Read Ibibio Contemporary Bible 2020 Duk 11 Bible Online

Duk 11 - Ibibio Contemporary Bible 2020 bible

Duk 11

¹Usen keed Yisọs akebọñ akam ke itie keed. Anye akebọñ ama, mbed amọ keed abo anye ate, “Abọọñ, ikpeeb ñnyịn naña ebọñ akam, kpa naña Yọọn akekpeeb mme mbed amọ.”

²Anye amaabo ammọ, “Imaibọñ akam, ibo: “ ‘Ete, ukpono anie anyịñ mfo, yak abio ubọọñ mfo adi.

³Inọ ñnyịn se idia ke usen ke usen.

⁴Feen inọ ñnyịn ke mme ndiọiñkpọ ñnyịn, kpa naña ifeen inọ mbon e-edueeghe ñnyịn. Kuuyak ñnyịn idʌk ke idomo.’ ”

⁵Akema Yisọs amaabo ammọ, “Akpedo anam awo ndufo keed anie ufan, akem ufan ado adidi ke ufọọd akoneyo ate, ‘Ufan, ñwọọd ebəgho uyo ita,

⁶ke nnie ufan a-atooho anyanusʌñ isañ adi, ndin nnieehe ñkpọ se nnọ anye.’

⁷Akpenam ufan amọ asịne ke esịd ufọk abọọrọ, ‘Kuumfịna miin. Ñnyịn imaikọkọp usʌñ; ñko ami ye nditọ mmi imidọdʌk idab. Mbooho ñkan ndakka nda ndunọ ñkpọ ndomokeed idahami.’

⁸Idọkkọ ndufo ke akpesʌk ado anye mmiidiidakkake ida ke ntak a-anye adooho ufan amọ, ado ke ntak ufan amọ asʌkkọ asọñ ayịre anye, anye ayaadakka ada akenọ anye se anye ayeyem.

⁹“Ke ntak ado, ami ibo ndufo: ibeeñe ke eyainọ; iyem ke eyaekịt; ikọñ ke eyaebeere usʌñ inọ.

¹⁰Sia afịd awo se ibeeñe ebọ; awo a-ayemme akịt; anye a-akọññọ usʌñ eyaebeere usʌñ enọ.

¹¹“Anie ke atu ndufo e-edoññoke mme ete, ke ayịn ndufo akpibeeñe iyak anye aben udʌkikọd anọ?

¹²Me akpebeeñe ñkwaunen anye aben ikpeyen anọ?

¹³Adieke ndufo e-edoññoke mme ndiọi awo ediọọñọke adinọ nditọ ndufo nti enọ, nwaanwa di se Ete ndufo ndin a-abaaha ke anyọñ, anye ayaanọ Adisana Sịbidịd asọk mbon e-ebeeñeke.”

¹⁴Yisọs akebịn dimọn imuum asio awo ke idem. Dimọn ado akewuọ, imuum ado atañ ikọ; idem akpa afịd atu awo.

¹⁵Ado ubaak awo emaebo, “Anye akama Bedsibọb, abọọñ ndiọi sịbidịd, abịn ndiọi sịbidịd asio?”

¹⁶Usʌk awo emaedomo anye idomo ke adiyem idiọọñọ a-atooho anyọñ.

¹⁷Yisọs amaadiọọñọ akikere ammọ, ndin abo ammọ ate, “Abio ndomokeed a-abakkake ada ke idem ammọ ikpọọñ inieeghe nsọọñọnda; ufọk u-ubakka abaaha ana aduọ.

¹⁸Setan akpenwana ekọñ ye idem amọ, abio ubọọñ amọ abiisaña die ida? Ntañ ami sia ndufo ebo ke ñkama Bedsibọb mbịn ndiọi sịbidịd nsio.

¹⁹Akpedo ndat Bedsibọb mbịn ndiọi sịbidịd nsio, nso-o adudu ke mme ibed ndufo ekama ebịn esio? Ke ntak ami, ammọ eyaedo mme abiireikpe ndufo.

²⁰Ado akpedo ndat adudu ake ubọk Abasi mbịn ndiọi sịbidịd nsio, abio ubọọñ Abasi isịm ndufo.

²¹“Akpọsọñ awo a-amaakama ñkpọ uko ekọñ amọ ikpeme ufọk amọ, inie amọ ana ke emem.

²²Ado awo a-asọññọ adudu akan anye akpediñwana ye anye, akan anye ubọk, abọi anye mme ñkpọ uko ekọñ a-anye akedotto anyen, anyʌñ abakka ñkpoduoho se anye ama adat.

²³“Awo a-mmiidaaha ye ami, anwanwana ye ami, anye a-mmiinyʌññọ iñkeene miin itañ ibək, asuasuan.

²⁴“Idiọọk sịbidịd amaauwọ ke idem awo, anye ayooñ ke nsaad itie, ayem itie nte abọ nduọkadudu. Ke ini anye mmiikịtte itie, anye ate, ‘Ñyaatịmme ñnyọñ akpa itie añkebaaha.’

²⁵Ndin anye amaato idi, adikịt naña emaekekwọọk itie ado asana, etuum ñkpọ ebono.

²⁶Anye aka akekoono mme ndiọi sịbidịd itiaba mfen se idiọdiọi ikan anye, ndin ammọ eka ekedʌñọ do. Utịd awo ado akappa adiọọk akan ake akpa.”

²⁷Ke ini Yisọs asʌkkọ atañ mme ikọ ami, awonwaan ke atu ado amaabo ke akpọsọñ uyo, “Afọfọn anọ eka a-akumanna anyʌñ ubọọk fiin.”

²⁸Anye amaabọọrọ, “Afọfọn akap anọ mbon ekoppo ikọ Abasi enyʌñ enam se ekop.”

²⁹Ke mme atu awo emaekenekke ewak, Yisọs ate, “Emana ami ado ndoom emana. Anye ayem utịbe idiọọñọ, ado idiikịtte idiọọñọ mfen ikan anye e-ekenọọhọ Yọna.

³⁰Sia kpa naña Yọna akedo idiọọñọ anọ mbon Ninife, kpa ntodo ke Ayịn Awo adido inọ emana ami.

³¹Abọọñanwan Usuuk ñko ayaadakka ada anyʌñ abiom emana ami ikpe, sia anye amaato ke ata utịd ederimbod adi adikop aniọñ Sọdọmọn; idahami, se ikpon ikan Sọdọmọn mmọ mi.

³²Mbon Ninife eyaetie ke ikpe ebaña mbon emana ami enyʌñ ebiom ammọ ikpe; sia ammọ emaekappa esịd ato ke ukwọrọ ikọ Yọna; idahami, se ikpon ikan Yọna mmọ mi.

³³“Awo ndomokeed isidomoke utuenikañ inịm ke ndịbe itie, me iben isịn ke abañ ikʌp. Ado edomo utuenikañ edot ke ñkpọ udodikañ, nọ mbon se idʌk idi emọọnọ unwana ado.

³⁴Anyen mfo ado utuenikañ idem mfo. Anyen mfo amaafọn, afịd idem mfo ayọhọ ye unwana. Ado anyen mfo miifọnnọ, afịd idem mfo anyʌñ ayọhọ ye akịm

³⁵Kpeme, mbaak unwana a-abaaha ke idem mfo akuudo akịm.

³⁶Ndin adieke afịd idem mfo ayọhọke ye unwana, inyʌññọ iba itie akịm abaaha, afịd itie ayaayamma kpa naña unwana ikañ ayamma atọ awo.”

³⁷Yisọs aketañ ikọ ama, Farisi keed amaakood anye ufọk ate adidia ñkpọ ye imọ, ndin anye amaaka aketie abekke abere ke akpokoro ndidia.

³⁸Farisi ado akekịt ke anye ikitooho iye ubọk mbemiso adia ñkpọ (naña ido mme Yuu asido) idem amaakpa anye.

³⁹Ndin Abọọñ amaabo anye ate, “Ndufo mme Farisi esieeyet edem usan ye edem iko, ado esịd ndufo ayọhọ ye udʌditọñ ye ibak.

⁴⁰Ndufo mme ndisịme! Idooho andikinam esịd anam kpa edem ñko?

⁴¹Ado amaado se isịne ndufo ke idem, ifọn ido ye mbon uwueene, ndin afịd ñkpọ ayaado adisana inọ ndufo.

⁴²“Ifọnnọ inọ ndufo mme Farisi, sia ndufo enọ Abasi ubaak keed ke itie duob ke sutọ-sutọ ñkpọ inwañ, ado ndufo efre unen ye ima Abasi. Ekpesʌk enọ-ọnọ Abasi ubaak keed ke itie duob enyʌñ edian unen ye ima.

⁴³“Ifọnnọ inọ ndufo mme Farisi, sia ndufo emaaha ikpọ itie ke sinakọk ye ekọọm ke mme anwa udua.

⁴⁴“Ifọnnọ inọ ndufo mme Farisi, sia ndufo etie nte udi a-awo mmiinịmme idiọọñọ, ndin mme awo esaña ke anyọñ ado eboiyo ke unana ifiọk.”

⁴⁵Ataifiọk ibed keed amaabọọrọ Yisọs ate, “Andikpeeb, afo umautañ mme ñkpọ ami, afo amisọñ ñnyịn anyen ñko.”

⁴⁶Yisọs amaabọọrọ anye ate, “Ifọnnọ inọ ndufo mme ntaifiọk ibed, sia ndufo efiighe mme awo ye mbiomo a-ammọ mmiikanna ibiom; ndin ndufo inwamma ammọ ke usʌñ ndomokeed.

⁴⁷“Ifọnnọ inọ ndufo, sia ndufo ekọọk udi enọ mme brọfed, ado mme eteete ndufo ekewood ammọ.

⁴⁸Awuọ ndufo etie ntiense esọọñọ se mme ete ndufo ekenam; ammọ emaewot mme brọfed, ndin ndufo edikọọk udi enọ mme brọfed ado.

⁴⁹Ke ntak ami, Abasi ke aniọñ amọ amaabo ate, ‘Ñyaanọ mme brọfed ye mme abọsịd esọk ammọ, ubaak mme brọfed ye mme abọsịd ammọ eyaewot, usʌk ammọ eyaetʌkkọ.’

⁵⁰Ke ntak ado, eyaebịp mbon emana ami ebaña iyiib afịd mme brọfed se ekewowot tọọñọ ke ntọọñọ ederimbod,

⁵¹tọọñọ ke iyiib Ebeed tutu awuọ ake Sekaraya, e-ekewotto ke ufọọd itie uwa ye esịd tembịd. Ih, ke akpanikọ, emana ami ayaabọọrọ mbiime abaña afịd mme ñkpọ ami.

⁵²“Ifọnnọ inọ ndufo mme ntaifiọk ibed, sia ndufo emeben ukpọhọde ifiọk. Ndufo idʌkkọ, enyʌñ eda ebiọñọ mbon mfen e-ekesʌkkọ edọñọ.”

⁵³Yisọs akekpọñ itie ado, mme Farisi ye mme akpeeb ibed emaefaaña se anye aketañ enyʌñ eka iso etọ anye mme mbiime,

⁵⁴ebet adimʌm anye ke se anye aditañ.