Read Ibibio Contemporary Bible 2020 Yọọn 11 Bible Online

Yọọn 11 - Ibibio Contemporary Bible 2020 bible

Yọọn 11

¹Ete keed a-akekereke Dasarọs amaadọñọ. Anye aketo idʌñ Betani, idʌñ Mmeri ye ayịneka amọ Mmata eketooho.

²(Mmeri ami, a-ayịneka amọ Dasarọs a-akedọñọke mi, kpasʌk anye ado ukem awonwaan a-akefiọññọke Abọọñ Yisọs inem ufịk adan anyʌñ adat ided amọ akwokko ikpad Yisọs.)

³Nditọeka ibaan Dasarọs emaedọñ utom enọ Yisọs ete, “Abọọñ anye a-Afo amaaha adọdọñọ.”

⁴Ke ini Yisọs akoppo anye abo, “Udọñọ ami idiidatta ikiwuọ ke ñkpa. Iyo-o, ado ke ubọọñ Abasi nọ Ayịn Abasi abọ ubọọñ ato do.”

⁵Yisọs amaama Mmata ye nditọeka amọ, Mmeri ye Dasarọs.

⁶Ke anye amaakekop ke Dasarọs adọdọñọ, anye amaawoobo aba nte akeba ke usen iba mfen,

⁷ndin anye amaabo mme mbed, “Yak ñnyịn itịmme ika Yudia.”

⁸Ammọ emaebo, “Andikpeeb, ke etək-etək ini akeboiyoke mi, mme Yuu emaenwana adutọọñ ke itiad, ado afo abo itịmme ika do?”

⁹Yisọs amaabọọrọ, “Nte idooho awa duob ye iba aba ke uweeme ayo? Awo a-asañake ke uweeme ayo idiikọppọ iduọ, sia unwana ederimbod anam anye akịt usʌñ.

¹⁰Ado anye amaasaña ke akoneyo akeme adikọbọ nduọ sia unwana ibaaha.”

¹¹Anye amaaketañ ami ima, anye amaaka iso abo ammọ, “Ufan ñnyịn Dasarọs adaiya idab, ado ami ñyaaka do ñketọi anye.”

¹²Mme mbed ebọọrọ, “Abọọñ akpedo anye adadaiya idem ayaasọñ anye.”

¹³Yisọs aketañ abaña ñkpa Dasarọs, ado mme mbed ekekere ebo ke anye aketañ abaña ñkaña adidaiya idab.

¹⁴Ado anam anye atañ inwañ-inwañ ate, “Dasarọs akpa;

¹⁵ndin ke ntak ndufo, esịd annem ke ñkebaaha do, ma ndufo enịm ke akpanikọ. Ado yak ñnyịn ika ibịne anye.”

¹⁶Ndin Tọmọs, (enyʌññọ esikood Didimọs) amaabo mme ibed mbon ñko ate, “Yak ñnyịn ñko ikeene, ma ikikpa ye anye.”

¹⁷Yisọs amaakediwuọ, anye amaakịt ke Dasarọs amaasesịne ke udi usen inaañ.

¹⁸Tọọñọ ke Betani ka Yerusedem ikiyọhọke itiad iba,

¹⁹ñko ataa uwak mme Yuu emaeka adidọñ Mmata ye Mmeri esịd ke ntak ñkpa ayịneka ammọ.

²⁰Ke ini Mmata akekoppo ke Yisọs asʌk adi, anye amaawuọ akesoobo Yisọs, ado Mmeri akeba ke esịd ufọk.

²¹Mmata abo Yisọs, “Abọọñ akpedo afo akeba mi ayịneka mmi ikpikikpaaha.

²²Ado mmediọọñọ mbo ñkọm idahami Abasi akeme aduunọ se afo akpebebịp.”

²³Yisọs abo anye, “Ayịnuka ayaaset.”

²⁴Mmata amaabọọrọ, “Mmediọọñọ ke anye ayaaset ke ñkpa ke adised akpatre usen.”

²⁵Yisọs abo anye, “Ami ndo adised ke ñkpa ye uwem. Awo annịmme miin ke akpanikọ ayaadu uwem akpesʌk ado anye akpaaha;

²⁶ñko awo ake adodo aduuho uwem anyʌñ annịm miin ke akpanikọ idiikpaaha. Nte afo amenịm ami?”

²⁷Anye abo Yisọs, “Ih Abọọñ, mmenịm mbo ke afo ado Mesaya Ayịn Abasi a-anaaha adi ke ederimbod.”

²⁸Mmata amaaketañ ami ima, anye amaadakka akekood Mmeri ayịneka esịkke eda, ate “Andikpeeb mmọ mi, anye asʌk abịp ubaña fiin.”

²⁹Ke ini Mmeri akoppo ami, anye amaasọsọp adakka akesoobo anye.

³⁰Yisọs akesʌk aba ke itie Mmata akesooboke anye, ikidiwuọọhọ idʌñ Betani dion.

³¹Ke ini mme Yuu ekebaaha ke ufọk mme Mmeri esʌk edọñ anye esịd ekịtte daña anye asọsọp adakka awuọ esion, ammọ emaekeene anye sia ammọ ekekere ebo ke anye aka itie udi aditua ayịd.

³²Mmeri akewuọ itie Yisọs akebaaha, akịd anye, Mmeri amaaduọ ke ukod amọ abo, “Abọọñ, akpedo afo amaaba mi, ayịneka mmi ikpikikpaaha.”

³³Ke ini Yisọs akịtte ke anye ye mme Yuu e-ekesañake ye anye esʌk etua, amaanekke afịna Yisọs ke sịbidịd.

³⁴Anye abịp, “Mmọ-ọ ke ndufo ekenịm anye?” Ammọ ebọọrọ anye, “Abọọñ, di dise.”

³⁵Yisọs amaatua.

³⁶Ado anam mme Yuu ebo, “Sese daña anye akema anye!”

³⁷Ubaak ammọ emaebo, “Nte anye akenamma nnan akịd usʌñ ikpikinamma nọ ete ami akuukpa.”

³⁸Yisọs amaamaana afʌhọ ke esịd, asaña adiwuọ itie udi. Udi akedo aba itiad e-emaekeben itiad ekwe ke inua.

³⁹Anye amaabo ammọ, “Iwere itiad ami isio.” Mmata, ayịneka akpañkpa amaabo, “Abọọñ, akpo amọ atọọñọ aditebe idahami, sia anye ana do usen inaañ.”

⁴⁰Yisọs amaabo ate, “Ñketañña inọ ndufo mbo ke ekpenịm ke akpanikọ ndufo eyaekịt ubọọñ Abasi?”

⁴¹Ammọ emaewere itiad esio ndin Yisọs adịppe anyen ke anyọñ anyʌñ abo ate, “Ete, ami mmukọọm fiin sia afo amekop uyo mmi.

⁴²Mmaadiọọñọ mbo ke afo amesikop uyo mmi afịd ini, ado ñketañ ke ntak ufọn mme atu awo e-ebaññake mi, ma ammọ enịm ke afo akendọñ miin.”

⁴³Ke Yisọs amaaketañ ami ama, anye akood ke akpọsọñ uyo ate, “Dasarọs wuọ di.”

⁴⁴Akpañkpa amaawuọ adi mme daña ekenyʌñ ewañ anye mbai dinen, ye afọñ ke ubọk ye ukod ye iso. Yisọs abo ammọ, “Ekpọk anye afọñ udi, eyaak anye aka.”

⁴⁵Uwak mme Yuu e-ekedieeghe adise Mmeri ekenyʌñ ekịt se Yisọs akenam emaenịm anye ke akpanikọ.

⁴⁶Ado ubaak ammọ emaekebʌk enọ mme Farisi se Yisọs akenam.

⁴⁷Ndin mme ikpọ aku ye mme Farisi emaekood mbono esob Sanhidrin. “Nso-o ke ñnyịn inam dion? Se daña awo ami aka iso anam mme utịbe ñkpọ.

⁴⁸Ñnyịn ikpiyak anye aka iso ntom, afịd awo eyaenịm anye ke akpanikọ ndin mbon Rum eyaedibọ ñnyịn tembịd ye afịd idịd ñnyịn.”

⁴⁹Awo keed ke atu ammọ a-akekereke Kaifas, a-akedooho akwa aku isua ado amaabo ate, “Ndufo idiọọñọke bene ñkpọ keed.

⁵⁰Ndufo ikịtte ke afọn awo keed adikpa nnọ afịd awo ñkan afịd idʌñ aditak.”

⁵¹Anye ikitañña ami nte ikọ idem amọ, ado nte akwa aku isua ado anye aketañ nte brọfed ke Yisọs ayaakpa ke iwuod afịd idịd mme Yuu,

⁵²inyʌññọ ido idịd ado ikpọọñ, ado ayaakpa anọ nditọ Abasi e-ekesuanake eyọhọ afịd itie abok ammọ nọ ammọ ekappa edo keed.

⁵³Ndin tọọñọ ke usen ado ammọ emaeyem usʌñ naña ekpedat uwem amọ.

⁵⁴Ado amaanam Yisọs ikiwuọọñọke aba isaña anwa-anwa ke ufọọd mbon Yudia. Anye amaakeba mme mbed amọ ke esịd idʌñ a-akereke Ifrem, a-akpereke akpautatan.

⁵⁵Akekpere ini akwa usọrọ mme Yuu e-ekoodo Basofa, uwak awo emaekpọñ esịd idʌñ edika Yerusedem adinam idem ammọ asana ke mbeñe idem nnọ Basofa.

⁵⁶Ammọ emaeka iso eyem Yisọs, naña ammọ edaaha ke mme afe tembịd ammọ emaeka iso ebịp keed aken ete, “Afo akere so-o? Me anye idiidiighe usọrọ ami?”

⁵⁷Mme ikpọ aku ye mme Farisi emaedọñ etob ete emaekịt nte Yisọs aba yak edidọkkọ mmimọ ma ekemʌm anye.