Read Ibibio Contemporary Bible 2020 Duk 1 Bible Online

Duk 1 - Ibibio Contemporary Bible 2020 bible

Duk 1

¹Uwak mme awo edomo ukeme adiwet mbʌk ñkpọ se ikitịppe ke ufọọd ñnyịn,

²ukem-ukem naña mbon se ikikịt inyʌñ ikwọrọ mme ñkpọ ado eketañ inọ ñnyịn.

³Ami ñko mmedat anyan ini ñkeene mbʌk ami usʌk-usʌk tọọñọ ke aditọọñọ. Ndin, Ete Tiofidọs, idahami ñyem adinekke ñwet mbʌk ami unọ fiin,

⁴nọ ato do afo anekke adiọọñọ se ido akpanikọ ke mme ukpeebñkpọ a-afo abọọhọ.

⁵Ke ini Herọd akedooho adidem ke Yudia, aku keed amaaba a-akekereke Sakaraya, a-akesịneke ke ikpeghe aku Abiya; anwaan amọ a-akekereke Edisabed, akenyʌñ ato ubon Erọn.

⁶Ammọ awo iba emaenam se ifọn ke iso Abasi, esaña ke afịd mme ibed ye ewʌghọ Abọọñ Abasi, enana ndo.

⁷Ado ammọ ikinieeghe ayịn, sia Edisabed akedo ada, ñko ammọ emaesọñ.

⁸Ke ini ikpeghe mme aku ake Sakaraya akenieeghe adinam utom, ndin Sakaraya ke idem amọ akeba ke utom nte aku Abasi,

⁹nte ido mme aku akesidooho, emaetop ukañ ndin emek anye ete adʌk tembịd Abọọñ afọp insensi.

¹⁰Idaha ufọb insensi amaakekem, afịd awo emaeda ke anwa ebọñ akam.

¹¹Ndin enyere Abọọñ amaawọt anye idem, ada ke ubọk nnasia itie unam uwa insensi.

¹²Idem amaanyeñ Sakaraya ke ini anye akekịtte enyere ami, ndịk amaañyʌñ anam anye.

¹³Ado enyere amaabo anye: “Sakaraya, kuufeghe ndịk, sia Abasi akop akam mfo. Anwaan mfo Edisabed ayaaman ayịn awodeen unọ, ndin afo uduukood anye Yọọn.

¹⁴Afo ayaakop idaara ye inemesịd, uwak awo ñko eyaedaara ke emana amọ,

¹⁵sia anye adido akwa awo ke iso Abọọñ. Anye idiinwọññọ mmịn me ukọd a-anaama awo, ñko anye ayaayọhọ ye Adisana Sịbidịd tọọñọ ke idịb eka amọ.

¹⁶Anye ayaanam umiañ nditọ Isred etịmme ebịne Abọọñ Abasi ammọ.

¹⁷Ndin anye ayaaboiyo Abasi iso ke sịbidịd ye adudu Edaiya, nọ anye anam esịd mme ete ewọññọ ese nditọ ammọ, anyʌñ anam mbon ntịdutọñ ekpeeb ifiọk eto mme anam unen, anyʌñ abeeñe mme awo idem anọ Abọọñ Abasi nte adotto.”

¹⁸Ado Sakaraya amaabịp enyere ate, “Ami ndiidat nso-o ndiọọñọ ke ñkpọ ami ayaado ntodo? Ami ndo akaan adeen, anwaan mmi anyʌñ asọñ ke isua emana.”

¹⁹Enyere amaabo anye ate, “Ami ndo enyere Kebreed andaaha ke iso Abasi; endọọdọñ ebo nditañ ikọ unọ ñnyʌñ mben eti mbʌk ami usọk.

²⁰Do ndin, afo ayaado imuum, uduutañña ikọ tutu usen ñkpọ ami amaadisu, sia afo ukunịmme ikọ mmi ke akpanikọ, a-adooho ayaasu ini amaakem.”

²¹Mme awo e-ekedaaha ke anwa ebet Sakaraya emaeba ke ñkpaidem ke anye adikpeene adiwuọ ndi ke tembịd.

²²Ke ini anye amaake awuọ adi, anye ikikanna itañ ikọ inọ ammọ. Ato ke ado, ammọ emaediọọñọ ete ke anye amaakịt ñkukịd utịbe ñkpọ ke tembịd, sia anye aketañ ikọ anọ ammọ ke ubọk sia anye akedidooho imuum.

²³Ke ini utom ammọ ke tembịd amaakekweeñe, anye amaadinyọñ ufọk amọ.

²⁴Akekem anwaan amọ Edisabed amaadiyommo, ado ke afịd afiọñ ition anye ikiwuọọhọ añwa.

²⁵Anye amaanyʌñ abo, “Abọọñ anam ami annọ miin, sia idahami anye añwọt miin mfọn amọ anyʌñ añkwokko abuud a-ñkediaaha ke atu awo.”

²⁶Ke ayọhọ afiọñ itiokeed tọọñọ Edisabed akeyommo, Abasi amaadọñ enyere Kebreed aka Nasared, ke abio Kadidi,

²⁷abịne adisịre abọikpa, a-Yosef awo ufọk Defid akeyemme idọ. Adisịre abọikpa ado akekere Mmeri.

²⁸Enyere ado amaakebo Mmeri ate, “Mmekọọm-o, afo a-ayọhọke ye mfọn; Abọọñ mmọdo ye afo.”

²⁹Esịd amaatịmede Mmeri eti-eti ke ikọ ami, ndin anye akere se utọ ekọm ami akpewuọọñọ.

³⁰Ado enyere amaabo anye ate, “Mmeri, kuunie ndịk sia Abasi afọn ido ye afo.

³¹Afo ayaayommo idịb anyʌñ aman ayịn awodeen, ndin afo uduukood anye Yisọs.

³²Anye ayaanie uku; ediikood anye Ayịn Abasi Andikoñ Ñkan. Abọọñ Abasi ayaanọ anye ebekpo ete amọ Defid,

³³anye ñko ayaakara ikọd ufọk Yekọb ke nsi-nsi, ndin ubọọñ amọ idiinieeghe utịd.”

³⁴Ndin Mmeri amaabịp enyere ate, “Ñkpọ ami adisaña die itịppe sia ami ndo adisịre abọikpa (a-mmendiọọñọke awodeen)?”

³⁵Ado enyere ate anye, “Adisana Sịbidịd ayaadudoro fiin ke idem, ndin adudu Abasi Andikoñ Ñkan ayaufʌk fiin. Ke ntodo, ayịn afo u-uduuman adido adisana, ediikood anye Ayịn Abasi.

³⁶Kap se Edisabed, ayakka mfo e-ekekoodo ada, anyʌñ ayommo ayịn awodeen ke ini usọñ amọ. Idahami anye asaña ye idịp afiọñ itiokeed.

³⁷Sia ikọ baaba keed a-atooho Abasi ikemekke adibiaaña.”

³⁸Mmeri amaabọọrọ anye ate, “Ami ndo ayịnufọk Abọọñ Abasi, yak atịppe annọ miin kpa naña afo atañ.” Ndin enyere amaadakka akpọñ anye.

³⁹Ami amaakedikweeñe, Mmeri amaadibeeñe idem asọp aka idʌñ keed ke mbood-mbood abio Yudia,

⁴⁰aka ufọk Sakaraya anyʌñ akọọm Edisabed.

⁴¹Edisabed akekop uyo ekọọm Mmeri, ayịn amaatuak ke idịb amọ; anye amaanyʌñ ayọhọ ye Adisana Sịbidịd.

⁴²Ndin Edisabed amaakwaha ñkpo idaara ate, “Afo ke Abasi adiọñ akan ke atu ibaan, anyʌñ adiọñ mfịd idịb mfo.

⁴³Ami nsaña die ndot utọ ukpono ami nọ afo nte eka Abọọñ mmi adinse miin?

⁴⁴Kpa idaha-idaha ado ami ñkoppo uyo ekọọm mfo, ayịn amaantuak ke idịb anọ idaara.

⁴⁵Adidiọñ anie anye ami anịmme ate ke mme enwọñọ ami Abọọñ Abasi akenamma anọ anye ayaadisu.”

⁴⁶Ndin Mmeri ate: “Ukpọñ mmi atooro Abọọñ

⁴⁷ñko sịbidịd mmi adaara ke Abasi Andinyaaña miin,

⁴⁸sia anye akoppo mbọm abaña usuuho itie afʌnanwaan amọ. Tọọñọ ke ami afịd emana eyaentommo miin nte anye ami Abasi adiọññọ,

⁴⁹sia anye a-anieeghe adudu anam ñkpoon-ñkpoon ñkpọ annọ miin, ndin anyịñ amọ ado adisana.

⁵⁰Mbọm amọ aba ye mbon e-ebaaha anye, tọọñọ ke emana keed tutu asịm emana mfen.

⁵¹Anye awọt adudu ubọk amọ; asuan mbon ñkịdidem ke mme akikere esịd ammọ.

⁵²Anye adooro mme adaubọọñ ke ebekpo ammọ, anyʌñ adịppe mbon usuuho itie.

⁵³Anye ayʌkkọ mbon abiọñ ye nti ñkpọ, anyʌñ abịn mbon imọ enyọñọ ubọk ukpọk.

⁵⁴Anye anwam Isred ikọd amọ, ke aditoiyo ntua mbọm

⁵⁵naña anye akenwọñọ anọ Ebraham ye ikọd amọ ke nsi-nsi, naña akenyʌñanwọñọ anọ mme eteete ñnyịn.”

⁵⁶Mmeri amaakaiso aba ye Edisabed ke ñkpọ nte afiọñ ita mbemiso atịmme anyọñ ufọk amọ.

⁵⁷Ini amaakedikem Edisabed adiman ayịn, anye amaaman ayịn awodeen.

⁵⁸Mme mbọhọidʌñ ye imaan amọ ekekop ete ke Abọọñ atua anye mbọm, ammọ emaedaara ye anye.

⁵⁹Ke ayọhọ usen itiaita, emaedi adikpịkke ayịn mfed ñnyʌñ nsio anye anyịñ, ekeyem adikood anye Sakaraya, ñkeene anyịñ ete amọ,

⁶⁰ado eka amọ amaafaaña ate, “Iyoo! Idooho ntodo, anaekood anye Yọọn.”

⁶¹Ado mme awo emaebo anye ete, “Ibaaha awo ke ekpək ndufo a-akereke utọ anyịñ ami.”

⁶²Do ndin enam idiọọñọ enọ ete amọ adibịp anye se anyịn anye akpeyem esio ayịn amo.

⁶³Sakaraya amaabịp anyʌñ abọ itiad ñwed awet: “Anyịñ amọ ado Yọọn.” Ndin idem amaakpa afịd ammọ.

⁶⁴Kpa idahado, inua amọ amaakʌppọ, edeme amọ anyʌñ atara, ndin anye amaatọọñọ itañ ikọ ntooro Abasi.

⁶⁵Akedo ata utịbe ñkpọ anọ mme mbọhọidʌñ, ndin afịd mme andidʌñ ke mbood-mbood abio Yudia eketañ ebaña mme ñkpọ ami.

⁶⁶Afịd mbon se ikikop mme ñkpọ ami emaekere ke esịd ammọ ete, “Me nso-o ke ayịn ami adido?” Sia ubọk Abọọñ Abasi mmọdo akeba ye anye.

⁶⁷Sakaraya amaayọhọ ye Adisana Sịbidịd, ndin anye atañ brọfesi ate:

⁶⁸“Itooro anie Abọọñ Abasi Isred, sia anye adise anyʌñ afak ikọd amọ.

⁶⁹Anye awuuk adaha adinyaaña inọ ñnyịn ke ufọk Defid ayịnufọk amọ,

⁷⁰(kpa naña anye aketañ ke inua mme ndisana brọfed amọ tọọñọ ke ini esed),

⁷¹ate ke iyainyaaña ñnyịn isio ke ubọk mbon usua ñnyịn, ye mbon a-ammiimaaha ñnyịn,

⁷²ke adiwọt mbọm anye akenwọñọke anọ mme eteete ñnyịn ye aditoiyo adisana adioomo amọ,

⁷³enwọñọ ami anye akenwọñọke anọ ete ñnyịn Ebraham:

⁷⁴ate imọ iyaisio ñnyịn ke ubọk mme asua ñnyịn nọ ato do inam ñkpọ inọ anye ke unana ndịk,

⁷⁵ye ke adisana ye unenido ke iso amọ afịd ayo uwem ñnyịn.

⁷⁶“Ndin afo ayịn mmi eduukood brọfed ake Andikoñ Ñkan; sia afo ayaabem Abọọñ iso akediọñ usʌñ anọ anye,

⁷⁷nọ ato ke adifeen mme idiọọkñkpọ ammọ, ikọd amọ ediọọñọ ebaña adinyaaña Abasi,

⁷⁸ato ke esịd mbọm Abasi ñnyịn, utịn asakka ato anyọñ inọ ñnyịn,

⁷⁹nọ anam unwaña asịm mbon e-ebaaha ke akịm ye ñkịmayo ñkpa, anyʌñ akpeme ikpad ñnyịn asịn ke usʌñ emem.”

⁸⁰Ayịn ado amaakọt anyʌñ akop adudu ke sịbidịd: anye ñko akedʌñ ke akpautatan tutu akem ini a-anye akeyaarake idem amọ anwa-anwa anọ Isred.