Read Ibibio Contemporary Bible 2020 Duk 7 Bible Online

Duk 7 - Ibibio Contemporary Bible 2020 bible

Duk 7

¹Ke Yisọs amaakekweeñe se anye akenie aditañ nnọ mme awo, anye amaaboiyo aka abio Kapanọm.

²Do, ayịnufọk sentudiọn keed e-eteufọk akemaaha eti-eti amaadọñọ akpere ñkpa.

³Ndin sentudiọn ado akekop abaña Yisọs, anye amaadọñ mme etubom mme Yuu ate ekekood anye nọ adikọk ayịnufọk amọ udọñọ.

⁴Ammọ emaedinekke ekpeiye Yisọs ete, “Mbọk dinwam sentudiọn ami ke anye adot se afo akpenwam,

⁵sia anye ama abio ñnyịn; amaanyʌñ abọp sinakọk inọ ñnyịn.”

⁶Ndin Yisọs amaakeene ammọ. Ado mbemiso anye akesịm ufọk ado, sentudiọn amaasio mme ufan amọ adọñ anọ Yisọs ate, “Abọọñ, mbọk kuukpa idem adidi ufọk mmi sia ami ndotto nte afo akpedʌkkọ ke idak akọm mmi.

⁷Anye anam nọ ami mmiikikpaaha idem ami aduubịne fiin. Ado tañ sʌk ikọ ke udọñọ ayaakweeñe ayịnufọk mmi.

⁸Sia ami ke idem mmi ndo andikara mme mbon ekọñ, ñkpebo keed ke atu ammọ ‘Kaa,’ anye aka; mbo anye ako, ‘Di,’ ndin anye adi. Ñnyʌñ mbo ayịnufọk mmi mfen, ‘Nam ami,’ anye anam.”

⁹Idem amaakpa Yisọs adikop ikọ sentudiọn ami, ndin anye akanna iso atañ anọ mbon atu awo e-ekekeeneke anye ke edem ate, “Ntañ akpanikọ inọ ndufo nte ke kpaanam ñkịtte utọ mbuọdidem a-akponno ntom, kpa ke abio Isred.”

¹⁰Ndin mme isʌñutom ami eketịmme enyọñ ufọk, ammọ emaakekịt ayịnufọk ado ke nsọñidem.

¹¹Usen ifañ akeboiyo, Yisọs amaasaña ye ibed amọ ye atu awo aka abio a-akereke Neen.

¹²Anye akekpere inuaatob abio ado, sese naña ebiom ebiom akpo awo ewuọ edi. Eka akpañkpa ami akedo ebekpa, akenyʌñ anie sʌk ayịn keed ado kpọd. Ndin ekamba udịm awo ke abio ado emaekeene mma ami esaña.

¹³Udʌk amaamʌm Abọọñ ke adikịt ebekpa ami, ndin anye abo anye, “Kuutua.”

¹⁴Do ndin anye amaasaña aketuuk ñkpọ e-ekebenne akebeakpo amọ, mme andikibiom etuak eda, ndin anye ate, “Akparawa, ami ubo fiin, dakka da!”

¹⁵Ndin akpañkpa adakka ada atie, anyʌñ atọọñọ aditañ ikọ, ndin Yisọs ayaak anye anọ eka.

¹⁶Idem amaakpa afịd awo, ndin ammọ emaenyʌñ etooro Abasi ete, “Akwa brọfed awuọ awọt idem ke ufọọd ñnyịn, Abasi adise ikọd amọ.”

¹⁷Etob amọ amaasuana akesịm Yudia ye afịd ñkanñkʌk abio ado.

¹⁸Mme mbed Yọọn emaetañ mme afịd ñkpọ se Yisọs akenañña ami enọ Yọọn.

¹⁹Ndin Yọọn amaasio mbed amọ iba adọñ ekebịp Abọọñ ebo, “Afo ado awo a-akenaaha adi, me ana itie ibet awo mfen?”

²⁰Ammọ ekedikịt Yisọs, ete anye, “Yọọn Aduọkmmọọñ akidọñ ate idubịp fiin ibo, ‘Afo ado awo a-akenieeghe adidi me itie ibet awo mfen?’ ”

²¹Ukem-ukem idahado Yisọs akesʌk akọk umiañ awo udọñọ, ayọ mfịna ammọ, anyʌñ abịn ndiọi sịbidịd ke idem mme awo asioño, anyʌñ anam umiañ mbon nnan ekịt usʌñ.

²²Anye amaabọọrọ ammọ ate, “Itịmme ika ikidọkkọ Yọọn se ndufo ekịt enyʌñ ekop: mme nnan ekịt ñkpọ, mbʌñọ esaña isañ, mme akpamfia esana, inan ekop ikọ, mme akpañkpa eset, enyʌñ ekwọrọ eti mbʌk Abasi enọ mbon uweene.

²³Afọfọn anọ awo a-ammiiduọọghọ ke ntak mmi.”

²⁴Mme isʌñutom Yọọn ekenyọñọ, Yisọs amaatọọñọ aditañ ikọ nnọ mme awo ado mbaña Yọọn ate, “Nso-o ke ndufo ekewuọọñọ eka ke akpautatan adikikịt? Me ñnyanyaaha ake afịm anyeeñeke?

²⁵Mmiidooho ntodo, nso-o ndin ke ekewuọọñọ eka adikịt? Awo a-asịneke uyaiya-uyaiya afọñidem? Iyoh, mbon usiine nti afọñ ñnyʌñ nnie umiañ nti ñkpọ ebañña ke ufọk adidem.

²⁶Nso-o ndin ke ndufo ekewuọọñọ eka adise? Brọfed? Ih, ami ntañ inọ ndufo, anye idooho ñkaña brọfed kpọd.

²⁷Anye ke ñwed Abasi aketañ abaña, abo: “ ‘Sese, Ami ñyaadọñ isʌñutom mmi uboiyo fiin iso nọ ato do adiọñ usʌñ unọ fiin.’

²⁸Ami ibo ndufo nte, ibaaha awo ndomokeed ke afịd mbon se eka aman a-akponno akan Yọọn, ado awo andisịp ñkan ke abio ubọọñ Abasi akpon akan anye.”

²⁹(Afịd mbon se ikikop ikọ amọ ye mme abọ taksi ñko emaedaara adinyaaña Abasi ke adikibọ uduọkmmọọñ Yọọn.

³⁰Ado mme Farisi ye mme nta akpeeb ibed emaesịn uduak Abasi ke idem ammọ sia ikibọọhọ uduọkmmọọñ Yọọn.)

³¹Yisọs amaamaana abo ate, “Nso-o ke ñkpedat ndomo emana ami? Ammọ ebit so-o?

³²Ammọ ebit ntəkayịn e-ebonoke ke añwa udua etañ mme emọ-emọ ete: “ ‘Ñnyịn imaifịt adʌk unọ, ado afo umaaha inek; imaikwọ ikwọ ikpo unọ, ado afo umaaha itua ayịd.’

³³Sia Yọọn Aduọkmmọọñ amaadi, idiaaha ñkpọ inyʌññọ inwọñ ukọd, ndin ndufo ete, ‘Anye anie dimọn.’

³⁴Ayịn Awo amaadi, adia ñkpọ anyʌñ añwọñ mmịn, ndin ndufo ete, ‘Kap se adiọọkitọñ ye ukọdnnaam, ufan mme abọ taksi ye ndiọi awo.’

³⁵Ado edat utom ifiọk ediọọñọ ifiọk eto ubọkutom amọ.”

³⁶Awo Farisi keed amaakood Yisọs ufọk, anye amaaka aketie, akanna abere ke akpokoro ndidia ke ufọk awo ami.

³⁷Mma keed ke abio ado a-akedooho anam idiọọk, akekop ke Yisọs mmọ ke ufọk awo Farisi ami, amaaben anemufịk adan ke ekpeme adabasta adi.

³⁸Naña anye akeadaaha ke edem Yisọs atua ayịd aduọk, mmọọñayịd ado amaaduọihọ ke ukod Yisọs. Ndin anye amaakama ided amọ akwokko mmọọñayịd ado, atʌm inua ke ukod Yisọs anyʌñ adat anemufịk adan ado afiọññọ anye ke ukod.

³⁹Awo Farisi a-akekoodo anye ufọk akekịt ami, anye amaatañ ke idem amọ abo, “Akpedo awo ami ado brọfed akpa adiọọñọ se utọ awo awonwaan a-atuuhọ anye mi ado, ke anye ado anamidiọọk.”

⁴⁰Yisọs amaadiọọñọ akikere amọ, ndin abo anye, “Saimọn, mmenie se mbo ntañ unọ.” Saimọn ate, “Andikpeeb, tañ.”

⁴¹Yisọs amaabo anye ate, “Awo akenie mme akamaisʌñ iba, keed akama anye kọbọ ikie ition, anye ako akama kọbọ aba ye duob.

⁴²Sia ammọ ba keed mmiikikanna isʌñ ami ikpe, anye amaafeen anọ ammọ. Anie ke atu iba ami adima anye ikan?”

⁴³Saimọn ate, “Ñkere mbo anye e-ekefeene isʌñ se iwak ikan.” Yisọs ate, “Amenen.”

⁴⁴Ndin Yisọs amaawọññọ ase mma ado anyʌñ abo Saimọn ate, “Amekịt a-mma ami? Ñkedʌk ufọk mfo, ukunnọọhọ mmọọñ uyieukod, ado a-mma ami adat mmọọñayịd amọ anyet ukod anyʌñ adat ided iwuod amọ akwokko ukod mmi.

⁴⁵Ukuntʌmmọ inua, ado tọọñọ ñkedi a-mma ami itreke aditʌm inua ke ukod mmi.

⁴⁶Ukuñfiọọñọke adan ke iwuod, ado a-mma ami amfiọọñọ anemutebe adan ke ukod.

⁴⁷Ke ntak ado, ubo fiin ke akpesʌk ado nte idiọọkñkpọ amọ awakka, efeen enọ anye sia anye awọt ekamba ima. Adodo awo e-efeene etək-etək ndudue, ima amọ anyʌñ ado etək-etək.”

⁴⁸Akema, anye ate a-mma ado, “Efeen mme idiọọkñkpọ mfo unọ.”

⁴⁹Do ke mbon e-ekebaaha ke akpokoro ndidia ye anye ebo emọ-emọ ete, “Awo ami ado anie afeene anọ awo, kpa ke mme idiọọkñkpọ?”

⁵⁰Ndin Yisọs ate a-mma ado, “Mbuọdidem mfo unyaaña fiin; nyọñ ke emem.”