Read Ibibio Contemporary Bible 2020 Duk 15 Bible Online

Duk 15 - Ibibio Contemporary Bible 2020 bible

Duk 15

¹Mme abọ taksi ye mbon a-mme awo ebatta nte mme anam ndiọiñkpọ emaediboho nọ ato do ekop se Yisọs anie aditañ.

²Ado mme Farisi ye mme andikpeeb ibed emaedukuunọ ete: “Awo ami adʌk ndʌk ye mme anam ndiọi anyʌñ adia ndidia ye ammọ.”

³Ndin Yisọs amaatop ñke ami anọ ammọ:

⁴“Keed ke atu ndufo akpenie edọñ ikie, ndin edọñ keed abọkkọ asop. Me anye ikpisaanake edọñ anaañ ye duob ye usʌkkeed ako ke akpautatan inịm ikiyem keed ado tutu anye akịt?

⁵Anye amaakịt edọñ keed ado, me anye idiibenne edọñ ado idot ke itọñ inyọñ ufọk.

⁶Amaakewuọ ufọk, anye akood mme ufan amọ ate, ‘Idaara ye ami; mmekịt edọñ mmi a-akesoppo.’

⁷Ami idọkkọ ndufo nte kpa ke ukem-ukem usʌñ ado, idaara ayaakpon ke anyọñ eti-eti ke ntak idiọọk awo keed a-akappake esịd akan ndinen awo anaañ ye duob ye usʌkkeed e-emmiinieeghe ntak adikappa esịd.

⁸“Akpedo anam awonwaan keed anie kọbọ duob, ndin keed abọkkọ anye asop. Me anye idiidomoke utuenikañ, ikwọọk ufọk, iyem kọbọ keed ado tutu anye akịt?

⁹Ndin anye amaakịt kọbọ ado, anye akood mme ufan amọ ate, ‘Ididaara ye ami ke mmekịt kọbọ mmi a-akesoppo.’

¹⁰Ami ibo ndufo, ke ukem idaara ado aba ke atu mme enyere Abasi ke ntak idiọọk awo keed a-akappake esịd.”

¹¹Yisọs amaamaana adian do, “Ete keed amaaba a-akenieeghe nditọ ideen iba, akpan ye udọ.

¹²Udọ amaabo ate, ‘Ete, nnọ miin udeme inie mmi.’ Ete amọ amaanyʌñ abakka inie amọ ke itie iba anọ ammọ awo iba.

¹³“Ikikpeeneke-kpeene, udọ amaakoono afịd se anye akenie adakka isañ aka anyan usʌñ itie. Akekewuọ do, anye amaaketahade inie amọ ke adidu abʌd-abʌd uwem ke abio ado.

¹⁴Ke anye amaaketahade inie amọ ke abio ado ima, ekamba akañ amaadisịm afịd abio ado, ndin anye atọọñọ adiba ke akpọsọñ unana.

¹⁵Anye amaaka nọ idat imọ ke utom usen; anie itie ado amaanọ anye inwañ edi amọ akekpeme mme edi.

¹⁶Amaadọñ anye adidia mme ñkpọk ñkpọ se mme edi esidia ñkama mmʌm idịb, ado awo ikinọọhọ anye ñkpọ ndomokeed.

¹⁷“Ke iwuod amaaketekke anye ina, Udọ amaadibo idem amọ ate, ‘Mme nditọutom ifañ ke ufọk ete mmi inie se edia inyʌñ inie se esọsʌhọ, ado se miin mi naña akañ abo idiñwot!

¹⁸Ami ñyaadakka mbịne ete mmi, ñkebo anye nte: Ete mmi, mmedue anyọñ, ñnyʌñ udue fiin.

¹⁹Ndotto aba se añkood ayịn mfo; ndat miin nte keed ke atu mme nditọutom mfo.’

²⁰Ndin anye amaadakka abịne ete amọ. “Ke ini ete amọ adaha akịt anye ko ke anyanusʌñ, mbọm amọ amaanam ete, anye anyʌñ afeghe abịne Udọ, anyʌñ afat anye anyʌñ atʌm anye inua.

²¹“Udọ amaabo ete amọ ate, ‘Ete mmi, mmedue anyọñ ñnyʌñ udue fiin. Ndotto aba se añkood ayịn mfo.’

²²“Ado ete amọ amaanọ nditọufọk uyo ate, ‘Usọp! Idat afọñ se iyaya ikan idisịn Udọ. Isịn anye ñkpainuun ke ubọk, ye ikpaukod ke ukod.

²³Iwot afọnidem abaak enañ e-ekebọọhọ enịm. Yak inam usọrọ inyʌñ idaara.

²⁴Sia ayịn mmi ami amaakpa ndin amaana adu uwem; anye amaasop ndin imimaana ikịt anye.’ Do ndin usọrọ amaatọọñọ.

²⁵“Ke afịd ini ami, akpan mmọdo ke inwañ aba asʌk anam utom. Ke anye anyọññọ adikpere ufọk, anye amaakop mme mbre ye unek.

²⁶Anye amaakood ayịnufọk keed abịp me nso ido.

²⁷Anye amaabọọrọ akpan ate, ‘Udọ uka anyọñ adi, anam ete mfo awot afọnidem ayịn enañ sia anye adiwuọ ufọk ye nsọñidem.’

²⁸“Akpan amaakop akpọsọñ iyadesịd anyʌñ asịn adidʌk ufọk ñkewana ye ammọ. Ndin ete amọ amaawuọ esiin akekpeiye anye.

²⁹Ado anye amaabo ete amọ ate, ‘Sese! Afịd mme isua eboiyoke mi, mmewa idem nnam ñkpọ unọ fiin, nsọññọ iwuod ñnyʌññọ umiom fiin. Ado kpaanaanam unnọọhọ etək ñnyịn ebod ubo nọ ñwot nnam usọrọ ye mme ufan mmi.

³⁰Ado udọ mfo ami a-akekesuanna inie mfo ye mme akpara akenyọñ adi, afo adimʌm afọnidem abaak enañ awot anọ anye!’

³¹“Ete amọ amaabọọrọ anye ate, ‘Kpan mmi, afo aba mi ye ami afịd-afịd ini, ukeed ñkpọ se ami nnie, ado afo anie.

³²Akena ñnyịn idaara inyʌñ ikop inemesịd, sia ayịnuka ami amaakpa ndin amaana adu uwem; anye amaasop, ndin imimaana ikịt anye.’ ”