Read Ibibio Contemporary Bible 2020 Duk 14 Bible Online

Duk 14 - Ibibio Contemporary Bible 2020 bible

Duk 14

¹Ke usen Sabad keed, naña Yisọs akekaaha asen ke ufọk ekamba awo mme Farisi, uwak awo emaeba do adise se anye anam.

²Awo ñyọọk keed amaaba ke itie ado ke iso amọ.

³Yisọs amaabịp mme Farisi ye mme ntaifiọk ibed e-ekebaaha do ate, “Anen adikọk awo udọñọ ke usen Sabad me inenne?”

⁴Afịd ammọ emaedobo, isiooho uyo. Ndin Yisọs amaamʌm awo ado, akọk anye, ñyọọk ado akweeñe anye, anyʌñ anọ anye anyọñ.

⁵Ndin Yisọs amaabịp ammọ ate, “Anie ke atu ndufo a-anieeghe ayịn, me enañ, me edọñ a-aduọọhọ adʌk ube ke usen Sabad, akpetre adisio anye ke ube ado?”

⁶Ammọ ikinyʌññọ inie ibọọrọ se enọ.

⁷Mi ke anye aketop ñke anọ mbon se ekedood ndidia ado, ke anye amaakekịt naña ammọ emeek ñkpoon itie ukpono ebono. Yisọs ate ammọ,

⁸“Awo akpukood fiin usọrọ ndọ, kuudọọk ukutie ke ekamba itie; sia awo akponno ukan fiin akpedi,

⁹andinie usọrọ ayaadukood fiin ate, ‘Kpọñ itie nọ awo ami.’ Ndin afo ayaakpọñ itie ado ke buud.

¹⁰Ado emaukood fiin usọrọ, ka ketie ke ñkpọitie edem tutu anie usọrọ adukood fiin abo, ‘Ufan dọọk di ekamba itie.’ Idahado, afo ayaanie ukpono ke iso mme awo se iba do.

¹¹Sia awo akeedodo a-akokkoke idem, eyaesuuhọ anye itie; ado awo a-asuuhọke idem eyaebenne anye.”

¹²Anye ndin akanna iso ase andikikood anye ufọk, ate anye, “Adieke akoodo awo ndidia uweeme, me ake ndubi, kuukood mme ufan mfo, nditọuka, me uyakka, me mme mbọhọidʌñ mfo e-emọiyọke. Ukpunam ntom, ammọ eyaenyʌñ ukood fiin usieene.

¹³Ado afo anamma usọrọ, kood mbon uwueene, mme inyọọn ye mbʌñọ ye nnan.

¹⁴Ke adinam ntom, afo ayaabọ adidiọñ. Ñkọm adooho ammọ ikanna unọ fiin usieene, afo ayaabọ usieene ke adised ke ñkpa ake nti awo.”

¹⁵Awo keed ke itie ndidia ami akekop mme ikọ ami, anye amaabo Yisọs ate, “Afọfọn anọ awo a-adiidia ndidia ke itie usọrọ ke abio ubọọñ Abasi.”

¹⁶Yisọs ate anye, “Abọọñ keed akenam ekamba usọrọ, akood uwak-uwak awo.

¹⁷Ini usọrọ akekem, anye asio ayịnufọk ate asaña adọkkọ mbon se anye akekood abo, ‘Idi, ke enam afịd ndutʌm ema.’

¹⁸“Afịd ammọ keed-e-keed etọọñọ adinọ mfaaña. Akpa awo ate, ‘Ñkedep ufa ikọd, ndin ñyem adikise naña aba. Mbọk kuuyat esịd ke ñkanna ndi.’

¹⁹“Ayọhọ awo iba ate, ‘Mmaadep enañ utọ inwañ duob, ndin ñyem adikise naña ammọ ediiba. Mbọk kuuyat esịd ke ñkanna ndi.’

²⁰“Awo mfen ate, ‘Ndọ ufa añwaan mmi-mmi, ndiikanna ndi.’

²¹“Ayịnufọk amaanyọñ aketañ afịd ami anọ eteufọk. Esịd amaayat eteufọk, anam anye anọ ayịnufọk uyo ate ‘Sọsọp dʌk ke mme efaak ye mme inuuk abio, kekood mme uwueene, mbʌñọ ye mme inyọọn, ye nnan di.’

²²“Ayịnufọk abo eteufọk, ‘Emaenam se afo abo enam, ado itie asʌk asọsʌhọ.’

²³“Eteufọk atịmme adọñ anye ate, ‘Wuọ ka akpọusʌñ, ñwaaña usʌñ, kood mme awo ake afo akekịt bo edi, tutu ufọk usọrọ mmi ayọhọ.

²⁴Yak ntañ ami inọ ndufo, ndomo awo keed se ñketo ñkood ke akpa a-adiidia ndidia mmi ibaaha.’ ”

²⁵Ata uwak awo emaesaña ye Yisọs, ndin anye awọññọ iso aneme ye ammọ ate:

²⁶“Awo ake adodo a-ñkeeneke miin, ndin isuaaha ete ye eka, anwaan ye nditọ, nditọeka ideen ye ibaan; ih, kpa ye idem uwem amọ, idiikanna ido mbed mmi.

²⁷Ndin awo ake adodo a-mmiibenne krọs amọ iñkeene miin, ikemeke adido mbed mmi.

²⁸“Nte awo ake adodo a-ayemme adibọp tọwa adooho ufọk anyọñ, inaaha asuuk atie, abat se ufọk ado adiikpa mbemiso anye atọọñọ?

²⁹Mbaak adido anye amaakesịn itiad idakisọñ ima, anye ikanna ibọp ima; afịd awo se ikịt eyaesaha anye,

³⁰ete, ‘Awo ami amaatọọñọ ibọp ufọk, ikanna ikweeñe.’

³¹“Ñko, anie adidem ikpiyem ika ekọñ ye adidem mfen, itieeghe ke akpa ifed iduuñọ me iyaikan iben mbon ekọñ tọsịn duob ikinwana ye anye a-anieeghe mbon ekọñ tọsịn edịb?

³²Anye akpekịt ke idiikanna, ana asio isʌñutom adọñ naña udịm ekọñ mbon ñko mmiikpereke, abo yak mmimọ inam emem.

³³Ukem-ukem ado, awo ndufo ake adodo idiikanna ido mbed mmi ke anye mmiisaanake afịd se anye anie iyaak.

³⁴“Inʌñ afọn, ado inʌñ mmiinieeghe inem aba, ediidat nso-o inam anye amaana anie inem?

³⁵Utọ inʌñ ami ibaaha ufọn inọ isọñ, inyʌññọ iba inọ itoon mbio; ukweeñe ado aditop anye nduọk. “Yak awo a-anieeghe utọñ adikop ami, akop.”