akappa ado ekamba itiad inuuk.

¹¹Abọọñ anam ami, ado utịbe ñkpọ ke anyen ñnyịn.’ ”

¹²Mme ikpọ aku, ye mme andikpeeb ibed ye mme adaidaha emaeyem usʌñ naña ekpedat emʌm anye, sia ammọ emaediọọñọ ke anye aketop ñke ami ibaña mmimọ. Ado ammọ ekebaak atu awo; ado anam ammọ emaedakka ekpọñ anye, enyọñọ.

¹³Akem ammọ edọñ mme Farisi ye mbon se isañña ke ukpeeb Herọd emaebịne Yisọs nọ ekemʌm anye ke ikọ inua amọ.

¹⁴Mbon ami emaeka ebịne anye ete, “Andikpeeb, ñnyịn imidiọọñọ ke afo ado awo akpanikọ, awo ikanna aduben fiin ntịn usʌñ sia afo ubaaha awo anyen, ado akpeeb usʌñ Abasi ke akpanikọ. Me anen ñnyịn adikpe taksi nnọ Sisa, me inenne?

¹⁵Ikpe me itre adikpe?” Ado Yisọs amaadiọọñọ ñkara ye ndubịk esịd ammọ. Anye amaabịp ammọ ate, “Ntak a-ndufo ekọọhọ afia ennọ miin-e? Iben akʌk ado idi nọ ami nse.”

¹⁶Ammọ emaeben akʌk ado edi. Anye abịp ammọ ate, “Ndise anie ido ami? Ñkpọ e-ewette mi abaña anie?” Ammọ emaebọọrọ ete, “Ake Sisa.”

¹⁷Ndin Yisọs amaabo ammọ ate: “Iyaak ñkpọ se inie Sisa inọ Sisa, ndin se inie Abasi iyaak inọ Abasi.” Idem amaakpa ammọ eti-eti.

¹⁸Ndin mme Sadusi, mbon a-mmiinịmme ibo ke adised ke ñkpa aba, emaeben mbịme ebịne anye ete,

¹⁹“Andikpeeb, Moses amaawet abo, awodeen akpekpa akpọñ anwaan a-adiimanna ayịn, ayịneka amọ ana aben ebekpa anwaan ado adọ nọ abon nditọ anọ anye.

²⁰Amaaba nditọeka ideen itiaba. Akpa adọ anwaan, akpa inieeghe ayịn.

²¹Ayọhọ iba adiben ebekpa anwaan ayịneka adọ, ado anye ñko adikpa inieeghe ayịn. Ukem ado aketịppe anọ ayọhọ ayịneka awodeen ita.

²²Ke ata aditʌm ntañ, bene keed ke atu nditọeka itiaba e-ekedọọhọ añwan ami ikinieeghe ayịn ito awonwaan ami. Ke akpatre, awonwaan ñko anyʌñ akpa.

²³Ke ini adised ke ñkpa, anwaan anie ke atu ado ke anye adido, sia naña awo itiaba emaedọ anye?”

²⁴Yisọs amaabọọrọ ate, “Ikịtte ke ndufo emenam ndudue sia ndufo idiọọñọke ikọ Abasi ye adudu Abasi?

²⁵Mme akpañkpa emaeset, ammọ idiidọọhọ ndọ idiinyʌññọ inọ ke ndọ; ammọ ediitie nte mme enyere ke abio ubọọñ Abasi.

²⁶Ke abaña mme akpañkpa adised, ado nte ndufo ikoodo ke ñwed Moses ke mbʌk i-ikañ aketaaha ikọd, naña Abasi akebo Moses ate, ‘Ami ndo Abasi Ebraham, Abasi Aisik, ye Abasi Yekọb?’

²⁷Anye idooho Abasi mme akpañkpa, ado Abasi mme aduuwem. Ndufo emenam ata akpan ndudue.”

²⁸Keed ke atu mme andikpeeb ibed a-akediighe abịne Yisọs amaakop nte ammọ esʌk efaaña mfaaña. Anye akekop ke Yisọs amaanọ ammọ nneke-nneke ibọọrọ, anye amaabịp anye ate, “Ke atu afịd ibed, ake-e akpon akan?”

²⁹Yisọs amaabọọrọ ate, “Andikpon ñkan ke afịd ibed ado ami: ‘Kpañ utọñ, O Isred: Abọọñ ye Abasi ñnyịn ado keed, anye ado Abasi keed kpọd.

³⁰Ma Abọọñ ye Abasi mfo ye ke afịd esịd mfo ye ke afịd ukpọñ mfo ye ke afịd akikere mfo ye ke afịd adudu mfo.’

³¹Ayọhọ iba ado ami: ‘Ma mbọhọidʌñ mfo nte idem mfo.’ Ibaaha ibed a-akponno akan ami.”

³²Awo ami amaabọọrọ ate, “Andikpeeb, ametañ afọn, ado ata nnen-nnen afo adibo ke Abasi ado keed, ke mfen ibaaha ke mmiibọhọke anye.

³³Adima anye ke afịd esịd mfo ye ke afịd ifiọk mfo, ye ke afịd adudu mfo anyʌñ ama mbọhọidʌñ mfo, naña afo ama idem mfo, akpon akan adifọp uwa ye mme nsio-nsio uwa mfen nnọ Abasi.”

³⁴Ke ini Yisọs amaakekịt ke anye amaabọọrọ ye ayọhọ ifiọk, anye abo anye ate: “Afo unyọọñọ usʌñ ukpọñ abio ubọọñ Abasi.” Tọọñọ ado awo nte keed ikibịppe anye mbịme aba.

³⁵Ke ini Yisọs asʌkkọ akpeeb ñkpọ ke mme akwere tembịd, anye amaabịp mbịme ami ate, “Ntak a-mme andikpeeb ibed ebooho ke Mesaya ado ayịn Defid-e?

³⁶Defid ke idem amọ, ke ini atañña ikọ ato ke adudu Adisana Sịbidịd, amaabo anwa-anwa ate: “ ‘Abasi abo Abọọñ mmi ate, “Tie ke ubọk nnasia mmi tutu ami nnam asua mfo ado ñkpọ udodukod mfo.” ’

³⁷Defid ke idem amọ akood anye ‘Abọọñ.’ Anye akeme die ndin adido ayịn Defid?” Akwa atu awo emaekpañ utọñ ekop ikọ amọ ye inemesịd.

³⁸Naña Yisọs akpeebe ñkpọ, anye abo ammọ ate, “Ikpeme idem ndufo ke eduuwem mme andikpeeb ibed sia ammọ ema adisịne ikpọ afọñ nsaña, enyʌñ eyem afịd awo etuak iwuod ekpono mmimọ ke añwa udua,

³⁹enyʌñ ema mme ikpọ itie ke mme sinakọk ye itie ukpono ke mme usọrọ ndia.

⁴⁰Ammọ ema adiwood mme ebekpa; ebọi ammọ mme itie idʌñ ammọ, enyʌñ ema adibọñ ñnyan akam. Mme utọ ibon ami eyaebọ ekamba ufen.”

⁴¹Yisọs amaasuuk atie ke nsak iso akebe usịn enọ anyʌñ ase naña mbon awo esịn enọ ke itie unimnkpọ tembịd. Uwak mbon imọ emaesịn uwak akʌk.

⁴²Ado ebekpa keed a-akedooho uweene amaasịn ata akpatre akʌk amọ, anini iba a-akesịppe akan kobo keed.

⁴³Yisọs amaakood mbed amọ anyʌñ abo ammọ ate, “Ke akpanikọ ke ami idọkkọ ndufo nte ke uwueene ebekpa ami asịn akʌk ke ñkpọ usịn akʌk akan afịd mbon ñko.

⁴⁴Afịd ammọ ekenọ ubaak ke atu uwak inie ammọ, ado awonwaan ami, ke idaha uweene amọ, amaaben afịd se anye akpedat adu uwem adinọ.”