Read Ibibio Contemporary Bible 2020 Duk 24 Bible Online

Duk 24 - Ibibio Contemporary Bible 2020 bible

Duk 24

¹Ke akpa usen ke udua, ke usieere, ibaan ado emaeben mme inem-inem ufịk adan ammọ ekenamma eka udi.

²Ammọ ekekịt ke emaewere itiad esio ke udi,

³ado ke ini ammọ edʌkkọ esịd, ammọ ikịtte akpo Abọọñ Yisọs.

⁴Nte ammọ esʌkkọ eda do ke ñkpaidem, ideen iba e-ekesịneke nsem-nsem afọñ ebiọññọ ammọ ke ñkañ.

⁵Ke ndịk, mme ibaan ado emaesuuk iso ke isọñ. Ado mme ideen ado ebo ammọ ete, “Ntak a-ndufo eyemme adu uwem ke atu mme akpañkpa-a?

⁶Anye ibaaha mi, anye amaaset. Itoiyo se anye akidọkkọ ndufo ke ini anye asʌkkọ aba ke Kadidi:

⁷‘Akena eyaak Ayịn Awo esịn ke ubọk mme anam idiọọk, ekọñ anye ke eto krọs, anye anyʌñ aset ke ayọhọ usen ita.’ ”

⁸Ndin ammọ etoiyo ikọ amọ.

⁹Ammọ emaekenyọñ udi edi emaeditañ afịd ñkpọ ami enọ mme mbed duob ye keed ye mme mbon mfen.

¹⁰Mme ibaan ado ekedo Mmeri Makdadin, Yoana, ye Mmeri eka Yemsi ye mbon mfen eketañ enọ mme abọsịd.

¹¹Ado ammọ ikinịmme mme ibaan ami ke akpanikọ, sia mbʌk ammọ akeba nte ata ndisịme.

¹²Ado Bita amaadakka ada afeghe aka udi. Akewuọ, akenyuuñọ ase esịd udi ado ikịtte ñkpọ ntekeed mfen ikan dinen e-ekesịnne Yisọs nte ana ke idem amọ; anye ndin adakka anyọñ ke ñkpaidem.

¹³Kpa ukem usen ado, iba ke atu mme ibed amọ ekeka idʌñ keed a-akekereke Emaus, a-akedooho itiad itiaba tọọñọ ke Yerusedem,

¹⁴Ammọ ekesʌk eneme ebaña afịd ñkpọ se ikitịppe.

¹⁵Ndin nte ammọ esʌkkọ eneme ñkpọ ami, Yisọs ke idem amọ abiọññọ anyʌñ asaña ye ammọ;

¹⁶ado anyen ammọ ikitarake nọ ammọ ediọọñọ anye.

¹⁷Anye abo ammọ ate, “Nso-o ke ndufo eneneme ami?” Ammọ etuak eda, iso ammọ ayọhọ ye mfʌhọ.

¹⁸Ndin keed ke atu ammọ, a-akekereke Kreobas, abọọrọ anye ate, “Afo ado asenawo ke Yerusedem a-mmuudiọọñọke afịd se iba ke usen ifañ ami.”

¹⁹Anye amaabịp ate, “Me nso-o ñkpọ?” Ammọ ebọọrọ ete, “Abaña Yisọs ake Nasared. Anye akedo brọfed, anie adudu ke ikọ ye ke adinam ke iso Abasi ye ke atu afịd awo.

²⁰Mme ikpọ aku ye mme adaukara ñnyịn emaesaana anye eyaak nọ ebiire ikpe ñkpa enọ anye enyʌñ ekọñ anye ke eto krọs;

²¹ado idodanyen ñnyịn akedo ke anye adido andifak Isred. Ikweeñeke ke ado: usen ita ado ami tọọñọ mme ñkpọ ami aketịppe.

²²Ke ado aboiyoke, ubaak ibaan ke atu ñnyịn enam nọ idem ikpa ñnyịn. Ammọ ekeka udi ubak-ubak usen,

²³ke ini ammọ mmiikikịtte akpo Yisọs, ammọ emaenyọñ edidọkkọ ñnyịn ete ke mmimọ ikikịt ñkukịd mme enyere, e-ekebooho mmimọ ke anye mmọdo ke uwem.

²⁴Ubaak mbon nsaña ñnyịn emaeka udi enyʌñ ekekịt afịd ñkpọ naña ibaan ado eketañ, ado ammọ ikikịtte Yisọs idem.”

²⁵Ndin anye amaabo ammọ ate, “Ndufo emesịme eti-eti! Inyʌññọ ikan isọp inịm afịd se mme brọfed eketañ ke akpanikọ!

²⁶Nte ikinaaha Mesaya abọ afịd ufen ami ndin adʌk ke itooro ubọọñ amọ?”

²⁷Ndin anye amaatọọñọ ke Moses ye mme Brọfed mbon ñko anam anwaña ammọ ufañ ikọ Abasi a-akebañake anye.

²⁸Ke ini ammọ emaekekpere itie a-ammọ ekekaaha, Yisọs anam nte iyaisʌk ikaka iso ke isañ.

²⁹Ado ammọ eyịre anye ete aba ye mmimọ. Ammọ ete anye ke ayo akịm. Anam anye amaakeba ye ammọ.

³⁰Ke ini ammọ ekesʌkkọ edia ñkpọ, anye amaaben uyo anọ ekọọm, abuuñ, ndin atọọñọ adideeme nnọ ammọ.

³¹Do ke anyen ammọ aketara ndin ammọ enyʌñ ediọọñọ anye; ado anye amaasosop ammọ ke anyen.

³²Ndin ammọ ebo idem ammọ ete, “Nte esịd ñnyịn ikiduọghọ ini anye akesʌkkọ atañ ikọ ye ñnyịn anyʌñ akappa ñwed Abasi inọ ñnyịn ke usʌñ?”

³³Kpa idahado ammọ etịmme enyọñ Yerusedem. Do ammọ ekesoobo ye mme mbed duob ye keed nte eboho ye mme nsaña ammọ.

³⁴Mbon ado ebo ammọ ete, “Abọọñ aset ke ñkpa ke akpanikọ, anyʌñ ayaara idem anọ Saimọn.”

³⁵Ndin ammọ awo iba etañ se ikitịppe ke usʌñ isañ, ye naña ammọ ekediọọñọ anye ke ini anye akebuuñọ uyo.

³⁶Ammọ ekesʌk etatañ ebaña afịd mme ñkpọ ami ke inua, Yisọs ke idem amọ amaawuọ ada ke atu ammọ anyʌñ abo ammọ ate, “Emem aba ye ndufo!”

³⁷Ammọ emaedịkke enyʌñ ekop ndịk sia ekekere ke ikịt ekpo.

³⁸Ado anye abo ammọ ate, “Nso-o ido ntak esịd ndufo atịmekede; nso-o inyʌñ inam ndufo enie eyịghe ke esịd ndufo?

³⁹Se ubọk ye ukod mmi nọ ediọọñọ ke ami ke ado. Intuuk miin ise; ekpo inieeghe ikpọkidem ye akpọ naña ami nnie ami.”

⁴⁰Nte anye asʌkkọ atañ ikọ ami, anye awọt ammọ ubọk ye ukod amọ.

⁴¹Ammọ emaekop inemesịd tutu ikanna inịm se ekekịt, sia idem amaakpa ammọ; anam anye abo ammọ ate, “Emenie ñkpọ se edia?”

⁴²Ammọ emaeben ibio nsaad iyak enọ anye.

⁴³Anye abọ anyʌñ ata ke iso ammọ.

⁴⁴Ndin anye abo ammọ, “Se ami ñketañ inọ ndufo ke idaha ñkesʌkkọ mba ye ndufo ado: Afịd se ekewet embaña ke Ibed Moses, ye ke ñwed mme Brọfed ye mme Saam ana osu.”

⁴⁵Ndin anye amaanam ikọ Abasi anwaña ammọ.

⁴⁶Anye abo ammọ ate, “Ewet ebo ke Mesaya ayaabọ ufen ndin aset ke ñkpa ke ayọghọ usen ita,

⁴⁷ñko ke anyịñ amọ eyaekwọrọ adifeen ke mme idiọọkñkpọ enọ afịd mme idịd, tọọñọ ke Yerusedem.

⁴⁸Ndufo edoñño ntiense enọ mme ñkpọ ami.

⁴⁹Ami ñyaanọ se Ete mmi akenwọñọ isọk ndufo; ado iba ke abio Yerusedem tutu adudu ato anyọñ isịm ndufo.”

⁵⁰Ndin Yisọs amaakebem ammọ akewuọ adaña abio Betani, anye amaadịppe ubọk adiọñ ammọ.

⁵¹Nte anye asʌkkọ adiọñ ammọ, anye asịkke akpọñ ammọ ndin emaeben anye edọọk ke anyọñ.

⁵²Ammọ emaekpono anye, enyʌñ etịmme enyọñ Yerusedem ye akwa idaara.

⁵³Ndin ammọ ekeba ke tembịd afịd ini etooro Abasi.