Read Ibibio Contemporary Bible 2020 Duk 12 Bible Online

Duk 12 - Ibibio Contemporary Bible 2020 bible

Duk 12

¹Ke ini atu awo emaekeyọọhọ tutu mme awo edufiighe keed eken, Yisọs amaatọọñọ adikwọrọ ikọ ke akpa ifed nnọ mme mbed amọ, ate, “Ikpeme yis mme Farisi, a-adooho mbubịk.

²Ibaaha se efọfʌk a-mmiidiiyaarake, inyʌññọ iba se edịp a-mmiidiinaagha ke efenife.

³Ibaaha se afo atañ ke akịm, awo mmiidiikoppo ke uweeme, ndin adu a-afo adọññọ ke utọñ ke esịd ubeed eyaesuan ke mme akọm ufọk.

⁴“Mme ufan, ami ibo ndufo nte, ikiibaak mbon e-ekemeke iwot ikpọkidem kpọd ado ikanna inam ñkpọ mfen.

⁵Ado ñyaiwọt anye a-ndufo ekpebaaha: baak anye adooho amaawot ikpọkidem ima, amaana anie ukeme adutop nsịn ke ukpe ikañ nsi-nsi. Ih, ke akpanikọ, feghe anye ado.

⁶Idooho nsiak ition ke enyam ke kọbọ iba? Kpa ye ado, Abasi ifreke ammọ ba keed.

⁷Ke akpanikọ, ebat afịd ided iwuod ndufo. Ke ntodo, ikiifeghe ndịk; sia ekọmudua ndufo akpon akan uwak nsiak.

⁸“Mmaana idọkkọ ndufo nte, awo adiimben miin iwọt mme awo, Ayịn Awo ayaanyʌñ aben anye awọt mme enyere Abasi.

⁹Ado awo adiiñkañ miin ke iso mme awo, eyaenyʌñ ekañ anye ke iso mme enyere Abasi.

¹⁰Ndin eyaafeen enọ awo a-atañña ikọ adian Ayịn Awo, ado awo ake adodo a-asappake Adisana Sịbidịd idiinieeghe adifeen.

¹¹“Emaiben ndufo ika ke mme sinakọk, ke iso mme andikara ye mme ikpọ adaidaha, ikiikere se ediitañ ifakka idem ndufo,

¹²sia Adisana Sịbidịd ayaitemme se ediitañ.”

¹³Awo ke atu ado amaabo Yisọs ate, “Andikpeeb, dọkkọ ayịneka mmi abakka udeme ñkpọ akpa mmi annọ.”

¹⁴Yisọs abọọrọ anye ate, “Ete, anie akemmek miin nte abiireikpe me anam emem ke ufọọd ndufo?”

¹⁵Yisọs adian do ate, “Ikpeme! Iba ke mfadidem ibaña mme nsio-nsio idiọọk itọñ; uwem awo ikọñọke ke uwak ñkpọ se anye anie.”

¹⁶Ñko anye amaatop ñke ami anọ ammọ, “Isọñ imọ awo keed amaadʌk ñkpọ inwañ eti-eti.

¹⁷Imọ awo ami ate, ‘Nso-o ke ndiinam? Ami nnieeghe itie se mbon afịd uwak ñkpọ inwañ ami.’

¹⁸“Ndin anye ate, ‘Se mbo nnam ado ami. Nyaawuud mme ise mmi, mmaana mbọp ise se ikpoon, ndin ñyaakoono asọọ ñkpọ inwañ mmi ñkebono ke ndo.

¹⁹Amaama ami ñyaabo idem mmi, “Afo amenie uwak nti ñkpọ a-adiiba ikpeene ke uwak isua. Dat uwem usʌk-usʌk, dia, ñwọñ nyʌñ kop inem uwem.” ’

²⁰“Ado Abasi amaabo anye, ‘Afo ndisịmme awo! Kpa akoneyo ami eyaeyem uwem mfo uto fiin. Anie ndin adinie afịd se afo akekọ anịm anọ idem ado?’

²¹“Kpa ntom ke adiiwuọọñọ inọ awo a-abonno mme inie anọ idem amọ ado inieehe inie ake ukañ Abasi.”

²²Ndin Yisọs ate mbed amọ, “Ke ntodo ami ibo ndufo ikiifịna ibaña uwem ndufo, me nso-o ke ediidia; me ikpọkidem ndufo, me nso-o ke ediisịne.

²³Uwem akan ndidia, ikpọkidem anyʌñ akan afọñ.

²⁴Ikere ibaña mme inuen anyọñ. Ammọ itọọhọtọ, idọkkọdọk, inyʌññọ inie aba me ise; ado Abasi abọọk ammọ. Nwaanwa dise ndufo a-adooho emesọñ udua ekan mme inuen!

²⁵Anie ke atu ndufo ikeme adidian awa keed ke uwem amọ ato ke adifịna?

²⁶Adieke mmiikanna inam etək-etək ñkpọ ami, ntaha efịnake ebaña mbon ñko-o?

²⁷“Se naña mme ekpọñidịm ekọt. Ammọ inamma utom inyʌññọ ituak afọñ. Ado ibo ndufo ke Sọdọmọn ke afịd ubọọñ amọ ikisịneke afọñ se iyaiya nte keed ke atu mme ekpọñidịm ami.

²⁸Adieke Abasi akamake mme mbid inwañ ntom, a-adooho mfịn anye aba, ñkpọñ ewịppe etop ekọñ ke ikañ, die ke anye mmiidiisịnne ndufo afọn, O mbon etək mbuọdidem!

²⁹Kuunyʌñ usịn esịd mfo ke se uduudia me se uduunwọñ; kuukere ubaña.

³⁰Sia mme idʌñ ederimbod a-mmiidiọọñọke Abasi eyem mme ñkpọ ntom, ndin Ete ndufo adiọọñọ ke ndufo emeyem mme ñkpọ ami.

³¹Ikap iyem abio ubọọñ Abasi, ndin eyaedian afịd mme ñkpọ ami inọ ndufo ñko.

³²“Ikiikop ndịk, etək atu edọñ, sia Ete ndufo akop inemesịd adinọ ndufo abio ubọọñ Abasi.

³³Inyam inie ndufo idat inwam mme uwueene. Inọ idem ndufo ekpad akʌk a-mmiidiitahake, ñkpọuto ke abio Abasi a-mmiidiikpụụhọ, i-inọ mmiidiikpereke, utañkpọ inyʌññọ ibiad.

³⁴Sia nte ñkpọuto mfo ana, kpa ke ndo ke esịd mfo adiiba.

³⁵“Isiine afọñ, ibeeñe idem utom, inam utuenikañ ndufo asak,

³⁶nte mbon e-ebeeñeke idem ebet eteufọk ammọ ato usọrọ ndọ adi, nọ ato do anye amaato adi adikọñ usʌñ ammọ ebeere ini keed enọ anye.

³⁷Adiifọfọn inọ nditọufọk e-eteufọk adiito idikịt ammọ naña eba ke mbeeñeidem. Ke akpanikọ ke ibo ndufo, eteufọk ayaasịne afọñ aba ke mbeeñeidem, abo nditọufọk esuuk etie ke akpokoro ndidia, ndin anye ayaadise ñkpọ abaña ammọ.

³⁸Adiifọfọn inọ mme nditọufọk e-eteufọk adiito idikịt naña ammọ eba ke mbeeñeidem, ñkọm ke ufọọd akoneyo me idaha ayo abooho isieere.

³⁹Ado diọọñọ ntom: adieke anieufọk akpekediọọñọke me nso-o utọ ini inọ adidi, anye ikpikiyakka nọ inọ abom adʌk ufọk amọ.

⁴⁰Ndufo ñko ana eba ke mbeeñeidem sia Ayịn Awo ayaadi ke idaha ndufo mmiikibeeñeke ibet anye.”

⁴¹Bita amaabịp ate, “Abọọñ, afo atop ñke ami inọ ñnyịn me atop anọ afịd awo?”

⁴²Abọọñ amaabọọrọ ate, “Anie ndin ado eti ase ñkpọ mbaña mbon utom a-anamma akpanikọ, e-eteufọk anịmme ke iwuod nọ akpe akʌk ndidia anọ mbon utom ke akem ini?

⁴³Ayaafọn inọ ayịnufọk e-eteufọk anyọñọ adikịt naña anye anam se ekebo anam.

⁴⁴Ke akpanikọ ke ibo ndufo, ayaanịm anye ke iwuod afịd ñkpọ se anye anie.

⁴⁵Ado ayịnufọk akpekere ke eteufọk imọ atinyọñ idi ayaakpeene, atọọñọ adifiomo mme nditọufọk mbon ñko, ata, anwọñ, akpa mmịn,

⁴⁶eteufọk amọ ayaanyọñ adi ke ini anye mmiikikpeññe idem. Eteufọk amọ ayaadinọ anye ufen anyʌñ abịn anye nọ akeba ye mbon a-ammiinịmme Abasi ke akpanikọ.

⁴⁷“Ayịnufọk a-adiọọñọke uduak eteufọk amọ ado inamma mbeeñeidem, inyʌññọ inam se eteufọk amọ ayem enam, ayaabọ uwak ntiim.

⁴⁸Ado ayịnufọk a-mmiidiọọñọke uduak eteufọk amọ ado anam ñkpọ se idot ufen, ayaabọ etək-etək ufen. Awo ake enọọhọ uwak, eyaebịp uwak ñkpọ eto anye; ñko awo e-eyaakka uwak ñkpọ esịn anye ke ubọk, eyaenyʌñ eyem uwak ñkpọ eto anye.

⁴⁹“Ami ñkedi adiben ikañ ndisịn ke ederimbod; ubaha nte adooho ikañ ado amaasaasak!

⁵⁰Ami mmenie uduọkmmọọñ adina, ndin se naña mba ke mfʌhọ tutu uduọkmmọọñ ado akweeñe!

⁵¹Ekere ke ñkeben emem ndi isọñ? Iyo-o, ñkeben ubakka.

⁵²Tọọñọ ke idahami, awo ition eyaeba ke ubon, ndin ubakka ayaaba ke ufọọd ammọ, ita eyaeda esak iso ese iba ako, iba eyaenyʌñ ekanna iso ese ita ako.

⁵³Ubakka ayaaba ke ubon, ete ayaatuagha ye ayịn awodeen amọ; ayịn awodeen ye ete, eka atuagha ye ayịn awonwaan amọ; ayịn awonwaan ayaanyʌñ atuagha ye eka; eka ebe ayaadiañña ye anwaan ayịn amọ; anwaan ayịn ayaanyʌñ atuagha ye eka ebe.”

⁵⁴Yisọs amaatañ anọ atu awo ate, “Ndufo imaikịt naña idiọọk anyọñ ato usobutịn, ndufo ete, ‘Edịm ayaadep,’ edịm anyʌñ adep.

⁵⁵Ñko afịm atooho usuuk amaafịme, ndufo ete, ‘Ayo ayaada mfịn,’ anye anyʌñ ado ntodo.

⁵⁶Mme mbubịk! Ndufo emediọọñọ naña ese anyọñ etañ naña ayo adiiba. Anam die ndin nọ ndufo mmiikanna ikappoa idiọọñọ ini ntom?

⁵⁷“Nso-o ido nọ ndufo mmiikanna ibiire ke idem ndufo se ido akpanikọ?

⁵⁸Ke ini awo usua mfo ubenne abịne akpeikpe esob, nwana nam emem ye anye ke usʌñ, mmiidooho ntodo anye ayaauben asịm esob, abiireikpe ayaabiire ikpe mfo, usịn ke ñkpakọb.

⁵⁹Ami udọkkọ fiin nte, afo uduuwuọọghọ ke ñkpakọb tutu afo akpe akpatre kọbọ se akama.”