Read Ibibio Contemporary Bible 2020 Duk 8 Bible Online

Duk 8 - Ibibio Contemporary Bible 2020 bible

Duk 8

¹Ke ado aboiyoke, Yisọs amaasaña ke mme nsio-nsio abio ye mme idʌñ akwọrọ eti etob abio ubọọñ Abasi ye mme ibed ammọ duob ye iba.

²Usʌk ibaan e-ekekọkkọ udọñọ enyʌñ esioño mme ndiọi sịbidịd emaenyʌñ esaña ye Yisọs: keed akedo Mmeri e-ekenyʌññọ esikood (Makdadin), a-dimọn itiaba akewuọọhọ anye ke idem;

³Yoana anwaan Susa, akama ukpọhọde ufọk Herọd, Susana ye uwak ibaan mfen. Mme ibaan ami ekedat inie ammọ enam ñkpọ enọ Yisọs ye mme ibed amọ.

⁴Ke uwak awo emaeketo nsio-nsio abio ibịne Yisọs, anye amaatop ñke ami anọ ammọ:

⁵“Atọ inwañ amaaka adisuan ñkpasi. Naña anye asuanna mme ñkpasi ami, ubaak emaeduọññọ ke akpọusʌñ; mme awo emaefiik eboiyo, mme inuen anyọñ enyʌñ etañ eta.

⁶Ubaak eduọññọ ke anyọñ itiad, ammọ ema eyeeme sia mmọọñ ikibaaha inọ ammọ.

⁷Ubaak ñko emaeduọññọ ke ikọd ñkukịm, ado mme ñkukịm ami emaekọt efuuk ñkpasi se ikitịppe.

⁸Ubaak ñkpasi emaeduọññọ ke eti isọñ. Emaenwịm, esiooño uwak mfịd, utịm ikie akan naña eketọọhọtọ.” Anye aketop ñke ami ama, anye amaabenne uyo ke anyọñ abo, “Awo ake anie utọñ yak anye akop.”

⁹Mme mbed amọ emaebịp anye se ñke ado awuọọñọ.

¹⁰Anye amaabọọrọ ammọ ate, “Eyaak ifiọk ntotəño ñkpọ abio ubọọñ Abasi inọ ndufo, ado ntañ nnọ mbon mfen ke ñke nọ atoodo, “ ‘ekpesese, ammọ ikịtte; ekpenyʌñ ekokop, inwañake ammọ.’

¹¹“Kop se ñke ami awuọ mi: Ñkpasi ado ikọ a-atooho Abasi.

¹²Mbon eduọññọke ke akpọusʌñ edoñño mbon e-ekoppo, ado andidiọọk adisio ikọ ado ke esịd ammọ, nọ ato do ammọ ikiinịm, inyʌñ ibọ adinyaaña.

¹³Ñkpasi e-eduọññọke ke anyọñ itiad edoñño mbon e-ekoppo ikọ ye inemesịd ado inieeghe adʌñ. Ammọ enịm ke etək-etək ini, ado idomo amaadi ammọ eduọññọ.

¹⁴Mbon e-ekeduọññọke ke ufọọd ikọd ñkukịm edoñño mbon se ikop ikọ ami, ado inie, mfịna ye inem uwem iyakka nọ ammọ enekke enie nsọọñọnda.

¹⁵Ado ñkpasi e-eduọññọke ke eti isọñ edoñño mbon e-enieeghe eti esịd, enie ime ye nsọọñọnda, ekop ikọ emʌm esịn ke esịd, enyʌñ enwịm nti mfịd.

¹⁶“Awo isidomoke ikañ iben isịn ke idak abañ me ke idak ikʌk. Ado esidomo ikañ edot ke ñkpọ udodikañ nọ atodo mbon se idʌk idi ekịt unwana.

¹⁷Sia ibaaha se idịbe a-mmiidiiyaarake, inyʌññọ iba se efʌk awo mmiidiidiọọñọke me awo mmiidiinamma nọ ado ke eferife.

¹⁸Ke ntodo, nekke diọọñọ naña afo akpañ utọñ. Awo se inie eyaediadian enọ anye, ado anye a-mmiinieeghe, eyaebọ etək se anye akap akere ke imọ iminie.”

¹⁹Eka Yisọs ye nditọeka amọ ideen emaedi adikịt anye, ado ammọ ikikanna ikịt anye akeene uwak atu awo se ikiba ye anye.

²⁰Awo amaatappa anye ate, “Eka mfo ye nditọuka ideen mmọeda ke esiin eyem adukịt.”

²¹Yisọs amaabọọrọ ate, “Eka mmi ye nditọeka mmi ideen edoñño mbon e-ekoppo ikọ Abasi enyʌñ eben esịn ke adinam.”

²²Usen keed Yisọs amaabo mme mbed amọ ate, “Yak iwọññọ ika edem ibiok uko.” Ndin ammọ emaedʌk ubom ewat edaaña.

²³Ekewat eka, Yisọs amaadaiya. Ayobio amaabịmme ke ibiok ado, anam mmọọñ ayem isịp ubom, ndin mme mbed emaekere ke iyaideñ.

²⁴Mme mbed emaeketọi anye ke idab, ete, “Etubom, Etubom, ñnyịn iyaideñ ke akpa.” Anye amaadakka ada asua anọ ayobio ye mfuud akpa; ndin ayobio amaasuuho, afịd ñkpọ adobo, biai.

²⁵Yisọs amaabịp mme mbed abo, “Mmọ mbuọdidem ndufo?” Ke ndịk ye ñkpaidem, mme mbed emaebịp idem ammọ ete, “Nso-o utọ awo ido ami? Anye anọ ikpan ndin ayobio ye akpa mmọọñ edobo enọ anye.”

²⁶Yisọs ye mme mbed amọ emaewat eka abio Kerasin, a-asakka iso ase ibiok Kadidi.

²⁷Yisọs akewuọ ke ubom asịm esʌk, anye amaasoobo awodeen keed a-aketooho abio ado; umiañ dimọn ekedọñọ anye ke idem. Awo ami akesisaña ifed, idʌññọ ke ufọk, ado akesidʌñ ke itie ndubʌhọ awo.

²⁸Anye akekịt Yisọs, anye amaaduọ ke iso amọ, asio ñkpo ate, “Nso-o ke afo ayem ye ami, Yisọs Ayịn Abasi Andikoñ Ñkan? Mbọk, mmuukpeiye kuntʌkkọ miin!”

²⁹Sia Yisọs amaanọ uyo ate idiọọk sịbidịd ado awuọ anye ke idem. Akpesʌk ado ekesidọññọ anye ñkpọnọ ke ukod ye ubọk enyʌñ ekpeme anye uwak ini, idiọọk sịbidịd ami amaasidịppe anye atọ, anam anye abʌñ mme ñkpọnọ ado anyʌñ abịn anye akesịn ke ikọd.

³⁰Yisọs amaabịp anye ate, “Afo akere die?” Anye amaabọọrọ ate, “Diyọn,” sia uwak-uwak dimọn emaedọñọ anye ke idem.

³¹Mme dimọn ado emaeka iso ekpeiye Yisọs ete akuubịn mmimọ akesịn ke eka ukpeufen nsi-nsi.

³²Mme uwak atu edi ekesʌk edia ñkpọ ke mben abod ado. Ndin ndiọi sịbidịd ado emaekpeiye Yisọs ete yak mmimọ ikidọñọ ke mme edi ado. Yisọs amaanyịmme.

³³Mme dimọn ado emaewuọọñọ ke idem ete ado, ekedọñọ ke mme edi ado; ndin mme edi ado emaekeduọññọ edọñọ ibiok ado, ekpañña.

³⁴Mme akpeme edi ado ekekịt se ikitịppe ami, ammọ emaefeeñe ekesuan etop ami ke afịd abio ye ñkanñkʌk ado,

³⁵ndin mme awo emaewuọọñọ eka adise se ikitịppe ado. Ammọ emaekekịt Yisọs, ye awodeen ado a-dimọn awuọọhọ ke idem naña adiọọñọ idem asịne afọñ atie ye Yisọs; idem amaañnyeñ ammọ.

³⁶Mbon se ikiba ikịt naña ekenyaañake awo ñkpọnsọb ami emaebʌk ewọt mme awo ami.

³⁷Ndin afịd awo ke abio Kerasin emaebo yak Yisọs akpọñ ukañ mmimọ, sia ndịk amaanam ammọ ata eti-eti. Ke ntak ado, anye amaadʌk ubom anyʌñ anyọñ.

³⁸Awo a-dimọn awuọ ke idem amaakpeiye Yisọs yak ikeene isaña ye anye, ado Yisọs amaabo anye ate,

³⁹“Tịmme nyọñ ufọk, nyʌñ kaa kebʌk afịd se Abasi anam unọ fiin.” Do ndin anye amaanyʌñ aka akebʌk afịd se Yisọs akenam anọ anye ke afịd ñkanñkʌk abio ado.

⁴⁰Ke Yisọs amaaketo adi, udịm awo emaedaara anye eti-eti sia ammọ eketeetie ebet anye.

⁴¹Akekem ete keed a-akekereke Yairọs, andikara sinakọk, amaadiduọ Yisọs ke ukod akpeiye ate yak anye adi ufọk imọ

⁴²sia ukweeñe ayịn abọikpa imọ a-adooho ñkpọ nte isua duob ye iba, akpere ñkpa. Yisọs akedakka aka ke usʌñ, atu awo emaekịppe ekeene anye, etək ayak ekpaefiik anye.

⁴³Ñko awonwaan keed amaaba do a-akedọñọke ụwuọiyiib ke isua duop ye iba, ado ikibaaha awo se ikikan ikọk anye udọñọ ado.

⁴⁴Awonwaan ami amaasaña aka ke edem Yisọs aketuuk isọñ afọñidem amọ; ndin kpa ke idahado, ụwuọiyiib ado amaatre.

⁴⁵Yisọs amaabịp ate, “Anie awo intuuk?” Ke afịd awo emaekekañ, ke awo mmimọ ndomokeed ituuhọ anye, Bita amaabo ate, “Etubom, sese afịd udịm awo ufiighe fiin mi.”

⁴⁶Ado Yisọs amaabọọrọ ate, “Awo antuuk miin; ami mmediọọñọ ke adudu añwuọ miin ke idem.”

⁴⁷Ndin awonwaan ado amaadiọọñọ ke imọ ibooho ikan idịbe, anye amaawuọ adi ke ñnyekidem, adiduọ Yisọs ke ukod. Ke iso afịd uwak awo ado, anye amaatañ ntak imọ ikituuhọ Yisọs ye naña imọ ikibọ ukọk ke ndo-ndo ado.

⁴⁸Yisọs amaabo anye, “Yịn awonwaan, mbuọdidem mfo ukọk fiin. Nyọñ ke emem.”

⁴⁹Naña Yisọs akesʌkkọ atan ikọ do, awo amaato ufọk Yairọs andikara sinakọk, adidọkkọ anye ate, “Ayịn abọikpa mfo akpa. Kuufịna Andikpeeb aba.”

⁵⁰Yisọs akekop ami, anye amaabo Yairọs ate, “Kuukop ndịk; kap nịm ke akpanikọ, ndin anye ayaakop nsọñidem.”

⁵¹Ke ini anye amaakesịm ufọk Yairus, anye ikiyakka awo ndomokeed adʌk ufọk ye anye, ibọhọke Bita, Yọọn ye Yemsi ye ete ye eka ayịn ado.

⁵²Afịd awo ekesʌk etuaha enyʌñ ebọọñ ñkpo ke ñkpa ayịn ado. Do ke Yisọs abo ammọ, “Idop ayịd. Ayịn ado ikpahakpa, adadaiya.”

⁵³Ammọ emaesak anye eduọi, sia afịd awo emaediọọñọ ke ayịn ado amaakpa.

⁵⁴Ado Yisọs amaamʌm ayịn ado ke ubọk ate, “Yịn mmi, dakka da!”

⁵⁵Idahado, sịbidịd uwem amaatịmme adʌk ayịn ado idem, anye adakka da ini keed. Yisọs amaabo ammọ enọ anye ñkpọ adia.

⁵⁶Idem amaakpa ete ye eka ayịn ado eti-eti, ado Yisọs amaabo ammọ keetañ se ikitịppe inọ awo ndomokeed.