Read Ibibio Contemporary Bible 2020 Duk 19 Bible Online

Duk 19 - Ibibio Contemporary Bible 2020 bible

Duk 19

¹Yisọs amaasaña akesịm Yeriko ayem adisaña mboiyo.

²Ete keed amaaba ke abio ado a-akekereke Sakiọs. Anye akedo etubom mme abọ taksi anyʌñ ado imọ awo.

³Anye amaayem adidiọọñọ me anie ke Yisọs ado, ado anye ikikanna inekke imọọnọ Yisọs ke atu awo ado sia anye akedo imək awo.

⁴Anye amaafeghe akedọọk anyọñ eto sikamọ a-akedaaha ke usʌñ Yisọs akeduakka isaña mboiyo.

⁵Yisọs akekewuọ itie eto ado, anye amaabenne anyen ke anyọñ ate, “Sakiọs, sọiyọ di idahami. Ana ami mba ke ufọk mfo mfịn.”

⁶Anye amaasọiyọ ini keed anyʌñ adaara Yisọs.

⁷Afịd awo se ikikịt adinam ami emaetọọñọ adidikuunọ ete, “Anye aka iba ke ufọk anamidiọọk.”

⁸Ado Sakiọs amaadakka ada abo Abọọñ ate, “Sese, Abọọñ! Idaha-idaha ami mmekpọñ inie mmi mbaak keed ke itie iba nnọ mme uwueene, ndin akpedo mmetʌk awo ndomokeed, ñyaakpe anye itie inaañ se ado akekpa.”

⁹Yisọs ate anye, “Mfịn ami adinyaaña asịm ufọk ami, sia ete ami ñko ado ayịn Ebraham.

¹⁰Sia Ayịn Awo akedi adiyem ñnyʌñ ñnyaaña mbon se isop.”

¹¹Ke ini ammọ esʌkkọ ekpañ utọñ ekop se Yisọs atañ, anye amaatop ñke mfen anọ ammọ sia anye amaakpere Yerusedem, ñko mme awo ekekere ke abio ubọọñ Abasi ayaadisịm kpa ke idahado.

¹²Anye ate, “Awuọiso ete keed amaaka isañ ke asen idịd ma ekenam anye adidem, anye ñko anyọñ adi ke ndutʌm ado amaakweeñe.

¹³Anye amaakood nditọufọk amọ duob anọ ekpad akʌk duob. Anye ate ammọ, ‘Ikama akʌk ami inyam udua tutu ami ñnyọñ ndi.’

¹⁴“Ado nditọufọk amọ ikimaaha anye, ndin emaedọñ utom enọ anye ete, ‘Ñnyịn iyemme ete ami ado adidem ñnyịn.’

¹⁵“Emaenam anye adidem, anye anyʌñ anyọñ adi ufọk. Ndin anye amaadọñ ekood nditọufọk amọ a-anye akenọọhọ akʌk nọ ato do anye adiọọñọ se udod ammọ ekenam.

¹⁶“Akpa awo amaadibo, ‘Ete, ekpad akʌk duob adoro ke akʌk a-akennọọhọ.’

¹⁷“Ete ami ate, ‘Amenam tutu, eti ayịnufọk. Sia afo amenam akpanikọ ke etək ñkpọ, dat ukara ke abio duob.’

¹⁸“Ayọhọ awo iba awuọ adibo, ‘Ete, ekpad ition adoro ke akʌk a-akennọọhọ.’

¹⁹“Eteufọk ate anye, ‘Afọn, kara abio ition.’

²⁰“Ayịnufọk mfen amaawuọ adibo, ‘Ete, se akʌk mfo mi, mmaabọp akʌk ado ke afọñ ñkenịm.

²¹Ami ubaabaak fiin-o, sia mmediọọñọ ke afo ado akpọsọñ awo. Afo ado awo a-adatta ke itie afo mmuukunịmme, anyʌñ adọk ke itie a-mmuukutọọhọ.’

²²“Eteufọk abọọrọ, ‘Ami ñyaabiire ikpe mfo ñkeene ikọ inua mfo, afo ndoom ayịnufọk! Idooho afo amaadiọọñọ ke ami ndo akpọsọñ awo, ke ndo awo a-adatta ke itie a-mmeñkenịmme ñnyʌñ ndọk ke itie a-mmeñketọọhọ?

²³Ntaha mmuukubenne akʌk mmi ukunịm ke itie unịm akʌk-ọ, nọ ato do mmaato ndi ndibọ akʌk mmi ye udod?’

²⁴“Eteufọk amọ amaabo mbon e-ekedaaha do ate, ‘Ibọ anye akʌk amọ idian inọ awo a-akenieeghe ekpad akʌk duob.’

²⁵“Ammọ emaebo anye ate, ‘Ete, anye anenie duob.’

²⁶“Anye amaabọọrọ ate, ‘Ibo ndufo nte ke awo a-anieeghenie, eyaedian mfen enọ, ado awo a-mmiinieeghenie, eyaebọ kpa etək se anye anie ado.

²⁷Ama ado mme asua mmi e-mmiikiyemme ami ndo adidem ammọ, koono ammọ di wood mi ke iso mmi.’ ”

²⁸Ke Yisọs amaaketañ ikọ ami ama, anye amaasak iso aka Yerusedem.

²⁹Anye akekpere Betfas ye Betani ke Abod Ọdif, anye amaadọñ mbed amọ iba ate,

³⁰“Ikaa ke idʌñ a-adaaha ke iso ako, imaidʌk, eyaekịt abaak enañ mmakara naña ayịre, adooho kpaanaanam awo ndomokeed idoroke ke anyọñ amọ. Itat anye iben idi.

³¹Awo akpibịp abo, ‘Nso-o ido nọ etat anye?’ Ibọọrọ anye ibo, ‘Abọọñ ayem.’ ”

³²Mme mbed e-ekedọññọ emaenyʌñ ekekịt kpa naña Yisọs akebo.

³³Ke ini ammọ eyemme aditat abaak enañ ado, mme andinie emaebịp ammọ ete, “Nso-o ido nọ etat anye?”

³⁴Ammọ emaebọọrọ, “Abọọñ ayem.”

³⁵Ammọ emaeben abaak enañ ado esọk Yisọs, etop afọñ ammọ efʌk enañ ado, eben Yisọs edot ke anyọñ amọ.

³⁶Ke ini anye awatta aka ke usʌñ mme awo emaetaad afọñ ammọ ebịt ke usʌñ nọ anye asaña aboiyo.

³⁷Anye akedikpere uwakka usʌñ Abod Ọdif, afịd mme atu mbed ke inemesịd, etọọñọ itooro Abasi ke akpọsọñ uyo ke afịd utịbe ñkpọ se ammọ ekekịt, ete:

³⁸“Emaediọñ anye a-adieeghe ke anyịñ Abọọñ!” “Emem aba ke anyọñ, ubọọñ anyʌñ aba ke ata anyọñ!”

³⁹Ubaak mme Farisi ke atu ado emaebo Yisọs ete, “Andikpeeb, sua nọ mme mbed mfo-o!”

⁴⁰Anye abọọrọ ammọ ate, “Ami ibo ndufo nte, ammọ ekpedop uyo, mme itiad eyaesio uyo.”

⁴¹Anye akekpere Yerusedem, akịt abio ado, anye amaatua abaña anye,

⁴²ate, “Ubaha nte afo, kpa afo, akpediọọñọke ke usen mfịn ami se idiidat emem usọk fiin, ado idahami ado ndedịbe ñkpọ ke anyen mfo.

⁴³Ini ayaadi a-mme asua ndufo ediibọp ndibene ikanna ndufo ikʌk enyʌn efiọk ndufo ke afịd nkan.

⁴⁴Ammọ eyaitọ ndufo esuan ke isọñ, ekanna ndufo ye nditọ ndufo ekʌk ke esịd akwere ndufo. Ammọ idiiyakka itiad adoro ke itiad, sia ndufo ikidiọọñọke ini a-Abasi akedieeghe adise ndufo.”

⁴⁵Ke ini Yisọs amaakedʌk afe tembịd, anye amaatọọñọ adibịn mbon e-ekenyamma ñkpọ do.

⁴⁶Anye ate, “Ewewet, ‘Ufọk mmi adido ufọk ubọñ akam, ado ndufo emeben anye enịm afe ñwo ye aba inọ.’ ”

⁴⁷Kwa usen anye akekpeeb ñkpọ ke tembịd. Ado mme ikpọ aku, mme akpeeb ibed ye mme adaidaha ke atu awo emaeyem usʌñ adiwot anye.

⁴⁸Ado ammọ ikikịtte usʌñ naña ediisaña inam ami, sia afịd awo ekeyiire ke ikọ se anye aketañ.