Read Ibibio Contemporary Bible 2020 Maak 3 Bible Online

Maak 3 - Ibibio Contemporary Bible 2020 bible

Maak 3

¹Ini mfen Yisọs amaatịmme aka sinakọk, ndin awo keed a-akenieeghe ñkpa-ikpa ubọk amaaba do.

²Usʌk awo e-ekeyemme ntak adibo ke anye abiad ibed mmọdo ekeba ñko, ndin ammọ emaewuuk anyen ese me anye ayaakọk awo ado udọñọ ke usen Sabad.

³Yisọs amaabo awo ñkpa-ikpa ubọk ate, “Dakka da ke iso afịd awo.”

⁴Ndin Yisọs amaabịp ammọ mbịme ate, “Anye ake-e ke ibed ayak enam ke Sabad: adinam etiñkpọ me adinam idiọọk, adinyaaña awo uwem me adiwowot?” Ado ammọ ikisiooho uyo.

⁵Anye ndin akanna ase ammọ ye iyadesịd, afʌhọ eti-eti ke ntak isọñ esịd amọ, anyʌñ abo awo ado ate, “Nyanna ubọk mfo.” Anye anyan, ndin ubọk amọ amaana afọn ukeed-ukeed.

⁶Idaha-idahado mme Farisi ewuọọñọ ke itie ubọñ akam enyʌñ eketọọñọ adidʌk edioomo ye mbon ñka Herọd naña ammọ ekpesaña iwot Yisọs.

⁷Ndin Yisọs ye mbed amọ emaekpọñ eka ibiok, ekamba atu awo emaeto Kadidi ekeene anye.

⁸Mme awo emaekekop afịd se anye akenam, uwak awo emaeto emaedibịne anye eto Yudia, Yerusedem, Idumia ye mme ñkan-ñkʌk ukañ Yọdan ye mme ukañ Taya ye Sidọn.

⁹Ke ntak atu awo ami, anye amaabo mbed amọ ate yak ammọ ebọ etək ubom enịm inọ imọ, mbaak mme atu awo ami edifʌk imọ.

¹⁰Sia anye amaakọk uwak awo udọñọ, mme adọñọ nsio-nsio udọñọ emaenək idem edi iso nọ ekan etụụk anye.

¹¹Ini keed akeedodo ami ndiọi sịbidịd ekịtte anye, ammọ emaeduọññọ ke isọñ ke iso amọ ebọọñ ñkpo ete, “Afo ado Ayịn Abasi.”

¹²Ado anye amaatʌm awuuk ammọ ate ammọ ekuuyaara se imọ ido inọ mbon afen.

¹³Akem Yisọs amaadọọk anyọñ abod anyʌñ akood mbon se anye akeyem, ndin ammọ ekaa ebịnne anye.

¹⁴Anye amaamek awo duop ye iba anyʌñ akood ammọ abọsịd, e-ediiba ye anye, mbon a-anye adidọñ nọ ekekwọrọ ikọ Abasi;

¹⁵ediinyʌñ inie adudu adibịn dimọn nsiooño awo ke idem.

¹⁶Awo duop ye iba a-anye akeamekke ado edoñño ami: Saimọn (a-anye akenyʌññọ anọ anyịñ Bita),

¹⁷Yemsi, ayịn Sebidi ye ayịneka amọ Yọọn (a-anye akekoodo ammọ Bonekesi, awuọọñọke “nditọ aduma”),

¹⁸Andru, Fidib, Batodomiu, Matiu, Tọmọs, Yemsi ayịn Afiọs, Tadiọs, Saimọn adooho Sidọd,

¹⁹ye Yudas Iskariọd, andikitap anye nnọ.

²⁰Ke ini Yisọs amaakedʌk ufọk keed, mme atu awo emaemaana edibəghe do tutu anye ye mbed amọ ikikanna idia ukpọk ndidia.

²¹Ke mme mbon ubon amọ ekoppo ami, ammọ emaeka adikpeme anye sia ammọ ekebo ete ke, “Iwuod aboiyo anye.”

²²Ndin mme andikpeeb ibed e-eketooho Yerusedem edi ekebo ete, “Anye anie Bedsibọb ke idem. Anye adat adudu abọọñ dimọn abịn dimọn asiooño awo ke idem.”

²³Do ke Yisọs akeakood ammọ nọ esaña ekpere anye anyʌñ abịp ammọ ke ñke ate: “Setan akeme die ibịn setan nsio?

²⁴Adieke abio ubọọñ abakka ada anwana ye idem amọ, abio ubọọñ ado ikemeke isọọñọ ida.

²⁵Adieke ufọk anieeghe ubakka, ufọk ado ikemeke ida ñko.

²⁶Ndin adieke Setan anwanake ye idem amọ, anye ñko ikemeke ida: awuọ utịd amọ adi.

²⁷Ke akpanikọ awo ndomokeed ikemeke adidʌk ufọk akpọsọñ awo ibọhọke anye abemiso abọp akpọsọñ awo ado. Do ndin ke anye akeme adibịmme ñkpọ ke ufọk awo ado.

²⁸Yak ñtañ akpanikọ inọ ndufo, eyaefeen afịd idiọọkñkpọ ye aditañ atịme-atịme enọ awo,

²⁹ado awo ake adodo a-atañña atịme abaña Adisana Sịbidịd, awo idiifeene idiọọkñkpọ amọ: ammọ enie ubiomikpe nsi-nsi idiọọknkpọ.”

³⁰Yisọs aketañ ami sia ammọ ekebo, “Anye anie ndedeghe sịbidịd.”

³¹Ndin eka ye nditọeka Yisọs emaediwuọ. Ammọ ematie ke añwa esiin, edọñ awo akekood anye inọ mmimọ.

³²Atu awo e-eketieeghe ekanna anye, ebo anye ete, “Eka mfo ye nditọeka mfo esʌk uyem ke añwa esiin.”

³³Yisọs amaabịp ammọ ate, “Mme anie ido eka ye nditọeka mmi?”

³⁴Ndin anye amaasuan anyen aseed mme awo e-eketieeghe ekanna anye ekʌk, anyʌñ abo ate, “Eka mmi ye nditọeka mmi edoñño ami!

³⁵Awo ake adodo a-anamma uduak Abasi ado ayịneka mmi ye eka mmi.”