Read Ibibio Contemporary Bible 2020 Yọọn 1 Bible Online

Yọọn 1 - Ibibio Contemporary Bible 2020 bible

Yọọn 1

¹Ke aditọọñọ ikọ akebaaba, ikọ ami akeba ye Abasi, ndin ikọ ami akedo Abasi.

²Anye amaaba ye Abasi ke editọọñọ.

³Aketo anye afịd ñkpọ adibañña; ibaaha ñkpọ a-mmikitooho anye.

⁴Ke anye ke uwem akeba, ndin uwem ado akedo unwana afịd awo.

⁵Unwana ami ayamma ke akịm, ado akịm ikanna ifʌk unwana ami.

⁶Awo keed amaadi, a-Abasi akedọññọ; anye akekere Yọọn.

⁷Anye akedi nte ntiense, nọ atie ntiense abaña unwana ami, nọ ato ke anye afịd awo enịm Yisọs Krais ke akpanikọ,

⁸Idooho Yọọn ke idem amọ akedo unwana ami; ado anye akedi nte ntiense anọ unwana ami.

⁹Ata akpan unwana a-ayamake anọ afịd awo akesʌk adi ke ederimbod.

¹⁰Anye amaaba ke ederimbod, ndin akpesʌk ado ekenamma ederimbod eto anye, ederimbod ikidiọọñọke anye.

¹¹Anye amaadi ubon ammọ, ado ammọ ikidaarake anye.

¹²Ado afịd mbon e-ekedaarake anye, mbon e-ekenịmme anyịñ amọ ke akpanikọ, anye amaanọ ammọ ayọhọ unen adikappa ndo nditọ Abasi,

¹³nditọ e-mmiikimanake ito uduod awo, mme udọñ abʌkidem, me uduak ebe, ado amana ato Abasi.

¹⁴Ikọ amaakappa ado awo anyʌñ adʌñ mi ke ederimbod ke atu ñnyịn. Ñnyịn inyʌñ ikịt ubọọñ amọ a-anye anieeghe ato Ete nte ukwueeñe Ayịn Abasi Ete a-ayọhọke ye mfọn ye akpanikọ.

¹⁵(Yọọn amaatie ntiense ami abaña anye. Anye amaabọñ anwa-anwa ate, “Anye ami ado anye ami ñketañña mbaña, ke ini a-ami ñkebooho, ‘Anye a-akeñkeeneke miin ke edem mmi akpon añkan miin asʌk adi, sia anye amaababa ke ata anyan ini mbemiso ami mmana.’ ”)

¹⁶Afịd ñnyịn imibọ mfọn ito akpakʌb inie a-anye akebenne isọk ñnyịn ye edidiọñ ke edidiọñ a-akenwaññake ifʌk ñnyịn.

¹⁷Sia Moses akinọ ibed ikpọọñ, ado mfọn mme akpanikọ ato Yisọs Krais.

¹⁸Awo ndomokeed akenam ikịtte Abasi, ado Ayịn Abasi ikpọọñ-ikpọọñ, a-anyʌññọ ado Abasi ke idem amọ, a-atieeghe ke ñkañ Abasi, anam eyaara anye.

¹⁹Ami akedo ntiense Yọọn, ke ini mme Yuu edọññọ mme aku ye mme Difaid eto Yerusedem ekebịp anye ebo, afo ado anie?

²⁰Anye amaatañ anwa-anwa ate, “Ami ndooho Mesaya.”

²¹Ammọ emaebịp anye ete, “Ndin afo ado anie? Afo ado Edaiya?” Anye abọọrọ, “Ami ndooho.” “Afo ado Brọfed?” Anye abọọrọ, “Iyo-o.”

²²Ke akpatre ammọ emaana ebịp anye ete, “Ndin afo ado anie? Idọkkọ ñnyịn sia ana iben ibọọrọ isọk mbon e-ekidọññọ ñnyịn. Afo anie so aditañ mbaña idem mfo?”

²³Yọọn amaaben ikọ brọfed Aisaya abọọrọ ate, “Ami ndo uyo awo a-atuaaha ke akpautatan, ‘Ineeñe usʌñ inịm inọ Abọọñ.’ ”

²⁴Ndin mme Farisi e-ekesiooho edọñ

²⁵emaebịp anye ete, “Nsinam afo aduọk mme awo mmọọñ adieke afo mmuudooho Mesaya, udooho Edaiya, unyʌññọ udo Brọfed ado?”

²⁶Yọọn amaabọọrọ ammọ ate, “Ami ñkama mmọọñ nnịm uduọkmmọọñ, ado aba awo ke atu ndufo, a-ndufo miidiọọñọke.

²⁷Anye ado awo a-ñkeeneke miin ke edem, ado ami ndotto aditat udʌk ikpaukod amọ.”

²⁸Mme ñkpọ ami eketịppe ke Betani, idʌñ abaaha ke edem inyañ Yọdan, itie Yọọn akenịmme uduọkmmọọñ.

²⁹Usen mfen, Yọọn amaakịt Yisọs nte asaña abịne anye, anye anyʌñ abo ate, “Sese Ayịn Edọñ Abasi a-abenne mme idiọọkñkpọ ederimbod afep!

³⁰Anye ado anye ami ñketañña mbaña ke ini a-ami ñkebooho, ‘Awo a-akeñkeeneke miin ke edem akpon añkan miin asʌk adi, sia anye amaababa ke ata anyan ini mbemiso ami mmana.’

³¹Ami ke idem mmi ñkediọọñọke anye, ado ntak a-ñkekamake mmọọñ nnịm uduọkmmọọñ akedo ma eben anye ewọt Isred anwa-anwa.”

³²Ñko Yọọn anọ ikọ ntiense añwa-añwa ate: “Ami mmaakịt Adisana Sịbidịd nte asọiyọ ato abio ubọọñ Abasi adidoro anye ke idem nte ibiom.

³³Ami ñkpekediọọñọke anye ke idem mmi, ado anye a-akendọññọ ndiduọk mmọọñ amandọkkọ miin, ‘Awo a-afo akịtte nte Adisana Sịbidịd adidoro ke idem ado anye a-adiikama Adisana Sịbidịd inịm uduọkmmọọñ.’

³⁴Ami mmekịt ñnyʌñ nnam ediọọñọ ke anye ado Ameemek ake Abasi.”

³⁵Edem usen Yọọn amaana akeda ye mbed ammọ iba.

³⁶Yọọn akekịt naña Yisọs adisaña afrọ, anye ate, “Sese, Ayịn Edọñ Abasi.”

³⁷Ke ini mbed iba ami ekoppo se Yọọn aketañ ammọ emaekeene Yisọs.

³⁸Yisọs akanna iso, akịt ammọ nte ikeene anyʌñ abo ate, “Nso-o ke ndufo eyem?” Ammọ emaebọọrọ ete, “Rabbi” (awuọọñọke “Andikpeeb”), “afo adʌñ mọ-ọ?”

³⁹Anye amaabọọrọ ammọ ate, “Edi ke eyaenyʌñ ekekịt.” Ndin ammọ eka enyʌñ ekekịt nte anye akedʌñ, enyʌñ eba ye anye usen ado. Akedo ñkpọ nte ñkanika inaañ uweemeayo.

⁴⁰Keed ke atu iba e-ekekappake edo ibed Yisọs ke emaekekop se Yọọn aketañ akedo Andru, ayịneka Saimọn Bita.

⁴¹Akpa ñkpọ Andru akenamma akedo adiyem ayịneka amọ Saimọn nnyʌñ ndọkkọ anye mbo, “Ñnyịn imikịt Mesaya” (awuọọhọ Krais).

⁴²Ndin anye amaaben Saimọn abịne Yisọs. Yisọs amaase anye anyʌñ abo, “Afo ado Saimọn, ayịn Yọọn. Eduukood fiin Kefas” (awuọọñọke Bita).

⁴³Edem usen, Yisọs amaabiire adika Kadidi. Anye akekịt Fidib, anye amaabo anye ate, “Ñkeene miin.”

⁴⁴Fidib aketo Bedsaida, idʌñ keed mme Andru ye Bita.

⁴⁵Fidib amaakịt Natanied anyʌñ abo anye, “Ñnyịn imikịt anye a-Moses ke ñwed Ibed ye mme brọfed, ekewette ebañña, anye ado Yisọs ayịn Yosef, a-atooho Nasared.”

⁴⁶Natanied amaabịp anye, “Ato Nasared? Nte eti ñkpọ ndomokeed akeme ito udo?” Fidib amaabọọrọ anye, “Kap di se.”

⁴⁷Ke ini Yisọs akekịtte Natanied nte adi, anye amaabo, “Ata ayịn Isred ado ami, abiaaña ndomokeed isịneke anye ke idem.”

⁴⁸Natanied amaabịp anye ate, “Andiọọñọ die miin?” Yisọs amaabọọrọ, “Mbemiso Fidib akedukood fiin, ami mmaukekịt ke idak eto fik.”

⁴⁹Natanied amaabọọrọ ate, “Andikpeeb, afo ado Ayịn Abasi, afo ado adidem Isred.”

⁵⁰Yisọs amaabo anye, “Afo annịm miin ke akpanikọ sia mmaubo ke mmaukịt ke idak eto fik. Afo ayaakekiid mme ñkpọ se ikpokpoon ikan ado.”

⁵¹Ndin, Yisọs amaana adian, ate: “Ke ata akpanikọ ke ami udọkkọ, afo ayaakịt nte abio ubọọñ Abasi abeere, akịt mme enyere Abasi nte edọdọọk enyʌñ esọsọiyọ ebịne Ayịn Awo.”