Read Ibibio Contemporary Bible 2020 Duk 18 Bible Online

Duk 18 - Ibibio Contemporary Bible 2020 bible

Duk 18

¹Ndin Yisọs atop ñke ami anọ mbed amọ adiwọt ammọ ufọn awo adibọñ akam afịd ini, iduọọhọ idodanyen tutu abọ se anye ayem.

²Anye akebo ammọ: “Ke abio keed, abiireikpe keed amaaba a-mmiikibaaha Abasi inyʌññọ iteeñe awo ndomokeed anyen.

³Ke abio ado, ebekpa keed amaaba ñko a-akesidieeghe abịne anye ye ebeeñe keed ate, ‘Kpe unen ikpe nnọ miin ye asua mmi.’

⁴“Abọọñ ami ikikamma isọp ñkpe ikpe ami; ado akekpeene koo anye atọọñọ ibo ke esịd amọ ate, ‘Akpesʌk ado ami mmenteeñeke Abasi anyen, inyʌññọ iba awo ake ami mbaak,

⁵ado sia awonwaan ami amfịna miin abọhọ, ñyaakịt mbo ke anye anie unen amọ, mbaak anye adikappa amʌm miin anwan.’ ”

⁶Ndin Abọọñ Yisọs ate, “Kop se akpe ukwañ ikpe ami aketañ do.

⁷Nte Abasi idiikpeeghe unen ikpe inọ mme andimek ikọd amọ e-eseemeke ekood anye uweeme ye akoneyo? Me anye ayaasʌk itre ukpe unen nnọ ammọ?

⁸Ami ntañ inọ ndufo, anye ayaakịt ke ebọ ibọọrọ unen ammọ usọp-usọp. Ñkpọ keed ado, me ini se Ayịn Awo adidi, ayaadikịt mme awo ye mbuọdidem ke iso isọñ?”

⁹Yisọs ndin atop ñke ami anọ mbon e-ekeebatta ke mmimọ imifọn ikan mbon mfen, ekappa esịn mbon mfen ke ndek.

¹⁰“Ideen iba ekeka ke tembịd adibọñ akam, keed awo Farisi, anye ako abọ taksi.

¹¹Awo Farisi amaada ke idem amọ abọñ akam: ‘Abasi mmukọọm fiin sia ami membaaha naña mbon mfen ebañña: mme inọ, mme anañña ndiọi, mme asịn efịbe, me nte abọ taksi ami.

¹²Ami nse ntre udia akañ iba ke udua keed, ñnyʌñ ñkpe ayọhọ ubaak keed ke itie duob ke afịd se ami nnie nnọ Abasi.’

¹³“Abọ taksi ado amaasanna ada anyanusʌñ, idịppeke anyen ukpọk ise anyọñ, abenne ubọk atuak ke esịd amọ aseeme ate, ‘Abasi ntua miin anam idiọọkñkpọ mbọm.’

¹⁴“Ami ntañ inọ ndufo, abọ taksi ami amaanyọñ ufọk amọ, anie utoppo ikpe ke iso Abasi. Sia awo ake adodo a-adịppeke idem, eyaesuuhọ anye, ado eyaebenne awo a-asuuhọke idem.”

¹⁵Mme awo emaekoono ntəkayịn edi ete Yisọs atuuk ammọ. Ado mbed amọ ekekịt ami, esua enọ ammọ.

¹⁶Ado Yisọs amaakood ntəkayịn ado adat, anyʌñ abo, “Iyak ntəkayịn eñkeene miin, ikiikpan ammọ, sia abio ubọọñ Abasi anie utọ mbon ami.

¹⁷Ke akpanikọ ke ntañ inọ ndufo, awo ake adodo a-mmiidiidatta abio ubọọñ Abasi ye utọ mbuọdidem ntəkayịn ami, idiikanna idʌk do.”

¹⁸Abọọñ keed amaabịp Yisọs ate, “Eti andikpeeb, nso-o ke ami ndinam nọ nnie uwem nsi-nsi?”

¹⁹Yisọs ate anye, “Nsinam afo añkood miin eti? Ibaaha awo adooho eti ke mmiibọhọke Abasi.

²⁰Afo amediọọñọ mme ibed: ‘Kuusịn efịbe, kuwot awo, kuuyịp inọ, kuutie ntiense nsu, kuutʌk awo. Kpono usọ ye uka.’ ”

²¹Anye abọọrọ Yisọs ate, “Ami mmenịm afịd ibed ami tọọñọ ke uyịn mmi.”

²²Yisọs akekop ibọọrọ ami, adọkkọ anye ate, “Afo amenana ñkpọ keed. Kaa ke nyam afịd se afo anie, kpọñ akʌk ado nọ nditọ uwueene, ndin afo ayaanie inie ke abio Abasi. Ndin di diñkeene miin.”

²³Awo ami akekop ikọ ami, esịd abʌññọ anye, sia anye akedo ata awo inie.

²⁴Yisọs abenne iso ase anye, ate, “Ado ataa akpọsọñ ñkpọ awo inie adidʌk abio ubọọñ Abasi!

²⁵Ado mmem-mmem enañ adiboiyo ke adu abiaween akan awo inie adidʌk abio ubọọñ Abasi.”

²⁶Mbon se ikikop ikọ ami emaebịp Yisọs ete, “Anie ndin ikeme adinie adinyaaña?”

²⁷Anye amaabọọrọ ammọ, “Ñkpọ se isọñ ke ubọkawo ado mmem-mmem ke ubọk Abasi.”

²⁸Bita ate anye, “Ñnyịn imikpọñ afịd se ñnyịn ikinie ukeene fiin.”

²⁹Anye ate ammọ, “Ke akpanikọ ke idọkkọ ndufo, ibaaha ndomo awo keed akpọññọ ufọk amọ, me anwaan, me nditọeka, me ete ye eka, me nditọ, ke ntak abio ubọọñ Abasi,

³⁰a-adiitre adibọ se iwak ikan ado ke emana ami, ndin ke emana mfen nsi-nsi uwem.”

³¹Yisọs ndin akood ibed amọ duob ye iba asịkke ada, adọkkọ ammọ ate, “Ñnyịn iyaika abio Yerusedem, ndin afịd se mme Brọfed ekewet ebaña Ayịn Awo ayaatịppe anọ anye.

³²Eyaeyaak anye esịn ke ubọk mme Yentaid. Ammọ eyaesuenne anye, esaha, enyʌñ etọọñ anye etab;

³³eyaemia anye enyʌñ ewot anye. Ndin ke ayọhọ usen ita, anye ayaaset ke ñkpa.”

³⁴Mme ikọ ami ikinwañake mbed amọ, ammọ ikinyʌññọ idiọọñọ se anye aketañ abaña; akeba ammọ usem-usem.

³⁵Yisọs akesaña akpere Yeriko, anye amaakịt nnan keed naña atie ke mben usʌñ abeeñe mme awo ñkpọ.

³⁶Nnan ami akekop uyom ato mme atu awo naña efịt ediboiyo, anye abịp se ido.

³⁷Ammọ ete anye, “Yisọs ake Nasared asʌk asaña aboiyo.”

³⁸Anye abọọñ akood ate, “Yisọs Ayịn Defid, ntua miin mbọm.”

³⁹Mbon se ikida ke iso ado eduad anye ete akʌp inua, ado anye adiọdiọñ abọọñ, “Ayịn Defid, ntua miin mbọm.”

⁴⁰Yisọs amaatuak ada, ate eben anye isọk. Emaekeben anye idikpere, Yisọs amaabịp anye,

⁴¹“Nso-o ke ayem nnam unọ fiin?” Anye amaabọọrọ ate, “Abọọñ, ñyem adimọọnọ usʌñ.”

⁴²Yisọs ate anye, “Mọọnọ usʌñ; mbuọdidem mfo unyaaña fiin.”

⁴³Ukem-ukem idahado anye amaamọọnọ ñkpọ, adakka akeene anye; asaña atooro Abasi. Atu awo ado ñko e-ekekịtte ñkpọ ami emaekeene etooro Abasi.