Read Ibibio Contemporary Bible 2020 Duk 22 Bible Online

Duk 22 - Ibibio Contemporary Bible 2020 bible

Duk 22

¹Usen Usọrọ e-ekesidatta uyo awo mmiisịnne defịn inam, e-ekekoodo Basofa, amaakpere.

²Ndin mme ikpọ aku ye mme akpeeb ibed emaeyem ñkara usʌñ naña ammọ ediisaña imʌm Yisọs ikiwot, sia ammọ ekefegheke atu awo.

³Akedikem Setan amaadʌk esịd Yudas Iskariọd a-akedooho keed ke atu mme ibed Yisọs duob ye iba.

⁴Anye amaaka akeneme ye mme ikpọ aku ye mme akpeme tembịd usʌñ naña anye akpakeme aditap Yisọs inọ ammọ.

⁵Esịd amaadat ammọ enyʌñ enyịmme adinọ anye akʌk.

⁶Yudas amaanyịmme, anyʌñ atọọñọ iyem ufañ se anye aditap Yisọs inọ ammọ idaha atu awo mmiibaaha.

⁷Amaakedikem usen Usọrọ edatta uyo a-defịn mmiisịneke inam, a-akenaaha ewot edọñ uwa Basofa,

⁸Yisọs amaadọñ Bita ye Yọọn ate ammọ, “Ikaa ikinam ndutʌm ibaña ndidia usọrọ Basofa.”

⁹Ammọ ebịp anye ete, “Ke ñke ke ayem ñnyịn ikinam ndutʌm ami?”

¹⁰Yisọs amaabọọrọ: “Emaedʌk isọñ abio, eyaekịt awodeen keed nte akama abañ mmọọñ. Ikeene anye ika ufọk anye anyʌññọ aka,

¹¹inyʌñ ibo anieufọk ado ite, ‘Andikpeeb ñnyịn abo ate: Ake-e ubeed isen ke ndiididia usọrọ Basofa ye mme mbed ado ake-e?’

¹²Ndin anye ayaiwọt ndufo ekamba ubeed ke anyọñ, e-emaeketʌm ibeeñe ibet ñnyịn. Inam ndutʌm ke ndo.”

¹³Ammọ emaedakka edʌk isọñ abio enyʌñ ekekịt ukem-ukem naña Yisọs aketañ anọ ammọ, enyʌñ ebeeñe ndidia Basofa do.

¹⁴Ke ini amaakekem, anye amaakedʌk ufọk ado ye ibed amọ duob ye iba, esuuk etie ke akpokoro ndidia.

¹⁵Yisọs ndin abo ammọ ate, “Anekke añwʌt miin adidia Basofa ami ye ndufo mbemiso ami mbọ ndutʌkkọ.

¹⁶Sia ami ndiidiaaha Basofa mfen aba ye ndufo tutu adiwuọ asu ke abio ubọọñ Abasi.”

¹⁷Ke anye amaakeben kọọb, anye anọ Abasi ekọọm, ayaak anọ ammọ ate, “Ibọ ideeme ke atu idem ndufo.

¹⁸Ami ntañ inọ ndufo nte ke ami ndiiñwọọñọ se ito mfịd fain aba, tutu abio ubọọñ Abasi adi.”

¹⁹Akema anye amaaben uyo, anyʌñ akọọm Abasi, abuuñ, ayaak anọ ammọ ate, “Anye ami ado ikpọkidem mmi, i-inọọhọ ndufo; inam ami adidat intoiyo miin.”

²⁰Ke ukem usʌñ ado, ke emaekeedia ndidia ndubi ima, anye amaaben kọọb, ate ammọ, “Kọọb ami ado ufa edioomo iyiib mmi, e-eduọkkọ inọ ndufo.

²¹Ado ubọkawo a-ayemme adintap miin mmọ mi ye ake mmi ke akpokoro.

²²Ayịn Awo adiinyọñ naña ekebiire. Ado adọdiọọk anọ awo a-adiitap anye!”

²³Mbed amọ emaetọọñọ adibịp idem ammọ me anie awo ke atu mmimọ idiinam utọ ñkpọ ami.

²⁴Akem mfaaña ye eniin amaatọọñọ ke atu ammọ, me anie ke atu mmimọ ke ekere nte anye akpon itie akan.

²⁵Yisọs ate ammọ, “Mbọọñ mme Yentaid ekara ammọ naña emama, ndin mme akama adudu edat mbọọñ ado nte mme anọ unwam.

²⁶Yak akuudo ntodo ke atu ndufo. Utu ke ado, yak awo se ikpon ikan ke atu ndufo akappa atie nte etəkayịn, ndin yak adaiso ke atu ndufo akanna adise ñkpọ inọ ndufo.

²⁷Anie awo ikpon ikan, anditie ke akpokoro ndidia me andiben ndidia ndinọ? Ke ido ederimbod, eteufọk atie ke akpokoro, nditọufọk ebeben ndidia edi. Ado idooho ntodo ke atu ñnyịn sia ami mba nte adise ñkpọ inọ ndufo.

²⁸Ndufo edo mbon e-edaaha ye ami ke mme ini idomo mmi.

²⁹Ndin ami mmenịm abio ubọọñ inọ ndufo, ukem-ukem naña Ete mmi akennọ miin,

³⁰nọ ato do ndufo edia enyʌñ enwọñ ke akpokoro abio ubọọñ mmi, enyʌñ itie ke mme ebekpo ubiireikpe enọ mme esiin Isred duob ye iba.”

³¹Yisọs ndin abo Saimọn, “Saimọn, Saimọn, Setan amaayem naña ukeñ fiin nte awo akeñ abakpa.

³²Ado ami mmaabọñ akam unọ fiin, mbaak mbuọdidem mfo adikpu, mbaak naña uduutịmme udemme ke mbuọdidem afo akan asọọñọ nditọ usọ idem.”

³³Ado Saimọn amaabọọrọ anye ate, “Abọọñ, ami mmebeeñe idem adisaña ye afo akpọkọm ke ufọk ñkpakọb, me ke ñkpa.”

³⁴Yisọs ate anye, “Udọkkọ fiin Bita, mbemiso akikọ akpọk mfịn, afo ayaañkañ ukpa ita ate ke indiọọñọke miin.”

³⁵Yisọs awọññọ iso ate mbed, “Idaha a-ñkesịññeke ndufo ndọñ utom, nte ikiikama ekpad akʌk, me ndidia, me ikpaukod, anie naña ñkpọ akinana ndufo?” Ammọ ebọọrọ, “Ñkpọ ikinanake.”

³⁶Anye ndin amaabo ammọ, “Idahami yak ake anie ekpad akʌk, aben, ake anie ekpad ndidia, aben, akpedo unieeghe eduad nyam afọñidem dat ke dep.

³⁷Ntañ ami inọ ndufo, ikọ ñwed Abasi ekewette ete, ‘Ndin emaebat anye esịn ke atu mme adue ibed,’ ana asu ke idem mmi. Ih, ke akpanikọ, se ekewet ami atọtọọñọ adisu.”

³⁸Mbed amọ ete anye, “Abọọñ, se eduad iba mi.” Anye ate ammọ, “Ado akem!”

³⁹Yisọs ye mme mbed amọ emaeka ke Abod Ọdif, naña ido amọ akesido.

⁴⁰Anye amaakesịm abod ami, ate ibed amọ, “Ibọñ akam mbaak ndufo ididʌk ke idomo.”

⁴¹Yisọs ndin asịkke akpọñ mbed ke idaha ubọk iyrọ keed, aketọọñọ edọñ abọñ akam,

⁴²“Ete mmi, akpedo se afo anyịmme, ben kọọb ami sio fep nnọ miin; ado ke ado ke unyịmme mmi, yak ado naña afo anyịmme.”

⁴³Ndin enyere amaato ke anyọñ adida anye ke iso anyʌñ asọọñọ anye idem.

⁴⁴Ke mbʌññọ esịd, anye amaanekke asịn idem abọñ akam tutu adikpọ awuọọñọ anye ke idem, akappa abit umiana, atọi ke isọñ.

⁴⁵Anye akekpọñ itie akam ado, atịmme abịne mbed amọ, akekịt ke ammọ esʌk edaiya anọ ekaha ye mfʌhọ.

⁴⁶Anye amaatọi ammọ, abịp ate, “Nso-o ke edaiya? Idemme, ibọñ akam mbaak ndufo ididʌk idomo.”

⁴⁷Ke anye asʌkkọ atañ mme ikọ ami, atu awo emaediwuọ, keed ke atu ibed amọ Yudas aboiyo iso, asaña abịne Yisọs aketʌm anye inua,

⁴⁸ado Yisọs abịp anye ate, “Yudas adi aditap Ayịn Awo ke ntʌminua?”

⁴⁹Ke mbed Yisọs ekịtte se iyem aditịppe, ammọ emaebịp Yisọs ete, “Abọọñ, imikeme adikuum ammọ ke akañkañ?”

⁵⁰Ndin awo ammọ keed amaasio eduad adiañña ayịnufọk akwa aku utọñ nnasia.

⁵¹Ado Yisọs amaabo ate, “Yak atre do!” Ndin anye aben utọñ ado adian, anye aba naña akeba.

⁵²Yisọs ndin awọññọ ase mme ikpọ aku ye mme ikpọawo akpeme tembịd ye mme adaidaha e-ekedieehe adimʌm anye, ate, “Ndufo ewuọọñọ edi ye eduad ye ñkpeti nte eka adimʌm awo ntịme me inọ?

⁵³Idaha a-ami ñkebaaha ye ndufo ke afe tembịd, ibaaha awo ndufo akenyanna ubọk antuuk miin. Ufañ ndufo ado ami, ini a-adudu akịm akara ke.”

⁵⁴Idahado, ammọ emʌm anye eben edakka, eka ufọk akwa aku. Bita amaakpeeñ ñkpad isañ, akeene anye ke nsan-nsan.

⁵⁵Ke ammọ emaekebara ikañ ke ufọọd esịd akwere, eyem itie ebono, Bita amaakekeene aketie ye ammọ.

⁵⁶Ayịnufọk abọikpa keed akekịt naña Bita atie awue ikañ, awuuk anyen ase anye, ate, “Awo ami akesiba ye anye.”

⁵⁷Ado Bita amaakañ ate, “Bọikpa, ami ndiọọñọke anye.”

⁵⁸Etək ini akeboiyo, awo mfen amaase Bita, ate, “Afo ñko ado nsaña amọ keed.” Bita amaana akañ ate, “Ete, ndooho!”

⁵⁹Ñkpọ nte awa keed akeboiyo, awo mfen adi aditañ uko-uko ye Bita, ate, “Ke akpanikọ, awo ami ado nsaña amọ, sia anye ado ayịn Kadidi.”

⁶⁰Bita amaabọọrọ ate “Ete, ami ndiọọñọke se afo atuum ado ke inua!” Bita aketañ ntodo, akikọ amaakpọk.

⁶¹Abọọñ Yisọs awọññọ iso ase Bita, ndin anye atoiyo ikọ Yisọs akeboogho anye ate, “Mbemiso akikọ akpọk mfịn ami, afo ayaañkañ miin ñke nta.”

⁶²Ndin Bita amaawuọ esiin, aketua ndod-ndod ayịd.

⁶³Ideen e-ekekpemeke Yisọs etọọñọ etọọñ anye ndọk enyʌñ etịm anye.

⁶⁴Ammọ emaebọp anye ñkịm ke anyen, ete anye, “Tañ ñkukịt! Anie awo umia?”

⁶⁵Ammọ emaenyʌñ esueeñ anye, etaañ ikọ usọñanyen edian anye.

⁶⁶Ayo amaakesieere, mme ikpọawo ke kọnsịn abio, ye mme ikpọ aku ye mme akpeeb ibed emaewuọ ebono itie keed, ndin emaeben Yisọs edi ke iso ammọ.

⁶⁷Ammọ emaebo Yisọs, “Akpedo afo ado Mesaya, tañ inọ ñnyịn.” Anye amaabọọrọ ate, “Ami ñkpetatañ, ndufo idiinnịmme miin ke akpanikọ,

⁶⁸ñko ami ñkpibịp ndufo, idimbọọrọke.

⁶⁹Ado tọọñọ ke idahami, Ayịn Awo aditie ke ubọk nnasia akwa Abasi.”

⁷⁰Afịd ammọ emaedọñ uyo ebịp anye, “Nte afo ndin ado Ayịn Abasi?” Anye ate ammọ, “Ado naña ndufo etañ ado ke ami ndo Ayịn Abasi.”

⁷¹Ammọ ndin edọñ uyo keed ete, “Nso-o uto ntiense mfen ke ñnyịn iyem? Ñnyịn imikop ke inua amọ.”