Read Ibibio Contemporary Bible 2020 Maak 2 Bible Online

Maak 2 - Ibibio Contemporary Bible 2020 bible

Maak 2

¹Ñkpọ nte usen ifañ amakeboiyo, Yisọs amaatịmme adi Kapanọm, ndin etob anyʌñ asuana ate ke anye adi ufọk.

²Mme awo e-ekediighe ikịt anye emaewak tutu, ufañ ikibaaha ke ufọk, ukpọk ke esiin, ndin anye asʌk akwọrọ ikọ anọ ammọ.

³Ke ini Yisọs asʌkkọ akwọrọ ikọ anọ ammọ, mme awo inaañ emaeben awo akpaubeñ keed esọk anye.

⁴Sia awo ekewakka ebọhọ, ammọ ikikanna inam nọ awo akpaubeñ ami akịt Yisọs, ammọ eketịppe akọm ke anyọñ ntie Yisọs akedaaha enyʌñ esuuk awo akpaubeñ ami ke aya anye akenaaha.

⁵Yisọs amaakekịt mbuọdidem ammọ, anye abo awo akpaubeñ ami ate: “Ayịn, efeen unọ ke ndiọiñkpọ mfo.”

⁶Ubaak mme ekpeeb ibed e-ekeetiehe ke itie ado, emaekere ke esịd ammọ ete:

⁷“Ntak awo ami atañña ikọ ntom-o? Anye asuuk Abasi uyo! Anie awo ikeme ifeen idiọọkñkpọ awo ibọhọke Abasi ikpọọñ?”

⁸Idaha-idaha ado, Yisọs amaadiọọñọ ke sịbidịd amọ ke se ammọ ekekere ke esịd ammọ, ke ntoro anyʌñ amaabịp ammọ ate, “Ntak a-ndufo ekereke utọ mme ñkpọ ami-e?

⁹Anye ake-e imem ikan: adibo awo akpaubeñ ami, ‘Efeen mme idiọọkñkpọ mfo,’ me adibo, ‘Dakka da, ben aya mfo nyʌñ saña’?

¹⁰Ado ami nnam ami adiwọt ndufo ke Ayịn Awo anie adudu ke isọñ ami adifeen mme idiọọkñkpọ.” Ndin anye amaabo awo akpaubeñ ate,

¹¹“Ami ubo fiin nte, dakka da, ben aya mfo nyọñ ufọk.”

¹²Anye amaadakka ada ke iso afịd ammọ, aben aya amọ asaña anyọñ. Ami amaakpa afịd awo idem, ammọ enyʌñ ekọọm Abasi ete, “Kpaanam ñnyịn ikịtte utọ ñkpọ ntom!”

¹³Yisọs amaamaana awuọ akeba akpere ibiok Kadidi. Uwak atu awo emaekeene anye, anye amaanyʌñ atọọñọ ikpeeb ammọ ñkpọ.

¹⁴Naña anye ake asʌkkọ asaña do, anye amaakịt Difai, ayịn Afiọs nte atie ke atayad ubọ taksi. Yisọs ate anye, “Ñkeene miin.” Ndin Difai adakka akeene anye.

¹⁵Naña Yisọs ake abaaha ke itie ndidia ke ufọk Difai, uwak mme abọ taksi ye mme “anam ndiọiñkpọ” emaekeene Yisọs ye mme mbed amọ edia ñkpọ, sia uwak mbon awo ntom emaesịne ke atu awo e-ekekeeneke anye.

¹⁶Ke mme andikpeeb ibed e-ekedoññoke Farisi ekịtte nte anye adia ñkpọ ye mme anam ndiọi ye mme abọ taksi, ammọ ebịp mbed amọ ete: “Ntaha eteufọk ndufo adiaaha ñkpọ ye ndiọi awo-o?”

¹⁷Ke adikop ami, Yisọs amaabọọrọ ate, “Idooho mbon i-idem asọññọ eseeyem abiaibọk, ado mbio idem mmiisọññọ. Ñkediighe adikood mme ndinen awo, ñkedi nnọ ndiọi awo.”

¹⁸Mbed Yọọn Aduọkmmọọñ ye mme Farisi emaesitie utreudia. Ado amaanam mme awo edibịp Yisọs ete, “Ntak adooho mme mbed Yọọn ye ake mme Farisi esitre udia, ado ake mfo, itreke-e?”

¹⁹Yisọs amaabọọrọ ammọ ate, “Mme isenawo ebendọ ekeme aditre udia ke ini ebendọ abaaha ye ammọ? Ikemekekeme, adaña ini nte anye abaaha ye ammọ.

²⁰Ado ini ayaadi e-ediiben ebendọ idakka ikpọñ ammọ, ini ado ndin ke ammọ ediitre udia.

²¹“Awo ndomokeed idatta ufa afọñ idian ke akaan ikịm. Akpenam ntodo, ufa ayaawaak akaan afọñ anam anye awakka akan naña akedo.

²²Ñko awo inwaññake ufa ukọd isịn ke akaan ikịm. Akpenam ntodo, ukọọd ami ayaabom ikịm, ndin ukọọd ye ikịm etak. Iyoo, eseenwañña ufa ukọọd esịn ke ufa ikịm.”

²³Usen Sabad keed Yisọs ye mme mbed amọ ekesaña eboiyo ke inwañ akpakpa. Nte ammọ ekesañake ntom, mme mbed amọ emaetọọñọ adikịppe mme akpakpa.

²⁴Ndin mme Farisi emaebo anye ate, “Kap se, ntaha mme mbed mfo enamma ñkpọ ami ibed akpanna ke usen Sabad-a?”

²⁵Anye amaabọọrọ ate, “Kpaanam ndufo ikoodo se Defid akenam naña abiọñ akedọññọ anye mme nsaña amọ?

²⁶Ke ntak ami, anye adʌk ufọk Abasi ke ini Abiata akedooho akwa aku, anyʌñ aben adisana uyo ata, adooho ibed akebo yak mme aku ikpọọñ eta. Anye amaanyʌñ anọ mme nsaña amọ ubaak.”

²⁷Akem anye abo ammọ ate, “Ekenam Sabad enọ awo, ikinamma awo inọ Sabad.

²⁸Ke ntak ami, Ayịn Awo ado Abọọñ kpa ake Sabad.”