Read Ibibio Contemporary Bible 2020 Yọọn 12 Bible Online

Yọọn 12 - Ibibio Contemporary Bible 2020 bible

Yọọn 12

¹Usen itiokeed akesʌghọ mbemiso ini Basofa, Yisọs amaaka Betani, itie a-Dasarọs, awo Yisọs akenamma aset ke ñkpa, akedʌññọ.

²Ke mmi ke ekenam usọrọ ndidia ndubi adikpono Yisọs. Mmata amaakeene adeeme ndidia ke ini Dasarọs aketieeghe ke akpokoro ye Yisọs.

³Ndin Mmeri amaaben ata nsọñudua adan keed aduọk Yisọs ke ukod anyʌñ aben ided amọ akwokko anye ukod. Ndin inem utebe nsọñudua adan ado amaayọhọ afịd ufọk.

⁴Ado keed ke atu mme mbed amọ, a-akekereke Yudas Iskariọd, anye a-akeditappa anye anyam ke akpatre, amaasua anọ ñkpọ ami, abo:

⁵“Ntak awo miikinyamma adan ami iben akʌk inọ mme uwueene-e? Adan ado amaayọhọ akʌkutom awo ke isuakeed,”

⁶anye ikitañña sia akemaaha mme uwueene, ado sia anye akedo inọ, nte akama ekpad akʌk, anye amaasisịññe akʌk anwam idem amọ ato se ekesisịn ke ekpad ado.

⁷Yisọs amaabọọrọ ate, “Kpọñ anye, akena nte anye anịm inem utebe adan ami anọ usen edimbuuk miin.

⁸Mbon uweene ediisʌk ibabañña ye ndufo, ado ami ndiibaaha ye ndufo afịd ini.”

⁹Anamma-anam mi uwak atu mme Yuu emaekop ke Yisọs mmọdo ke ndo, anam ammọ emaedi, idooho adikịt Yisọs ikpọọñ, ado adinyʌñ ñkịt Dasarọs a-Yisọs akenamma nọ aset ke ñkpa.

¹⁰Mme ikpọ aku emaenyʌñ enam akikere adiwot Dasarọs ñko,

¹¹sia amaato ke ntak amọ uwak mme Yuu ekappa ebịne Yisọs enyʌñ enịm anye ke akpanikọ.

¹²Edem usen uwak atu awo e-ekedieeghe usọrọ emaekop ke Yisọs adakka Yerusedem.

¹³Ammọ ekoono akpịn ayob ewuọ eka adisoobo ye anye enyʌñ ebọọñ ete, “Osana!” “Emaediọñ anye a-adieeghe ke anyịñ Abọọñ!” “Emaediọñ adidem Isred!”

¹⁴Yisọs amaakịt abaak enañ anyʌñ adọọk atie ke anyọñ kpa naña nte emaekewet.

¹⁵“Kuunie ndịk, ayịn awonwaan Sayọn. Sese, adidem mfo asʌk adi, atie ke edem abaak enañ mbiomo.”

¹⁶Ñkpọ ami ikinwañake mme mbed amọ akpa ado. Ado ke emaekeben Yisọs edọọk ke ubọọñ ke akenwaña ammọ nte ke emaewet mme ñkpo ami ebaña anye, ñko ke enyʌñ enam afịd mme ñkpọ ami enọ anye.

¹⁷Atu awo e-ekebaaha ye anye ke ini anye akekoodo Dasarọs ke udi asio ke ñkpa emaeka iso esuan etop ami.

¹⁸Mme uwak awo emaeka ebịne anye ke ini emaekekop ke anye anam utịbe idiọọñọ ami.

¹⁹Anam mme Farisi ebo idem ammọ ete, “Sese, ñkpọ ami idatta ñnyịn ika itie ndomokeed. Se naña afịd ederimbod ewọññọ ebịne anye.”

²⁰Amaaba mbon Krik ke atu mbon e-ekekaaha adikpono Abasi ke ini usọrọ ado.

²¹Ammọ emaedi ebịne Fidib a-aketooho Bedsaida ke Kadidi, enyʌñ enịm anye ebeeñe ke iso ete, “Ete, ñnyịn ikpaima edikịt Yisọs.”

²²Fidib aketañ anọ Andru; Andru ye Fidib emaedakka eketañ enọ Yisọs.

²³Yisọs abọọrọ ate, “Ini akem e-ebooho inọ Ayịn awo ubọọñ.

²⁴Ke ata akpanikọ ami ntañ inọ ndufo, ibọhọke ñkpasi abakpa aduọ adʌk isọñ akpa, anye adisʌk ido ñkpasi keed. Ado anye akpekpa, ayaasakka uwak ñkpasi.

²⁵Awo a-amaaha uwem amọ ayaaduọọk uwem, ado awo a-asuaagha uwem amọ ke ederimbod ami ayaanie nsi-nsi uwem.

²⁶Awo ake adodo anamma ñkpọ annọ miin ana añkeene miin; ndin itie nte ami mba, mbed mmi ana eba ke ndo. Ete mmi ayaakpono awo a-anamma ñkpọ annọ.

²⁷“Idahami ukpọñ mmi atịmede, ndin nso-o ke ñkpetañ? Ete, mfak miin sio ke awa ami? Idooho, sia ado ke ntak ami ke ami ñkediwuọ awa ami.

²⁸Ete, nọ anyịñ mfo ubọọñ.” Ndin uyo amaato abio ubọọñ Abasi ate, “Mmenọ anye ubọọñ, ndiisʌk mmamaana nnọ anye ubọọñ.”

²⁹Mme atu awo e-ekebaaha do ekop ñkpọ ami ekebo ke ado aduma; ubaak awo ete ke ado enyere aketañ ikọ ye anye.

³⁰Yisọs ate, “Uyo ado akedo ke ufọn ndufo, ikidooho ke ufọn mmi.

³¹Ini ubiire ikpe nnọ ederimbod ami akem; idahami eyaebịn akpan abọọñ ederimbod ami esio.

³²Ado ami, ke ini emaemben miin idọọk ke anyọñ, nyaakoono afịd awo ndat nnọ idem mmi.”

³³Anye aketañ ami adiwọt utọ ñkpa a-anye adiikpa.

³⁴Atu awo emaesio uyo ete, “Ñnyịn imikop ito Ibed ite ke Mesaya adiiba ke nsi-nsi, afo anam die abo, ‘Eyaeben Ayịn Awo edọọk ke anyọñ’? Anie ido ‘Ayịn Awo ami?’ ”

³⁵Ndin Yisọs abo ammọ ate, “Ndufo eyaekaiso ekịt unwana ke etək-etək ini. Isaña idaha unwana abaaha do, mbemiso akịm ifʌk ndufo. Awo a-asañake ke akịm idiọọñọke nte anye aka.

³⁶Buọd idem ke unwana ini akịtte unwana do, nọ ato do ndufo ekappa nditọ unwana.” Ke ini Yisọs amaaketañ ikọ ami ama, anye amaakpọñ itie ado anyʌñ asop ammọ ke anyen.

³⁷Akpesʌk ado Yisọs amaakenam afịd utịbe ñkpọ mme idiọọñọ ami ke iso ammọ, ammọ ikisʌkkọ inịm anye ke akpanikọ.

³⁸Ami akedo adinam ikọ a-Brọfed Aisaya aketañña asu: “Abọọñ, Abọọñ, mme anie awo ekeenịm etob ñnyịn ke akpanikọ, ñko, anie awo ke eyaara adudu Abasi ewọt?”

³⁹Ke ntak ami ammọ ikikanna inịm ke akpanikọ sia nte Aisaya atañña ke itie mfen:

⁴⁰“Anye akịm ammọ anyen, anyʌñ asọñ ammọ esịd, anam ammọ ikanna ikịt ñkpọ ke anyen ammọ, ñkpọ inyʌññọ ikan iñwaña ammọ ke esịd ammọ, inyʌññọ ima ikappa esịd nọ ñkpekọk ammọ udọñọ.”

⁴¹Aisaya aketañ ikọ ami sia anye amaakịt ubọọñ Yisọs anyʌñatañ ikọ abaña anye.

⁴²Ado kpa ye ado uwak awo ke atu mme adaiwuod emaenịm anye ke akpanikọ. Ado ke ntak mme Farisi ammọ ikikanna itañ mbuọdidem ammọ anwa-anwa mbaak edisio ammọ ke sinakọk,

⁴³sia ammọ ekemaaha itooro awo ekan itooro Abasi.

⁴⁴Ndin Yisọs amaabọọñ akpọsọñ uyo ate, “Awo a-annịmme miin ke akpanikọ, innịmme miin ikpọọñ ke akpanikọ, ado anịm andikindọñ miin ñko ke akpanikọ.

⁴⁵Awo ake anse miin, akịt andikindọñ miin.

⁴⁶Ami ndi ke ederimbod ami nte unwana nọ ato do awo a-annịmme miin ke akpanikọ akuuba ke akịm aba.

⁴⁷“Ama ado awo a-akoppo ikọ mmi ado inamma, ami mbiireke ikpe nnọ anye. Sia ami ñkedieeghe adibiire ikpe nnọ ederimbod, ado ñkedi adinyaaña anye.

⁴⁸Andikpe ikpe aba anọ awo a-ansịnne miin, a-mmiinyʌññọ inịm ikọ mmi ke akpanikọ; kpa mme ikọ ado a-ami ntañña adido ubiomo ikpe inọ ammọ ke akpatre usen.

⁴⁹Sia ñketañña nto ke adudu mmi, ado Ete a-akendọññọ akennọ se ntañ ye naña ntañ anye.

⁵⁰Mmediọọñọ ke ikọ amọ adat awo akesịm uwem nsi-nsi. Ke ntodo se adodo a-ami ntañña ado se Ete abo yak ntañ.”