Read Ibibio Contemporary Bible 2020 Duk 9 Bible Online

Duk 9 - Ibibio Contemporary Bible 2020 bible

Duk 9

¹Ke ini Yisọs amaakekood mme mbed duob ye iba ibon atọ keed, anye amaanọ ammọ adudu ye ukeme adibịn afịd mme ndiọi sịbidịd nsio ñnyʌñ ñkọk udọñọ.

²Anye amaasio ammọ adọñ ate esaña ekwọrọ ebaña abio ubọọñ Abasi enyʌñ ekọk mbon se idọñọ.

³Anye amaabo ammọ ate, “Ikiidat ñkpọ ndomokeed ikama ke isañ ndufo, me esañ, ekpad, ndidia, akʌk, me ukpʌghọ afọñ.

⁴Ufọk keed ake adodo a-ndufo edʌkkọ, iba do tutu ndufo ekpọñ abio ado.

⁵Ikpika ke ufọk awo a-mmiidaarake ndufo, ikeñ ntan ikpad ndufo naña eboho inyọñ ke abio ado nte ñkpọ ntiense ubiomikpe ammọ.”

⁶Ke ntodo ammọ emaedaaña isañ edʌk ke idʌñ mme idʌñ ekwọrọ eti etob enyʌñ ekọk mbon awo udọñọ ke afịd itie.

⁷Ndin Herọd a-akedooho andikara amaakop afịd se ikitịppe. Ke ntak ado akikere amọ amaatịmede sia usʌk awo ekebo ke Yọọn Aduọkmmọọñ akeset ke ñkpa,

⁸ubaak awo ete ke Edaiya atịmme adi, mbon mfen ete ke keed ke atu mme brọfed a-akekpaaha akeset atọọñọ ntak adidu uwem.

⁹Ado Herọd amaabo, “Ami mmaakpịkke Yọọn iwuod. Anie ndin ke ñkop ñkpọ ntịppe ami mbaña?” Ndin Herọd amaayem usʌñ naña akpenam akịt anye.

¹⁰Ke ini mme abọsịd emaekenyọñ edi, ammọ emaeditañ enọ Yisọs se ammọ ekenañña. Ndin anye ye mbed amọ ami emaewuọ ammọ-ammọ eka abio a-akereke Bedsaida,

¹¹ado mme atu awo emaekediyaara ediọọñọ, emaekeene anye. Anye amaadaara ammọ anyʌñatañ ikọ anọ ammọ abaña ubọọñ abio Abasi anyʌñ akọk mbio e-ekedọñọke udọñọ.

¹²Ayo aketekke mbed amọ duob ye iba emaedibo anye, “Nọ mme atu awo ami enyọñọ nọ ammọ ekaiya mme idʌñ ye ñkanñkʌk ekeyem ñkpọ se edia ye itie nduọkadudu sia itie a-ñnyịn ibaaha mi ada ke ataa esịd idʌñ.”

¹³Anye amaabọọrọ ammọ abo, “Ndufo inọ ammọ ndidia nọ edia.” Ammọ emaenyʌñ ebọọrọ anye ate, “Ñnyịn inie uyo ition ye iyak iba kpọd, ibọhọke ñnyịn idʌk esịd idʌñ ikidep ndidia a-adiikem afịd atu awo ami.”

¹⁴(Ñkpọ nte tọsịn awo ition ekeba do.) Ado anye amaabo mme mbed, “Inam mme awo ami etietie ke eboho aba ye duob, aba ye duob.”

¹⁵Mme mbed amọ emaenam naña anye akebo enam, afịd awo emaesọiyọ etietie.

¹⁶Anye amaaben uyo ition ye iyak iba, adịppe anyen ase anyọñ, anọ ekọọm anyʌñ abʌñ, ayaak anọ mme mbed amọ ate edeeme enọ mme awo.

¹⁷Afịd awo emaeta enyʌñ eyʌkkọ, ndin mme mbed emaetañ nyọk nsʌhọ ayọhọ akpasa duob ye iba.

¹⁸Ini keed, naña Yisọs akebaaha ke ndịbe itie asʌk abọñ akam, mme mbed amọ ekenyʌñ eba ye anye, anye amaabịp ammọ ate, “Mme atu awo ebo ke ami ndo anie?”

¹⁹Ammọ emaebọọrọ, “Ubaak awo ebo ke afo ado Yọọn aduọkmmọọñ, usʌk ebo ke afo ado Edaiya, usʌk enyʌñ ebo ke afo ado keed ke atu mme brọfed esed a-atịmmeke adimana.”

²⁰Anye amaabịp ammọ ate, “Ndufo ebo ke ami ndo anie?” Bita amaabọọrọ, “Afo ado Mesaya ake Abasi.”

²¹Yisọs amaadʌt ammọ utọñ ate keetañ ewọt awo ndomokeed.

²²Anye amaadian do ate, “Ayịn awo anaabọ akpọsọñ ndutʌkkọ, ndin mme ikpọ aku, mme andikpeeb ibed ye mme adaidaha eyaesịn anye, eyaewot anye, ado ke ayọhọ usen ita anye ayaaset.”

²³Ndin anye abo afịd ammọ, “Akpedo aba awo se iyem isaña ye ami, yak anye aben krọs amọ kwa usen añkeene miin.

²⁴Sia awo a-ayemme adinyaaña uwem amọ ayaaduọọk, ado awo a-aduọọhọ uwem amọ ke ntak mmi ayaanyaaña uwem amọ.

²⁵Nso-o ido ufọn awo adinie afịd ederimbod ado aduọk uwem amọ?

²⁶Adieke awo akoppo abuud ambaña miin ye ikọ mmi, Ayịn Awo ayaakop abuud abaña anye ke ini anye adidi ke ubọọñ amọ ye ubọọñ ake Ete ye mme ndisana enyere.

²⁷“Ke akpanikọ ke ami ntañ inọ ndufo nte, ubaak ndufo e-edaaha mi idiitappa ñkpa tutu ndufo ekịt abio ubọọñ Abasi.”

²⁸Ñkpọ nte usen itiaita amaakeboiyo nte Yisọs aketañ ikọ ami, anye amaaben Bita, Yemsi ye Yọọn adọọk anyọñ abod adikibọñ akam.

²⁹Naña anye asʌkkọ abọñ akam, iso amọ amaakpəho, afọñidem amọ amaakappa asesem.

³⁰Idahado awo iba, Moses ye Edaiya, emaebiọññọ ke ubọọñ,

³¹emaetañ ikọ ye Yisọs. Ammọ ekeneme nneme ebaña ñkpa a-anye adiikpa ke Yerusedem.

³²Idab amaayeed Bita ye nsaña amọ eti-eti, ado ammọ eketaad anyen, emaekịt ubọọñ amọ ye awo iba e-ekedaaha ye anye.

³³Ke idaha mme awo iba ami edakkake ekpọñ Yisọs, Bita amaabo anye, “Eteufọk, afọn ñnyịn adiba mi. Yak ibọp atayad ita, keed unie fiin, keed anie Moses, keed anie Edaiya.” (Anye ikidiọọñọke se anye aketañ.)

³⁴Naña anye Bita asʌkkọ atañ ikọ ami, ntọñanyọñ amaateññe akpere isọñ anyʌñ afʌk ammọ. Ke ini ado ndịk amaanam mme mbed.

³⁵Uyo amaato ikpaanyọñ ate, “Ami ado Ayịn mmi, a-ami mmekke, ikpañ utọñ inọ anye.”

³⁶Uyo ado akedop, ammọ emaekịt Yisọs nte ada ikpọọñ. Mme mbed emaesịn ñkpọ ntịppe ami ke esịd ammọ inyʌññọ itañ se ammọ ekekịt inọ ndomo awo keed.

³⁷Edem usen ado, ke ammọ emaekesọiyọ ke anyọñ abod idi, eka udịm awo emaedisoobo anye.

³⁸Awo keed ke atu ado amaabọñ ke akpọsọñ uyo ate, “Andikpeeb, mme ukpeiye fiin, di se ayịn mmi, sia anye ado ñkukweeñe ayịn mmi.

³⁹Sịbidịd keed asimʌm anye, anam anye abọọñ ñkpo, anam anye ndiyaañ tutu efuud awuọọñọ anye ke inua. Isisọppọ iyaak anye, anam anye akop mmemidem ñkpa-ñkpa.

⁴⁰Mmaakpeiye mme ibed mfo nte edibịn idiọọk sịbidịd ami esio, ado ammọ ikikanna.”

⁴¹Yisọs ate, “O ndufo mbon una mbuọdidem ye ukwañ emana, ami ndiikpeene die ye ndufo ñnyʌñ iyọ ndufo? Ben ayịn awodeen mfo di mi.”

⁴²Naña ayịn ami asañake akpere Yisọs, idiọọk sịbidịd ado amaanək anye, adịppe anye aduọk ke isọñ anyʌñ anam anye ndiyaañ. Ado Yisọs amaasua anọ idiọọk sịbidịd ado, akọk ayịn ado udọñọ anyʌñ ayaak anye anọ ete.

⁴³Idem amaakpa ammọ eti-eti abaña adudu Abasi. Naña afịd awo esʌkkọ eba ke ñkpaidem ebaña afịd se Yisọs akenam, anye amaabo mme ibed amọ ate,

⁴⁴“Inekke ikpañ utọñ ke se ami mbo ntañ inọ ndufo: eyaetap Ayịn Awo enọ mme awo.”

⁴⁵Se Yisọs aketañ ami ikinwañake ammọ. Amaayañña ammọ ifiọk ado ammọ emaekop ndịk adibịp anye se ado awuọọñọ.

⁴⁶Mfaaña amaaba ke atu mme mbed adidiọọñọ me anie ke atu ammọ ado andikpon ñkan.

⁴⁷Yisọs amaadiọọñọ akikere ammọ ndin anye aben etəkayịn atem ke ñkañ amọ.

⁴⁸Ndin anye amaabo ammọ, “Awo ake adodo a-adaarake etəkayịn ami ke anyịñ mmi andaara miin; ñko awo ake adodo andaarake miin adaara anye a-akendọññọ miin. Sia awo asịppe akan ke atu ndufo, anye ado andikpon ñkan.”

⁴⁹Yọọn amaabo Yisọs ate, “Eteufọk, ñnyịn imaikịt awo nte abịn ndiọi sịbidịd asiooño ke anyịñ mfo, ndi ñnyịn imainwana adikpan anye sia anye idooho keed ke atu ñnyịn.”

⁵⁰Yisọs amaabọọrọ anye ate, “Kuukpan anye, sia awo a-mmuubiọñọke fiin ada ye afo.”

⁵¹Ke ini amaakekpere adiben Yisọs ñkpọñ isọñ ndọọk ke anyọñ, anye amaasak iso adakka Yerusedem.

⁵²Anye amaadọñ mme isʌñutom amọ ate ibem imọ iso eka ke esịd idʌñ abio Sameria ekebono ñkpọ ke mbeeñeidem ibet imọ,

⁵³ado mbon abio ado ikidaarake anye adidi sia anye akeduakka adidiboiyo ñka Yerusedem.

⁵⁴Ke ini mbed amọ, Yemsi ye Yọọn ekịtte ami, ammọ emaebịp Yisọs ete, “Abọọñ ameyem nọ ñnyịn ikood ikañ ato anyọñ adisobo ammọ?”

⁵⁵Yisọs amaakanna asua anọ ammọ.

⁵⁶Ndin ammọ emaekappa eka abio mfen.

⁵⁷Naña ammọ esañake ke usʌñ, ete keed amaabo anye, “Nyaukeene fiin ñka itie nte afo akaaka.”

⁵⁸Yisọs amaabọọrọ anye ate, “Ewaikọd enieeñe adu, inuen anyọñ enieeñe efọk, ado Ayịn Awo inieehe nte adaak iwuod.”

⁵⁹Anye abo awodeen mfen, “Ñkeene miin.” Ado awo ado abọọrọ, “Abọọñ, yak nto ñka diin ñkebuuk ete mmi.”

⁶⁰Yisọs abọọrọ anye, “Yak mme akpañkpa ebuuk mme akpañkpa ammọ, ado afo kaa kekwọrọ abio ubọọñ Abasi.”

⁶¹Awo mfen ate, “Abọọñ, nyaukeene fiin ado yak nto ñkekọọm mbon ufọk etie sʌñ, ke mmewuọ.”

⁶²Yisọs amaabọọrọ anye ate, “Ibaaha awo a-asịnne ubọk ke ufuñisọñ inwañ akema akanna anyen ase edem a-adotto adinam utom abio ubọọñ Abasi.”