Read Ibibio Contemporary Bible 2020 Yọọn 10 Bible Online

Yọọn 10 - Ibibio Contemporary Bible 2020 bible

Yọọn 10

¹“Ke ata akpanikọ ami ntañ inọ ndufo mme Farisi, awo a-mmiisañake inuaatob idʌk ufọk edọñ, ado asaña usʌñ mfen adʌk, ado inọ ye awo ñwo.

²Anye a-asañake inuaatob adʌk ado akpemedọñ.

³Akpeme inuaatob akʌkkọ usʌñ anọ anye adʌk, ndin mme edọñ ekpañ utọñ ekop uyo amọ. Anye akood edọñ amọ ke anyịñ anyʌñ akoono ammọ awuọ esiin.

⁴Ke anye amaakesio afịd se ido ake amọ, anye aboiyo ammọ iso, ndin mme edọñ ekeene anye sia ediọọñọ uyo amọ.

⁵Ammọ idiikeeneke asenawo, ado ediifefeghe ikpọñ anye, sia ammọ idiọọñọke uyo isenawo.”

⁶Yisọs amaatañ mbʌk ñke ami anọ mme Farisi ado ikinwañake ammọ se anye aketañ abaña.

⁷Anam Yisọs amaana abo ammọ ate: “Ke ata akpanikọ ami ntañ inọ ndufo, ami ndo inuaatob atu edọñ.

⁸Afịd mbon se ikimbem iso idi ekedoñño inọ ye ñwo, ado mme edọñ ikikpañña utọñ inọ ammọ.

⁹Ami ndo inuaatob, awo a-asañake anto miin adʌk ayaabọ adinyaaña. Utọ awo ado ayaadʌk anyʌñ awuọ anyʌñ akịd mbid ufene.

¹⁰Inọ adi adiyịp ñkpọ ñnyʌñ ñwot awo ñnyʌñ nsobo, ado ami mmedi nọ ammọ enie uwem, enyʌñ enie anye ayọhọ-ayọhọ.

¹¹“Ami ndo eti akpemedọñ. Eti akpemedọñ ayaak uwem amọ anọ edọñ.

¹²Anye e-ekpeeghekpe, idooho akpemedọñ, inyʌññọ ido anye anie edọñ. Ke ntodo, anye afeghe akpọñ edọñ ke ini anye akịtte ewaikọd naña adi. Ndin ewaikọd akịm mme edọñ anyʌñ asuan ammọ.

¹³Anye afeghe sia ekpekpe anye, anam anye ikereke ñkpọ ntekeed ibaña mme edọñ.

¹⁴“Ami ndo eti akpemedọñ; ami mmediọọñọ mme edọñ mmi, mme edọñ mmi enyʌñ endiọọñọ miin,

¹⁵kpa daña Ete andiọọñọ miin, ami ñko ñnyʌñ ndiọọñọ Ete; ñnyʌñ ñyaak uwem mmi nnọ edọñ mmi.

¹⁶Ami mmenie mme edọñ mfen e-mmiisịneke ke atu ami, ndin ana ami mben ammọ ndi ñko. Ammọ ñko eyaekpañ utọñ ekop uyo mmi, ndin atu edọñ keed ye akpemedọñ keed adiiba.

¹⁷Ntak e-Ete mmi ammaaha ado ke mmeduọọk uwem mmi — nọ ato odo mmaana mben anye.

¹⁸Awo nte keed imbọọhọ, ami nduọọk anye ke unyịmme esịd mmi. Ami mmenie adudu adiduọọk anye, ñnyʌñ nnie adudu adimaana mben anye; ndin ami ado uyo a-ami mbọọhọ nto Ete mmi.”

¹⁹Mme ikọ ami amaamaana asịn ubakka ke atu mme Yuu.

²⁰Uwak ammọ ete, “Anye ado awo ñkpọnsọb, ataa uyagha idaad. Ntak a-ndufo ekpañña utọñ enọ-ọ anye-e?”

²¹Mbon mfen ete, “Mme ikọ ami idooho ikọ awo ñkpọnsọb. Nte dimọn akeme aditat nnan anyen?”

²²Akedo ini usọrọ Adiyaak Nnọ ke Ñwaidem ke Yerusedem. Akedo ini ekarika,

²³ndin Yisọs akeba ke afe tembịd, asaaña ke Mbenesa Sọdọmọn.

²⁴Mme Yuu edikanna anye ekʌk enyʌñ ebo ete, “Afo abo inịm ñnyịn ke eyịghe ikpeene die? Akpedo afo ado Mesaya, tañ inọ ñnyịn añwa-añwa.”

²⁵Yisọs amaabọọrọ ate: “Ami mmaatañ inọ ndufo, ado ndufo inịmme. Mme utom a-ami nnamma ke anyịñ Ete mmi edo ntiense ennọ miin,

²⁶ado ndufo innịmme ke akpanikọ sia ndufo idooho mme edọñ mmi.

²⁷Mme edọñ mmi ekpañ utọñ ekop uyo mmi; ami mmediọọñọ ammọ, ammọ enyʌñ eñkeene miin.

²⁸Ami nnọ ammọ uwem nsi-nsi, ammọ idiisoppo tutu amama; ñko awo ndomokeed idiiwappake ammọ insio miin ke ubọk.

²⁹Ete mmi, a-akennọọhọ ammọ, akpon akan afịd awo, ñko awo ndomokeed ikemeke adiyịp ammọ nto ubọk Ete mmi.

³⁰Ami ye Ete mmi ido keed.”

³¹Mme Yuu emaemaana ekoono itiad aditọọñ anye,

³²ado Yisọs abo ammọ, “Ami mmiwọt ndufo uwak nti utom a-atooho Ete mmi. Ake-e ke atu ami anam nọ ndufo entọọñ ke itiad?”

³³Mme Yuu emaebọọrọ, “Ñnyịn utọọñọ fiin ke itiad ke ntak nti utom mfo, utọọñ sia amesappa anyịñ Abasi; afo ado ñkaña awo, ado afo abo ke ido Abasi.”

³⁴Yisọs abọọrọ ate, “Nte iwereke ke Ibed ndufo, ‘Ami mmebo ke ndufo edoñño mme “abasi” ’?

³⁵Anam edieeke anye akekoodo ammọ, ‘abasi,’ mbon ado ekewette ikọ Abasi enọ ndin awo ikanna ikpọnnọ ikọ Abasi inịm

³⁶maama dise ndin anye a-Abasi akesiooho anịm saña-saña nte akemọ anyʌñ anọ adi ke ederimbod? Ntagha a-ndufo ebooho ke mmesappa anyịñ Abasi ke ami adibo, ‘Ami ndo Ayịn Abasi’?

³⁷Ikiinnịm miin ke akpanikọ ibọhọke ami nnam utom Ete mmi.

³⁸Ado akpedo mmenam, akpesʌk ado a-ndufo idiinnịmme miin ke akpanikọ, isʌk ikap inịm mme utịbe utom a-ami nnamma ke akpanikọ, ma ndufo ediọọñọ ma anyʌñ inwaña ke Ete aba ke ami, ami ñko ñnyʌñ mba ke Ete.”

³⁹Ammọ emaemaana eyem adimʌm anye, ado anye amaafiọnnọ abọkkọ ammọ.

⁴⁰Ndin Yisọs amaatịmme aka edem Yọdan utịd ñkañ a-Yọọn akesiduọkkọ mme awo mmọọñ ke ntọọñọ ini ado. Anye amaaba do,

⁴¹ndin uwak awo emaedi ebịne anye. Ammọ emaebo anye ete, “Akpesʌk ado a-Yọọn ikidiinọọhọ mme idiọọñọ, afịd se anye aketañ abaña awo ami akedo akpanikọ.”

⁴²Ndin uwak ammọ do emaenịm anye ke akpanikọ.