Read Ibibio Contemporary Bible 2020 Duk 20 Bible Online

Duk 20 - Ibibio Contemporary Bible 2020 bible

Duk 20

¹Usen keed, naña Yisọs asʌkkọ akpeeb mme awo ñkpọ anyʌñ akwọrọ ikọ ke mme afe tembịd, mme ikpọ aku, mme andikpeeb ibed ye mme adaidaha emaedi edisoobo ye anye.

²Ammọ emaebịp anye ete, “Tañ inọ ñnyịn se adudu ke afo akama anañña mme afịd ñkpọ ami. Anie ikunọ fiin adudu ami?”

³Anye amaabọọrọ ammọ ate, “Ami ñko nyaibịp ndufo mbịme. Itañ innọ miin:

⁴Uduọkmmọọñ Yọọn; me aketo anyọñ, me aketo awo?”

⁵Ammọ emaedọñ adu ke idem ammọ ete, “Ñnyịn ikpịbo ke aketo anyọñ, anye ayaibịp, ‘Ntak a-ndufo mmiikinịmme anye ke akpanikọ-ọ?’

⁶Ado ñnyịn ikpibo, ‘Ato awo,’ afịd awo eyaetọọñ ñnyịn ke itiad sia ammọ enịm ke Yọọn akedo brọfed.”

⁷Ado anam ammọ emaebọọrọ ete, “Ñnyịn idiọọñọke nte aketo.”

⁸Yisọs anyʌñ abọọrọ ammọ, “Ami ndiinyʌññọ ntañ inọ ndufo nte ndat adudu nnañña mme ñkpọ ami.”

⁹Anye amaaka iso atop ñke ami anọ ammọ ate, “Ete keed amaatọ inwañ fain, ayaak anọ mme akpeme inwañ, adakka aka isañ a-anye mmiikisọppọ inyọñ idi.

¹⁰Ini idọk fain akekem anye amaadọñ ayịnufọk ate yak akebọ ubaak mfịd inwañ isọk. Ado mme akpeme inwañ emaetịm anye ebịn, anye anyọñ ubọk-ubọk.

¹¹Anye amaamaana adọñ ayịnufọk mfen, ado ammọ emaemaana etịm anye ado esuenne, enyʌñ ebịn anye anyọñ ubọk-ubọk.

¹²Akem anye adidọñ ayọhọ ayịnufọk ita, ammọ emaenọ anye ado unan, enyʌñ ebịn anye esio.

¹³“Ndin andinie inwañ fain ami amaabo, ‘Nso-o ke mbo nnam? Ñyaadọñ ayịn mmi a-ami mmaaha. Akeme ido ammọ eyaebaak anye ado.’

¹⁴“Ado ke ini mme akpeme inwañ ekịtte ayịn ami, ammọ ebiire ete, ‘Adiaakpa amọ ado ami. Yak ñnyịn iwot anye nọ ñnyịn ikappa ido mme adiaakpa.’

¹⁵Ado anam ammọ emʌm anye esio ke inwañ fain eben anye ekewot. “Nso-o ndin ke andinie inwañ adinam ammọ?

¹⁶Anye ayaadiwood mme akpeme inwañ ado anyʌñ ayaak inwañ fain ado anọ mbon mfen.” Ke ini ammọ ekoppo ñke ami, ammọ emaebo, “Nwaaña nsa-o, Abasi akan!”

¹⁷Yisọs amaatịñ anyen ase ammọ ndin abịp ammọ, “Nso-o ke ekewet ami awuọ: “ ‘Itiad mme abọp ufọk ekesịnne akappa ado inuuk itiad’?

¹⁸Afịd awo e-ediduọ ke itiad ami, eyaebom ammọ mbai-mbai; ndin awo i-itiad adiduọ ifiik ayaanuagha.”

¹⁹Mme andikpeeb ibed ye mme ikpọ aku emaeyem usʌñ e-ekpedatta emʌm anye usọp-usọp, sia ammọ emaediọọñọ ke anye aketop ñke ami ibaña mmimọ. Ado amọ ekebaak atu awo.

²⁰Ammọ emaenekke edukeene anye enyʌñ edọñ mbio uyeb e-ekenamma nte mmimọ ido mme anamakpanikọ ete eyep anye. Ammọ ekedot anyen ke adimʌm Yisọs ke ikọ inua nọ edat ado eyaak anye enọ mme adaukara.

²¹Mbon uyeb emaedomo Yisọs, enyʌñ ebịp anye ete, “Andikpeeb, ñnyịn imidiọọñọ ite ke afo ado atañ akpanikọ anyʌñ akpeeb se ido unen, unyʌññọ ubaak awo anyen, ado akpeeb usʌñ Abasi nte asañake ke akpanikọ.

²²Me anen ñnyịn adikpe taksi nnọ Sisa mmiinenne?”

²³Anye amaada akịt ñkara ammọ ndin abo ammọ ate,

²⁴“Ñwọt akʌk ado ise. Usio idem ye anyịñ anie iba ke akʌk ami?” Ammọ ebọọrọ, “Ake Sisa.”

²⁵Anye amaabo ammọ, “Iyaak se inie Sisa inọ Sisa, inyʌñ iyaak se inie Abasi inọ Abasi.”

²⁶Ammọ ikikanna imʌm anye ke ikọ inua anye aketañña anwa-anwa. Idem amaakpa ammọ ke ibọọrọ Yisọs akeanọọhọ, ndin ammọ ikikanna uyo isio.

²⁷Ubaak mme Sadusi, mbon a-mmiinịmme ibo ke adised ke ñkpa aba, emaeben mbịme ebịne Yisọs ete,

²⁸“Andikpeeb, Moses amaawet abo, awodeen akpekpa akpọñ añwaan a-adiimanna ayịn, ayịneka amọ ana aben ebekpa anwaan ado adọ nọ abon nditọ anọ anye.

²⁹Nditọeka ideen itiaba ekeba. Akpa adọ anwaan, akpa, inieeghe ayịn.

³⁰Ayọhọ iba amaadat anwaan ami adọ. Anye ñko adikpa ke ini mmiikiniieeghe ayịn ito awonwaan ami.

³¹Ayọhọ ita adat anwaan ami adọ, tutu asịm ayọhọ itiaba; afịd ammọ ekpañña inieeghe nditọ ito awonwaan ami.

³²Ke akpatre, awonwaan ami ñko adikpa.

³³Ke adised ke ñkpa, anwaan anie ke anye adido sia naña ammọ ideen itiaba emaedọ ukem awonwaan ami?”

³⁴Yisọs amaabọọrọ ate, “Mme awo ke emana ami edọ enyʌñ enọ ke ndọ.

³⁵Ado mbon e-edotto adidat itie ke uwem ke emana mfen ye ke adised ke ñkpa idọọhọ inyʌññọ inọ ke ndọ.

³⁶Sia ammọ idiikpaaha aba, ammọ eba nte mme enyere. Ammọ edo nditọ Abasi sia ammọ edo nditọ adised ke ñkpa.

³⁷Ke mbʌk Moses akekekịtte ikañ nte asak ke ikọd, Moses ke idem amọ amaawọt ke mme akpañkpa eseset sia ke mbʌk ami anye akekood Abọọñ ‘Abasi Ebraham ye Abasi Aisik ye Abasi Yekọb.’

³⁸Abasi idooho Abasi mme akpañkpa, ado Abasi mme adu uwem sia afịd awo edo mme adu uwem ke anye.”

³⁹Ubaak mme andikpeeb ibed emaebọọrọ anye ete, “Ametañ afọn, andikpeeb!”

⁴⁰Tọọñọ ke usen ado awo ndomokeed ikikanna ibịp anye mbịme aba.

⁴¹Ndin Yisọs amaabo ammọ ate, “Esaña die ebo ke Mesaya ado ayịn Defid?

⁴²Defid ke idem ammọ abo ke Ñwed Saam: “ ‘Abọọñ abo Abọọñ mmi ate: “Tie ke ubọkudom mmi

⁴³tutu ami nnam mme asua mfo edoñño ñkpọ udodukod mfo.” ’

⁴⁴Defid akood anye ‘Abọọñ.’ Akpenam die nọ anye adido ayịn Defid?”

⁴⁵Naña atu awo esʌkkọ ekpañ utọñ, Yisọs amaabo mme ibed amọ ate,

⁴⁶“Itʌm ikpeme mme andikpeeb ibed. Ammọ ema adisaña ñkanna ye ñkpoon, nduọ-nduọ afọñidem, ema ekọọm ke añwa udua, enyʌñ ema ikpọ itie ke sinakọk ye mme ikpọ itie ukpono ke mme itie adinam.

⁴⁷Ammọ ema adifiik mme ebekpa mbọ ufọk, enyʌñ ewọt idem ke adibọñ ñnyan akam. Utọ mme awo ntom eyaebọ ekamba ufen.”