Read Ibibio Contemporary Bible 2020 Duk 13 Bible Online

Duk 13 - Ibibio Contemporary Bible 2020 bible

Duk 13

¹Ke ini ado, mme awo emaeba e-ekedidọkkọke Yisọs ebaña ubaak mbon Kadidi a-Baided akedata iyiib ammọ awuak ke mme ñkpọ uwa.

²Yisọs amaabọọrọ ate, “Ndufo ekere ebo ke mbon Kadidi ekebọ ufen ami sia ammọ ekenamma idiọọk ñkpọ ekan afịd mbio Kadidi mfen?

³Ami ibo ndufo ke idooho ntodo. Ibọhọke ndufo etua ñkpọfiọk, ndufo ñko eyaetak ntodo.

⁴Me ndufo ekere ebo ke mme awo duob ye itiaita a-tọwa Sidọam akefiighe awot emaedue ñkpọ ekan afịd awo e-ekedʌñọ ke Yerusedem?

⁵Ami ibo ndufo ntom, ke idooho ntodo. Ado ibọhọke ndufo etua ñkpọfiọk, ukeed ndufo ñko eyaetak.”

⁶Akem anye amaatañ ñke ami anọ ammọ: “Awo akenie eto fik ke inwañ amọ, akama anye adika akese me anwịm mfịd, ado ikịtte mfịd.

⁷Ado anam anye abo akpeme inwañ ate, ‘Isua ita ado ami, mmesaña ndise me ñyaakịt mfịd ke eto fik ami, ñkịtte. Kpịkke anye duọọk. Ntak anye akpedatta isọñ ñkaña-a?’

⁸“Akpeme inwañ amaabọọrọ ate, ‘Ete, yak anye amaana aba do ke ñkpọ nte isuakeed mfen, yak ndọk ñkanna ñnyʌñ nsịn fetedaisa.

⁹Akpeñwịm abem idaha ntom, esaana eyak, ado mmiinwịmme, ekpịkke eduọk.’ ”

¹⁰Ke usen Sabad, Yisọs akekpeeb ñkpọ ke sinakọk,

¹¹ndin awonwaan i-idiọọk sịbidịd akenamma anye adọñọ mbʌñọ ke ñkpọ nte isua duob ye itiaita amaaba do. Udọñọ ami amaanwịn anye, ikikanna inekke ida.

¹²Ke ini Yisọs akịtte anye, amaakood anye adat, ate yak anye awuọ adi iso, ndin abo anye ate, “Awonwaan, u-ukpọk fiin eyaak ke udọñọ mfo.”

¹³Ndin anye adot awonwaan ado ubọk, ke ndo-ndo ado anye amaanekke ada, anyʌñ atooro Abasi.

¹⁴Ado andikara sinakọk amaakop iyadesịd ke ntak Yisọs akọkkọ udọñọ ke usen Sabad, ado anam anye atañ ate, “Usen itiokeed ana inọ ndufo adinam utom. Mmọdo di nọ edukọk udọñọ ke mme usen ado, idooho ke usen Sabad.”

¹⁵Abọọñ amaabọọrọ anye ate, “Ndufo mbon mbubịk! Nte ndufo keed-e-keed isitatta enañ me enañ mbiomo ndufo iben ikinọ mmọọñ ke usen Sabad?

¹⁶Ado ikpinaaha ekpọk awonwaan ami eyak, ayịn awonwaan Ebraham, a-Setan asịne ke ukad ke afịd isua duob ye itiaita ami ke usen Sabad?”

¹⁷Ke ini anye atañña ikọ ami abuud amaanam afịd mme asua amọ, ado umiañ awo emaenem esịd ke afịd utịbe ñkpọ a-anye akenamma.

¹⁸Ndin Yisọs akaiso abo, “Ubọọñ abio Abasi abit so-o? Ndiidat nso-o ndomo ubọọñ abio Abasi?

¹⁹Anye aba nte ñkpasi mọstad a-atọ inwañ aketọọhọ ke inwañ amọ. Anye atịppe akọt akappa eka eto, mme inuen anyọñ ekesọrọ ke ñkọk amọ.”

²⁰Anye amaana abo, “Ndiidat nso-o ndomo abio ubọọñ Abasi.

²¹Anye aba nte ñkpọ e-esidatta enam frawa bred atịt, a-awonwaan akedomoke asịn ke ndomo frawa ata a-akenamma nọ frawa atịt.”

²²Ndin Yisọs amaakpeeb ñkpọ ke umiañ ikpọ ye ntək abio naña anye akeboiyoke aka Yerusedem.

²³Awo keed amaabịp anye ate, “Abọọñ me nte ibat-ibat awo kpọd ediibọkkọ?” Yisọs abọọrọ ate,

²⁴“Domo afịd ukeme mfo adisaña mfafaha usʌñ ndʌk, ami idọkkọ ndufo, sia umiañ awo eyaedomo adidʌk ado idiikanna.

²⁵Ini keed ake adodo anieufọk adakkake ada anyʌñ akʌk usʌñ, afo ayaada ke esiin akọñ usʌñ anyʌñ akpeiye abo, ‘Abọọñ beere usʌñ inọ ñnyịn.’ “Ado anye ayaubọọrọ ate, ‘Ami udiọọñọke fiin. Ato uke?’

²⁶“Ndin afo ayaabọọrọ, ‘Ñnyịn ikisidia ndidia inyʌñ inwọñ ñkpọ itie keed, afo amaakpeeb ñkpọ ke efaak ñnyịn.’

²⁷“Ado anye ayaubọọrọ, ‘Ami udiọọñọke fiin me afo ato uke. Dakka ñkpọñ miin, afo anam ndiọi!’

²⁸“Ntuaaña ayaaba, ntaeded ayaanyʌñ aba, ke ini uduukịt Ebraham ye Aisik ye Yekọb ye afịd mme brọfed ke abio ubọọñ Abasi, ado ndufo ke idem ndufo eyaisio etop eduọọk.

²⁹Mme awo eyaeto ke usakka utịn ye ke usọb utịn, edere ye usuuk, eyaedidat itie ammọ ke usọrọ abio ubọọñ Abasi.

³⁰Ke akpanikọ, mbon e-ekedooho akpatre eyaekappa edo akpa, ndin mbon e-ekedooho akpa, eyaekappa edo akpatre.”

³¹Etək ini akeboiyo, ubaak mme Farisi emaedibo Yisọs, “Kpọñ itie ami kaa itie mfen sia Herọd ayem aduwot fiin.”

³²Anye amaabọọrọ ammọ ate, “Kaa kedọkkọ ewaikọd ado bo ke ‘ami nyaaka iso mbịn mme ndiọi sịbidịd ñnyʌñ ñkọk udọñọ mfịn ye ñkpọñ, ndin ke ayọhọ usen ita, ami ñyaama se ñkeyem adinam.’

³³Ñkọm abaaha ntodo ami ñyaasịn ifịk nnam utom mfịn ye ñkpọñ ye ubakñkpọñ ndin nyaaka iso ke isañ mmi sia brọfed inaaha akpa ke ntefen ke mmiibọhọke Yerusedem!

³⁴“O Yerusedem, Yerusedem afo abio a-awotto mme brọfed anyʌñ atọọñ mbon e-ekenọọhọ inọ ndufo ke itiad. Akañ ifañ ke andọñ ami adikoono nditọ ndufo mbək itie keed nte eka unen atañ nditọ adọñ ke idak mba amọ, ado ndufo ikinyịmmeke?

³⁵Sese ndoon ndufo ana ukpọk. Ntañ ami inọ ndufo, nte ke ndufo idiiñkịtte miin aba tutu akem ini a-ndufo ediibo, ‘Emaediọñ anye a-adieeghe ke anyịñ Abọọñ.’ ”