Read Ibibio Contemporary Bible 2020 Duk 4 Bible Online

Duk 4 - Ibibio Contemporary Bible 2020 bible

Duk 4

¹Ndin Yisọs ke uyọhọ Adisana Sịbidịd amaakpọñ Yọdan, Sịbidịd amaanyʌñ adat anye usʌñ aka ke akpautatan.

²Do, ke afịd usen aba setan amaadomo anye. Ke afịd mme usen ado anye ikidiaagha ñkpọ, ke akpatre, abiọñ amaanekke adọñ anye.

³Setan amaabo anye ate, “Adieke afo adooho Ayịn Abasi, bo itiad ami ekappa ado uyo.”

⁴Yisọs amaabọọrọ, “Emaewet ete, ‘Idiidooho uyo ikpọọñ ke awo adidat idu uwem.’ ”

⁵Setan ndin amaaben anye aka anyọñ ekamba abod akewọt anye mme abio ubọọñ ke etək-etək ini.

⁶Setan amaabo Yisọs, “Nyaayaak afịd ubọọñ ekondo ami ye afịd inie ke esịd unọ fiin, sia emaeyaak afịd ennọ miin; ami mmenyʌñ nnie unen adiyaak anye nnọ ake ami mma adinọ.

⁷Afo ndin ukputuak iwuod uñkpono miin, nyaayaak afịd ami unọ fiin.”

⁸Yisọs amaabọọrọ anye ate, “Emaewet ete, ‘Kpono Abọọñ Abasi mfo nyʌñ nam ñkpọ nọ anye ikpọọñ.’ ”

⁹Ndin setan amaaben anye aka Yerusedem, anyʌñ akenam anye ada ke itie se ikoñ ikan ke tembịd, ate anye, “Adieke Afo adooho Ayịn Abasi, tamma keduọ ke isọñ.

¹⁰Sia emaewet ete: “ ‘Anye ayaanọ mme enyere amọ uyo nọ ukpeme fiin dek-dek;

¹¹ammọ eyaukama fiin ke ubọk ammọ, mbaak afo udutuak ukod mfo ke itiad.’ ”

¹²Ndin Yisọs abọọrọ anye ate, “Emaewet ete: Kuudomo Abọọñ Abasi mfo idomo.”

¹³Ke setan amaakekweeñe mme idomo ami, anye amaadakka akpọñ anye akebet tutu ufañ mfen.

¹⁴Yisọs amaatịmme anyọñ Kadidi, ye ayọhọ adudu Adisana Sịbidịd, ndin etob amọ amaasuana ayọhọ afịd ñkanñkʌk ado.

¹⁵Anye amaakpeeb ñkpọ ke mme sinakọk ammọ, ndin afịd awo emaetooro anye.

¹⁶Akekem anye amaadika ke Nasared, abio a-anye aketooho, ndin naña ido amọ akesido, anye amaadika sinakọk ke usen Sabad. Anye akeanyʌñ adakka ada adikood ñwed Abasi,

¹⁷emaenọ anye ñwed brọfed Aisaya. Ke anye amaakeatat ikpañwed ami, anye akịt itie ewette ete:

¹⁸“Sịbidịd Abọọñ andoro miin ke idem, sia anye amaañyet miin adan anịm, adikwọrọ eti mbʌk nnọ mme uwueene. Anye amaandọñ miin adikwọrọ uwuọufʌn nnọ mbon ñkpọkọb, ye aditịmme ñkịdusʌñ nnọ mme nnan ye ñkpọkñyak nnọ mbon a-mme awo efiighe,

¹⁹ñnyʌñ ñkwọrọ isua mfọnido Abọọñ.”

²⁰Ndin anye amaafʌt ikpañwed ado, ayaak anọ akamautom, anyʌñ asuuk atie. Afịd awo ke sinakọk ekewuuk anyen ese anye.

²¹Ndin anye amaatọọno ke adibo ammọ ate, “Ikọ Ñwed Abasi ami asu mfịn ami, nte ndufo ekoppo ke utọñ ndufo.”

²²Afịd atu awo emaetañ nti ikọ ebaña anye, idem amaanyʌñ akpa ammọ eti-eti, ke utọ nti ikọ a-akewuọọhọ ke inua amọ. Anam ammọ emaebịp ebo, “Idooho ayịn Yosef ido ami?”

²³Yisọs abo ammọ ate, “Ke akpanikọ ndufo idiitreke aditop ufiid ami imbaña miin ite: ‘Abiaibọk, kọk idem mfo!’ Ndufo eyaenyʌñ embo miin, ‘Nam mi ke idʌñ ndufo se ikop naña akenam ke Kapanọm.’ ”

²⁴Anye adian abo ate, “Ntañ akpanikọ inọ ndufo, brọfed isinieeghe ukpono ke abio emana amọ.

²⁵Ado akpanikọ ke umiañ mme ebekpa emaeba ke Isred ke ayo Edaiya, idaha a-Abasi akesiide ikpaanyọñ ke afịd isua ita ye afiọñ itiokeed, ndin akpọsọñ akañ akeba ke iso isọñ.

²⁶Ado Abasi ikidọññọ Edaiya abịne ammọ ndomokeed ibọhọke ebekpa keed a-akebaaha ke Sarefad ke utịd abio Sidọn.

²⁷Ñkpọ mfen ado, umiañ mme adọñọ akpamfia mmọ ekeba ke Isred ke ini Brọfed Edisa, ado ndomokeed ikibọọhọ ukọk ibọhọke Neman awo Siria.”

²⁸Afịd mbon se ikiba ke sinakọk ikop ikọ ami, emaebịmme iyadesịd.

²⁹Ammọ ebịmme esịd keed emʌm anye esio ke abio, eben anye eka anyọñ abod i-idʌñ ammọ akedoroke nọ ato do ekenək anye eduọọk.

³⁰Ado Yisọs amaasaña ke ufọọd ammọ aboiyo aka ndubeghe amọ.

³¹Anye amaadika Kapanọm, ke abio Kadidi, ndin ke usen Sabad anye atọọñọ adikpeeb mme awo ñkpọ.

³²Ukpeebñkpọ amọ amaakpa mme awo idem, sia ikọ amọ akesaña ye adudu.

³³Awodeen keed a-dimọn, idiọọk sịbidịd, akeafịnake amaaba ke sinakọk. Anye amaabọọñ ke akpọsọñ uyo ate,

³⁴“Nyọñ mi! Nso-o ke afo ayem ito ñnyịn, Yisọs Ayịn Nasared? Afo adi adisobo ñnyịn? Mmediọọñọ se afo ado: Adisana Ayịn Abasi!”

³⁵Ndin Yisọs amaawuuk anye ate, “Dop uyo! Wuọ anye ke idem!” Ndin dimọn ami amaanək anye atọ ke isọñ ke iso afịd awo, awuọ akpọñ anye, ado inọọhọ anye unan ndomokeed.

³⁶Idem amaakpa afịd awo, ndin ammọ emaeneme ke atu idem ammọ ete, “Nso-o isịne ke mme ikọ awo ami! Sia ke adudu ye uko anye anọ mme ndiọi sịbidịd ewʌghọ ate ewuọọñọ, ndin ammọ ewuọọñọ!”

³⁷Do ndin etob amọ amaasuana ke afịd ñkanñkʌk ado.

³⁸Akekem Yisọs amaakpọñ sinakọk aka ufọk Saimọn. Eka anwaan Saimọn akenie akpọsọñ ufiobidem, ndin ammọ emaebeeñe Yisọs ebo anwam anye.

³⁹Anye amaasịkke akpere mma ado, asua anọ ufiobidem, ndin udọñọ ado akweeñe anye. Idaha-idaha ado anye amaadaka ada akenam ndidia anọ ammọ.

⁴⁰Ke utekke ndubi mme awo emaekoono mbon e-ekedọñọke nsio-nsio udọñọ ebịne anye, anye amaadot ammọ keed-e-keed ubọk, akọk ammọ udọñọ.

⁴¹Mme dimọn emaenyʌñ ewuọọñọ uwak awo ke idem, ebọñọ ñkpo ete, “Afo ado Ayịn Abasi!” Ado anye amaakpan ammọ inyʌññọ iyak ammọ etañ ikọ, sia ammọ emaediọọñọ ke anye ado Mesaya.

⁴²Ayo akesieere, Yisọs amaakpọñ ndo aka ndobo-ndobo itie. Mme awo emaedʌk eyem anye ndin emaekekịt nte anye atie, emaenwana adinam ke anye akpọñ ammọ.

⁴³Ado anye amaabo ammọ, “Ana ami ñkwọrọ eti mbʌk abio ubọọñ Abasi nnọ mme idịd mfen ñko, sia ke ntak ado ke ekennọ miin ndi.”

⁴⁴Ndin anye amaaka iso akwọrọ ikọ ke mme sinakọk ke Yudia.