Read Ibibio Contemporary Bible 2020 Maak 16 Bible Online

Maak 16 - Ibibio Contemporary Bible 2020 bible

Maak 16

¹Ke usen Sabad amaakeboiyo, Mmeri Makdadin ye Mmeri eka Yemsi, ye Sadomi emaekedep inem ufịk adan nọ eben ekefiọññọ akpo Yisọs.

²Ke akpa ubakusen ke akpa usen udua, idaha utịn atọọñọke adinyan iso, ammọ edika udi

³ammọ emaeneme ke idem ammọ ete, “Me anie idiikikpat itiad isio ke inua udi?”

⁴Ado ammọ ekekewuọ edịppe anyen ese, ammọ ekịt ke emaekpakpat itiad esio ke inua udi, itiad amaakenekke ikpon.

⁵Ke ini ammọ ekeesọiyọke edʌk udi, ammọ emaekịt akparawa keed akesịneke anyan afia afọñidem naña atie do ke ubọk nnasia, ndịk amaanam ammọ.

⁶Anye ammabo ammọ ate, “Ikiikop ndịk. Ndufo eyem Yisọs Ayịn Nasared e-ekekọññọ ke eto krọs. Anye amaaset! Anye ibaaha mi. Idi idise itie e-ekenịmme anye.

⁷Ado ika ikidọkkọ mbed amọ, ye Bita ibo ke, ‘anye abem ndufo iso aka Kadidi. Do ke ndufo ediikịk anye naña anye aketañ.’ ”

⁸Ye ñnyeñidem ye ñkpaidem, ibaan ado emaefeeñe ewuọọñọ ke udi. Ammọ ikiitañña ñkpọ ntekeed inọ awo, ato naña ndịk akeanam ammọ. [Mme uwak ñwed emaekememịñ ye mme ntiense esed inieehe mme ufañ usʌkkeed tutu asịm edịb 9-20.]

⁹Ke Yisọs amaakeset ubakusen ke akpa usen udua, anye amaato ayaara idem anọ Mmeri Makdadin, awonwaan a-anye akebịnne ndiọi sịbidịd itiaba asiooño ke idem.

¹⁰Mmeri ndin aka akebʌk anọ mbon e-ekesibaagha ye anye, e-ekebonoke ke mfʌhọ ye ntua ayịd.

¹¹Ke ammọ ekoppo ke anye amaaset, ke Mmeri amaakịt anye, ammọ ikiinimme ke akpanikọ.

¹²Ndubi usen ado, anye ayaara idem anọ awo ammọ iba ke usʌñ naña esañake eka abio inwañ; ado ammọ ikidiọọñọke anye sia anye amaakpəho idem asịn ke uduod mfen.

¹³Ndin ammọ emaeka eketañ enọ mbon ñko; ado ndomo awo ammọ keed ikinịmme ke akpanikọ.

¹⁴Akekem anye amaayaara idem anọ mbed duob ye keed ke itie ammọ ekebonoke edia ñkpọ. Anye anyʌñ asua anọ ammọ ke isọñesịd ammo enieghe ye unana adinịm mbon se ikikịt anye emaekeditañ inọ ammọ.

¹⁵Anye ndin abo ammọ ate, “Ikaa ke afịd ekondo ikikwọrọ eti etob ami inọ afịd awo.

¹⁶Awo ake adinịm ke akpanikọ, anyʌñ abọ uduọkmmọọñ, eyaenyaaña anye, ado awo ake atre adinịm ke akpanikọ, ikpe ayaabiom anye.

¹⁷Ndin mme idiọọñọ ami eyaekeene mbon se inịm ke akpanikọ: ke anyịñ mmi ammọ eyaebịn mme ndiọi sịbidịd; eyaesem ufa usem;

¹⁸ammọ eyaemʌm udʌkikọd ke ubọk, ndin adieke ammọ enwọññọ ibọk ñkpa, idiinamma ammọ idiọọk; ammọ eyaedot mbon udọñọ ubọk ndin ammọ eyaekop nsọñidem.”

¹⁹Ke Abọọñ Yisọs amaaketañ mme ikọ ami ima, emaeben anye edọọk ke hefịn, anye anyʌñ asuuk atie ke ubọk udom Abasi.

²⁰Ndin ibed ewuọọñọ ekekwọrọ ikọ afịd itie, Abọọñ anyʌñ adat ammọ anam utom, ndin anyʌñ asọọñọ ukwọrọ ikọ ammọ ke adinam mme utịbe idiọọñọ.