Read Ibibio Contemporary Bible 2020 Maak 7 Bible Online

Maak 7 - Ibibio Contemporary Bible 2020 bible

Maak 7

¹Akem mme Farisi ye usʌk mme akpeeb ibed e-eketooho Yerusedem edi emaadibono ekaana Yisọs,

²emaenyʌñ ekịt naña usʌk mbed amọ edia ndidia ye mbaad ubọk, ado ado, ubọk a-awo mmiikiyeeghe.

³(Ke mbed mme Yuu ye mme Farisi, ido idʌñ ammọ akedo ke ana awo ayie ubọk mbemiso adia ñkpọ.

⁴Ñko, awo a-anyọñọ udua, anaayie ubọk mmiidooho ntodo inaaha adia ñkpọ. Ammọ emaenieeñe umiañ ido mfen nte uyed kọọb mmọọñ, ako utem ñkpọ, usan afere ye aketịd utem mmọọñ.)

⁵Ndin mme Farisi ye mme akpeeb ibed ami ekebịp Yisọs, “Ntak mbed mfo mmiiduho uwem ikeene ndutʌm ikpaisọñ mme eteete ammọ ke aditre adidia ñkpọ ye mbaad ubọk?”

⁶Yisọs abọọrọ ate, “Aisaya amaanen ke anye akeataaña atañ brọfesi abaña ndufo mbon ndubịk; nte ewette ebo ete: “ ‘Mbon ami eñkpono miin ke ñkpọkinua, ado esịd ammọ amaañkpọñ miin anyọọñ usʌñ.

⁷Ammọ eñkpono miin ke ikpu-ikpu usʌñ, ekeene ibed awo ke ukpeebñkpọ ammọ.’

⁸Ndufo emeesaana ibed Abasi eyak, enyʌñ esọọñọ emʌm ndutʌm ake ubọkawo ekama.”

⁹Anye amaaka iso adọkkọ ammọ ate, “Ndufo emekama ñkara ekpọñ item Abasi, ma enie ufañ etʌmmọ edu unam ñkpọ ndufo!

¹⁰Moses ke ibed akebo, ‘Kpono usọ ye uka’; nko ‘awo akeedodo asụụñọke ete ye eka amọ ana ewot anye.’

¹¹Ado ndufo ekedi, adibo ke awo akpebo ete ye eka amọ ke se ikpikidat ifọn ndufo mfọn ado Kọọban (adooho, asaña-asaña enọ a-anieeghe Abasi).

¹²Ke usʌñ ami ndufo iyakka ayịn anam ñkpọ ndomokeed anọ ete ye eka aba.

¹³Ntom ke ndufo eben ikọ Abasi eto ndọk, ekeene edu unam ñkpọ a-ndufo enọọhọ, ndin ndufo emenyʌñ enam umiañ ñkpọ akaaha ke utọ usʌñ ntom.”

¹⁴Ndin Yisọs amaatịmme akood atu awo abono, atañ ye ammọ ate, “Afịd ndufo ikpañ utọñ innọ miin inyʌñ inekke idiọọñọ ntom.

¹⁵Ñkpọ ndomokeed atooho adidʌk awo idem ikemeke isappa awo. Ado ñkpọ atoohoto awo idem awuọ, anye ado asappa awo.

¹⁶Awo ake anie utọñ adikop, yak anye akop.”

¹⁷Ke anye amaakekpọñ atu awo adʌk ufọk, mme mbed amọ emaebịp anye se ñke ado awuọọñọ.

¹⁸Ndin anye amaabịp ammọ ate, “Nte ndufo enana ifiọk ntom? Ndufo idiọọñọke ke se ito idʌk awo idem ikemeke isappa awo?

¹⁹Sia ñkpọ ado mmiidʌkkọ anye esịd, adʌk idịb kpọd, ndin awuọ anye ke idem.” (Anye aketañ ami adinam ammọ ediọọñọ ke afịd se awo adia ibaaha ake adiọọk.)

²⁰Anye amaasʌk akaiso akedọkkọ ammọ ate: “Se ito awo esịd idem iwuọ ado se isappa awo.

²¹Sia afịd mme ndiọi akikere eto esịd awo ewuọọñọ; nte use, inọ, uwod awo,

²²usịn efịbe, udọrọ itọñ, idiọọkesịd, abiaaña, ndukpo ido, ufịp, ubiad awo anyịñ, ntañidem ye ndisịme.

²³Afịd ndiọiñkpọ ami eto esịd awo ewuọọñọ enyʌñ esappa awo.”

²⁴Yisọs amaato do aka nkpere abio Taya ye Sidọn. Anye amaaboiyo adʌk ufọk keed, ikiiyeme awo ndomokeed adiọọñọ; ado anye ikikanna idịbe.

²⁵Awonwaan keed i-idiọọk sịbidịd akesịneke ke idem ayịn amọ awonwaan akesʌk akookop ke Yisọs mmọọ aba, anye amaadi aditọọñọ edọñ ke ukod amọ.

²⁶Mma ado akedo awo Krik, a-akemanake ke Siria Fonisia. Anye akpeiye Yisọs ate abịn dimọn asio ke idem ayịn imọ.

²⁷Yisọs ate mma ami, “Yak nọ nditọ eto edia ñkpọ nọ eyuuñọ, sia ifọnnọ adiben ndidia nditọ ntop nnọ ewa.”

²⁸Awonwaan ami amaabọọrọ anye, “Abọọñ, adot, sia mme ewa ke idak akpokoro esitañ mbeñe ndidia nditọ se iduọ ke isọñ edia.”

²⁹Yisọs ate anye, “Ato ke ntak ibọọrọ mfo ado, nyọñ ufọk, ke dimọn awuọ ayịn mfo ke idem.”

³⁰Awonwaan ado amaadakka anyọñ ufọk, akekịt ayịn amọ naña ana ke ikʌk anyʌñ akịt ke dimọn amaawuọ akpọñ anye.

³¹Akem Yisọs amaadakka akpọñ ñkpere Taya, asana Sidọn, aboiyo akewuọ mben inyañ Kadidi, ke ufọọd adaña Dekapodis.

³²Mme awo emaeben ete keed a-akedooho inan, atịmme ado imuum esọk anye, ekekpeiye anye ebo adot anye ubọk ke idem.

³³Ke anye amaasịkke adakka akpọñ atu awo ado, Yisọs amasịn awo imuum ami nnuun ubọk ke utọñ. Ndin anye akọkkọ etap atʌk anye ke edeme.

³⁴Anye amaabenne anyen ase hefịn, atuak mmịm, ndin ate, “Ephphatta!” (awuọọñọke “Sịtte!”).

³⁵Idahaado, utọñ awo ado amaasịtte, udʌk edeme akịppe, ndin awo ado atañ ikọ mfọn-mfọn.

³⁶Yisọs amaadʌt ammọ utọñ ate keetañ enọ ndomo awo keed. Ado naña anye akpakpan, naña ammọ ekeekaiso esuan mbʌk ami.

³⁷Sia idem amaakpa ammọ eti-eti ke utọ ñkpọ ado, afịd ammọ edian uyo keed ete, “Anye anekke anam afịd ñkpọ ọfọn ama, anye anam inan akop ikọ, imuum enyʌñ etañ ikọ.”