Read Ibibio Contemporary Bible 2020 Duk 23 Bible Online

Duk 23 - Ibibio Contemporary Bible 2020 bible

Duk 23

¹Ke ini esob amaakesuana ammọ emaeben Yisọs eka ke iso Baided.

²Ammọ emaetọọñọ adidot anye uyo, ete, “Ñnyịn imikịt naña anye asịn nsọk ke idịd ñnyịn, ate mme awo ekuukpe taksi enọ Sisa, abo ke imọ ido Mesaya, adidem.”

³Ke ntodo Baided amaabịp Yisọs ate, “Afo ado adidem mme Yuu?” Yisọs amaabọọrọ, “Ih, ado naña afo abo ado.”

⁴Ndin Baided amaadọkkọ mme ikpọ aku ye atu awo ate, “Ami ñkịtte ndudue nnọ awo ami.”

⁵Ado ammọ eyiire ete, “Ukpeebñkpọ amọ adat mfịna adi ke afịd Yudia. Anye aketọọñọ ñkpọ ami ke Kadidi ndin idahami asuana adiwuọ afịd umi.”

⁶Baided akekop ami amaabịp me awo ami ato Kadidi.

⁷Ke ini anye akediọọñọke ke Yisọs akeba ke idak ukara Herọd anye amaanọ Yisọs esọk Herọd ke Yerusedem sia Herọd akeba do ke ini ado.

⁸Herọd akekịt Yisọs, esịd amaanem anye sia ke ata anyan ini anye amaanie udọñ adisoobo ye Yisọs. Ke se anye akekop abaña Yisọs, anye amaanie idodanyen ke imọ iyaikịt naña anye anam utịbe ñkpọ.

⁹Herọd amaakwak Yisọs ye uwak mbiime ado anye ikibọọrọke anye.

¹⁰Mme ikpọ aku ye mme andikpeeb ibed e-ekebaaha do etañ adudu-adudu afịd ndudue amọ e-ekebooho ke anye akenam.

¹¹Herọd ye mbon ekọñ amọ emaesaha, edọọñ anye ndọk, esịn anye afọñ ubọọñ nọ anye abit abọọñ enyʌñ etịmme enọ anye esọk Baided.

¹²Tọọñọ ke usen ado Baided ye Herọd e-ekedusuarake emaekappa edoñño ufan.

¹³Baided amaakood mme ikpọ aku ye mme andikara ye afịd awo abok atọ keed,

¹⁴abo ammọ ate, “Ndufo ekedat awo ami ensọk miin nte awo a-asịnne nsọk. Ami mmeduuñọ anye ke iso ndufo ado ñkịtte abom a-ndufo etañña ikọ edot anye.

¹⁵Herọd ikinyʌññọ ikịt ndudue ke anye, ado akenam anye atịmme anọ anye isọk ñnyịn. Nte ndufo ekịtte, anye idueeghe ñkpọ a-adotto ufen ñkpa.

¹⁶Ke ntodo, ñyaamia anye ñnyʌñ nsaana anye ñyaak.”

¹⁷Nte ibed adooho, akena anye afeen ndudue awo keed enyʌñ esio anye ke ñkpakọb ke ini usọrọ Basofa.

¹⁸Ado afịd ammọ emaebọñ uyo keed, “Edat awo ami eka, ado esio Barabas inọ ñnyịn.”

¹⁹(Ekesịn Barabas ke ñkpakọb sia anye amaasịn nsọk ke abio anyʌñ awot awo.)

²⁰Ke adiyem adisio Yisọs, Baided amaamaana akpeiye ammọ.

²¹Ado ammọ emaebọñ ke akpọsọñ uyo, “Ekọñ anye ke krọs, ekọñ anye ke krọs!”

²²Baided amaaka iso atañ ye ammọ ayọhọ ñke nta anyʌñ abịp ate, “Ntagha? Nsido ndudue amọ? Ami ñkịtte ntak ekpenọọhọ anye ufen ñkpa. Ke ntodo, ñyaanọ anye ufen ñnyʌñ nsio anye unyọñ.”

²³Ado ammọ emaebọñ ke akpọsọñ uyo, eyiire ete ekọñ anye ke krọs ndin uyo ammọ amaada.

²⁴Ke ntodo Baided amaabiire adinam uduak ammọ.

²⁵Anye amasio awo e-ekekọppọ ke ntak usịn nsọk ke abio ye uwod awo, anye a-ammọ ekebooho yak esio, ado ayaak Yisọs anọ ammọ ekenam ye anye naña ammọ eyem.

²⁶Naña mbon ekọñ ebenne anye edakka, ammọ emaesịn ubọk emʌm Saimọn awo Sirin nte akenyọñ isañ a-anye akekaaha, enam anye abiom krọs akeene Yisọs.

²⁷Umiañ awo emaekeene anye, ke atu ami ibaan emaesịne e-ekefʌghọke enyʌñ etuagha ebaña anye.

²⁸Yisọs amaakanna ase ammọ anyʌñ abo ammọ, “Nditọ ibaan Yerusedem, ikiituagha imbaña miin ado ituaaha ibaña idem ndufo ye nditọ ndufo.

²⁹Sia ini asʌk adi a-ndufo edibo, ‘Afọfọn anọ mme ada, idịb e-mmiimanna ayịn, eba a-ayịn miiwọppọ.’

³⁰Ndin, “ ‘Ammọ eyaebo mme ikpọ abod, “Iduọññọ ifuuk ñnyịn!” Ebo ntək abod, “Idiib ñnyịn!” ’

³¹Sia adieke mme awo enamma ami idaha eto ayọhọke ye mfañ, nso-o iditịppe idaha mfañasaada?”

³²Emaedat Yisọs ye mme ndiọi awo iba eka adiwot.

³³Ke ini ammọ emaekesịm itie e-ekekoodo Ñkpọkpọrọ, emaekọñ anye do ye ndiọi awo iba ado, keed ke ubọk udom, keed ke ubọk ufiin amọ.

³⁴Yisọs amaabo, “Ete feen nọ ammọ, sia ammọ idiọọñọke se ammọ enam.” Ammọ emaedeeme afọñ amọ ke emaekesịn ukañ.

³⁵Mme awo emaeda ese, mme adaukara enọ anye inua ete, “Anye amaanyaaña mbon mfen, yak anye anyaaña idem amọ, akpedo anye ado Mesaya ake Abasi akemekke.”

³⁶Mbon ekọñ ñko emaenyʌñ enọ anye inua. Ammọ emaenọ anye ukọd fineka ete anwọñ,

³⁷edian do ebo, “Akpedo afo ado adidem mme Yuu, nyaaña idem mfo ise.”

³⁸Emaewet ñwed edian ke anyọñ itie a-anye akekọñọke ete: Ami ado Adidem mme Yuu.

³⁹Keed ke atu mme anam idiọọk a-akekọñọke ye anye, amaasọñ anye anyen ate: “Nte afo udooho Mesaya? Nyaaña idem mfo ñnyʌñ inyaaña ñnyịn.”

⁴⁰Ado awo anam idiọọk anye ako amaasua anọ anye ate, “Nte afo ubaaha Abasi, sia ñnyịn ibọ ukem ufen?

⁴¹Inọ ñnyịn ufen a-adotto ye idiọọk ñkpọ ñnyịn. Ado ete ami idueeghe ke usʌñ ndomokeed.”

⁴²Ndin anye ate, “Yisọs, ntoiyo miin ke umaudʌk abio ubọọñ mfo.”

⁴³Yisọs amaabọọrọ anye ate, “Ami udọkkọ fiin akpanikọ, mfịn afo adiiba ye ami ke baradais.”

⁴⁴Ke akpereke ufọọd uweemeayo, akịm amaafʌk isọñ tutu asịm ñkpọ nte ñkanika ita.

⁴⁵Utịn atre adiyama, afọñ ikpeghe tembịd amaasakka iba.

⁴⁶Yisọs amaabọñ ke akpọsọñ uyo, “Ete, mmeyaak ukpọñ mmi usịn fiin ke ubọk.” Anye amaaketañ ikọ ami ima, anye aduọk akpatre inweek.

⁴⁷Ke ini sentudiọn akekịtte se ikitịppe ami, amaatooro Abasi anyʌñ abo, “Ke akpanikọ awo ami akedo adinen awo.”

⁴⁸Afịd awo se ikida ise se ikitịppe ami emaemia ubọk ke esịd edaaña enyọñọ.

⁴⁹Ado afịd awo se ikidiọọñọ Yisọs ye mme ibaan e-ekekeeneke anye tọọñọ ke Kadidi emaeda nsan-nsan ese mme ñkpọ ami.

⁵⁰Amaaba awo keed a-akekereke Yosef, awo Akwa Esob akọnsịn eti ye adinen awo,

⁵¹i-idiikinyịmmeke ke edioomo ye adinam ammọ. Anye aketo abio Yudia ukañ Arimatia, akenyʌñ atie abet adidi abio ubọọñ Abasi.

⁵²Anye amaaka abịne Baided akebeeñe akpo Yisọs.

⁵³Anye amaakọññọ akpo Yisọs awañ ke afọn dinen anyʌñ anịm ke udi e-eketịppeke ke itiad adooho kpaanam awo ndomokeed ikibʌhọke.

⁵⁴Akedo Usen Mbeeñeidem, sia Sabad akedo edem usen.

⁵⁵Ibaan e-ekekeeneke Yisọs tọọñọ ke Kadidi emaekeene Yosef edikikịt udi ye naña ekenịm akpo amọ.

⁵⁶Ndin ammọ emaenyọñ ufọk enyʌñ ekebeeñe idem enam inem ufịk adan se ediiben ikifiọññọ akpo Yisọs. Ado ammọ emaeduọk adudu ke usen Sabad nte ibed aketemmeke.